عازمة على ترك المنزل صباح الغد
زوجي يعتبر عصبي و عند الغضب يبدأ بالشتم و التهديد و التوبيخ
متزوجان من سنتين و نصف و عندنا طفلة و أخرى ستأتي بعد شهرين إن شاء الله
عدد المرات التي شتمني بها زوجي قليلة و لكن أعصابي لا تحتمل أن أسمع المزيد
اليوم طلبت منه الذهاب لاهلي و رفض و اختلق مئات الحجج لذلك علما أن أهلي على بعد عمارتين عن عمارتي تحايلت عليه كثيراُ لكنه صمم بحجة أن الوقت متأخر و لا يجوز أن أخرج وحدي و هو كان يتهيأ للنوم و الساعة لسه 7 مساء
المهم بعد ساعة استيقظ و كان سيخرج لديه عمل و لم يجد مفاتيحه و فتش كثيراُ و أنا لم أهتم للموضوع
لما شفته تأخر صرت أفتش معه و هو يتمتم بشتائم و أخيراً وجدت المفاتيح و وضعتها أمامه و خرجت من الباب و إذا بي أسمعه يقول لي أنت كلبة
صار كل جسمي يرتجف و صرت أبكي و أقول بكون كلبة لو ضليت دقيقة بالبيت قال اوكي روحي عند اهلك قلت والله لأروح و الله لأروح و أنا أبكي و أصرخ و بدأت بلبس ملابسي و لما شاف الموضوع جدي يمكن خاف فقال لي اذا خرجت اليوم رح أطلقك و خرج
أنا ما خرجت بس ضبيت حقيبة بنتي و جهزت كل أغراضها و وضعتهم عند الباب عشان يشوفهم لما يجي و لما اجا ولا كإنو عمل شي صار يلعب بنته و يشاهد تلفاز و أنا جلست في غرفة تانية إلى أن نام
مع العلم هذه مش أول مرة بيقلي روحي لبيت أهلك و غالباُ بضب الحقائب و لما يشوف الموضوع جدي يبدأ يراضيني بس بدون ما يعتذر و كل مرة ما بكون ناوية أروح بجد بس مجرد أخوفه بس الظاهر تعود و عرف اللعبة
أنا هالمرة ناوية أطلع بجد و منتظرة يطلع الصباح عشان أروح لأهلي عشان يتعلم يحفظ أدبه
جربت أني أزعل بدون ما أطلع و ما استفدت بالعكس تمادى أكتر و يمكن صار يحس إني ما بقدر أتركه عشان هيك قررت أترك البيت لفترة
ناوية أكتبله رسالة و أفضفض كل يلي بقلبي بس مش عارفة شو أقول
أنا ما رح أخبر أهلي بتفاصيل المشكلة لأنهم بعمرهم ما رح يسامحوه بس رح أقلهم إنو تخانقنا و عم بفكر أقوله بهذا القرار بالرسالة هل تفكيري صح أو خطأ؟؟
إلي شجعني أكتر إنو والدي مسافر و أمي لوحدها بالبيت مع أخواتي البنات بحكم إنو ما عنا شباب
هل قراري صحيح؟؟
ما تقولولي اقعدي بالبيت لإنو كرامتي ما عادت تسمح و إذا ما خرجت يمكن المرة الجاي يضربني مش بس يسبني