حياك الله رجل ..
انا كان لي تجربة زواج سابقة .. لذلك ان شاء الله
يكون كلامي يساعدك بطريقة او اخرى ..
اقتباس:
|
زوجتي عند اهلها من قبل شهرين لم تتصل ولم تسأل والسبب تافه أني منعتها من الخروج لبيت اهلها وخرجت رغماَ عني .. حينها رفضت انا رجوعها للبيت .. فكان الجواب أن طلبت الطلاق .. السؤال .. هل لهذهـ الدرجة الطلاق سهل عند النساء ؟!
|
اخوي .. مرت حوالي عشر سنوات من زواجك من المفترض ان زوجتك
تكون تعلمت ونضجت بما يكفي .. عشان ما توصل الامور لهالمرحلة ..
الله يصلحها بس .. ولكن لمن رجعت لموضوعك الثاني .. تقول انك منعتها
من الخروج تاديبا لها .. اكيد سوت شي حبيت تادبها عليه وانا ما اعرف هالشي
ولكن اخوي رجل .. ممكن يكون هالشي تافه ما يستحق انك تمنعها من الخروج
لاجله .. وممكن يكون قوي ولكنك لجئت للانتقام بدل الحلول الودية لحله
اقصد طريقة معالجتك للخطا كانت اشبه بالانتقام فحست هي بالاستفزاز وطلعت
ما احاول الاقي لها عذر .. لكن احب اوضح لك دورك بالموضوع
وعلى اي حال فطلعتها بدون اذنك اكيد غلط .. وطلبها للطلاق غلط ثاني
اقتباس:
|
في حال الطلاق كيف أعرف أن زوجتي سوف تقبل بأولادي أم سترفضهم كي أستعد لذلكـ .؟!
|
ممكن تسالها .. وان شاء الله ما توصل الامور للطلاق
اقتباس:
|
أحياناَ أقول أني سوف أطلق لأن من رفضت زوجها لا تصلح له .. وأحيانا أقول لأجل الأولاد سأصبر وأتناسى رفضها .. هل أمسكها أم أطلقها ؟!
|
امسكها .. لعدة اعتبارات منها الاطفال ومنها انك انت الرجل
الاكثر حكمة وتعقل منها .. لو كل رجل طلق زوجته لانها طلبت الطلاق
وما تصلح زوجة لرفضها له .. كان انتهت علاقات زوجية كثير ..
اقتباس:
|
هل من المعقول أنه في حال عودة زوجتي لبيتها تكون الأنفس طيبه على بعض رغم أننا جلسنا عند الشيخ وفي المحكمة ؟!
|
راح تكون طيبة اذا سويتو حاجتين : كل واحد فيكم صفا خاطر الثاني عليه
يعني انت طيبت خاطرها بالي تبيه وهي نفس الشي
واذا كل واحد فيكم مستعد ما يكرر الاشياء الي تضايق الثاني
اقتباس:
|
هل هناكـ فرق بين أن أتركها عند أهلها شهرين أو ثلاثة أو أربعة .. بمعنى هل تختلف عندها المدة بالبقاء عند أهلها ؟!
|
ما ادري وش تفرق معها هي .. ولكن بشكل عام كل ما طولت ببيت اهلها
كل ما حصل لها فرصة اكبر تراجع نفسها
اقتباس:
|
هل يعتبر حبي لأولادي عيب عند زوجتي أم أنه شيء إيجابي قد تتذكره لي ؟!
|
حبك لعيالك اكيد شي ايجابي .. ولكن كيف هي تنظر له الله اعلم
اقتباس:
|
كانت علاقتي بأخوانها سطحية مما جعلهم لا يهتمون بموضوعنا فهل هذا قد يؤثر على عودتها لبيتها { لو } فكرت بذلكـ ؟!
|
اعتقد حسب علاقتها فيهم .. وحسب مستوى تفكيرهم
اقتباس:
|
أنا تذكر أيامنا مع الأولاد ويضيق صدري كيف وصلت الأمور لهذه الدرجة .. فهل هي تفكر بالأمر أم أنها أكل ونوم ؟!
|
اخوي رجل .. احس من هالسؤال وسؤالين قبله .. انك لسا ما فهمت زوجتك
ولا عرفت الكثير من جوانب شخصيتها .. عشت معها عشر سنوات ولا تعرف
هل هي حساسة للمشاكل او لا وهل هي متمسكة بعيالها لدرجة انها لا يمكن
تخليهم معك او انه عادي عندها ..
ما اقدر اجاوبك انت الي عشت معها وانت الاقدر على الحكم
اقتباس:
|
بماذا تنصحوني في المستقبل تجاهـ مشكلتي .. إذا عرفتوا .. أني أريد زوجتي لكني أريد معها قناعتها أنها أخطأت معي .. هل أصبر شهور كي تتعلم أم أطنش حتى يتصل اهلها ام ماذا أفعل .. أجيبوني ؟!
|
اخوي رجل .. الي انصحك فيه كذا شغلة
اولا : انت الان بحالة حيرة كبيرة وما اتخذت قرار نهائي وعاجز اصلا
عن هالشي بسبب نفسيتك ... لذلك يا ليت تنسى الموضوع فترة
عشان تهدى اعصابك للحد الي يخليك تقدر تفكر بعمق وبعقلانية اكثر
وعشان تهدى اعصابك لابد من الصلاة والقران ولابد تستعين بالله تعالى
وتدعيه يلهمك الصواب ...
ثانيا : انت انسان متزوج من عشر سنوات .. واكيد فيه تراكمات نفسية
عندك وعندها .. اوضح دليل انك مستعد تطلقها عشان موقف طلعتها بدون اذنك
انت ماتبي تطلقها فقط عشان هالشي .. اتصور انك اعقل من هالمستوى
ولكن اكيد فيه اشياء كثير قبل بقلبك عليها .. وصار هالموقف زي القشة الي قصمت
ظهر البعير ..لذلك حطها قاعدة بحياتك .. تحتاج انك تشيل هالتراكمات النفسية
اللي عندك وعندها .. عشان تقل نسبة المشاكل بحياتكم .. اول خطوة تشيل فيها هالتراكمات
انك بعد فترة من الوقت ... تسالها وش الي مضايقها منك خلها تذكر بس الاشياء الرئيسية
عشان مستقبلا تنتبه لها وما تعيدها .. اوعدها انك ما راح تسوي هالاشياء
بالمقابل انت ابدا وضح لها فقط الاشياء الرئيسية الي ضايقتك منها وخذ منها كلمة
انها ما تكررها مستقبلا ....
ثاني خطوة بعد ام تكونون اتفقتو .. بتكون انت مجهز لها اي شي يطيب خاطرها
سواء هدية طلعة سفرة المهم انه الشي الي هي تحبه .. وانت عارفه
على اساس يشيل الي باقي بقلبها عليك .. وان شاء الله هي بتردها لك
احسن .. هذا اذا هي ما سبقتك لهالشي
اخوي رجل .. باي مشكلة زوجية او غيرها .. ضروري تبدا بالحلول الودية
لمن نندفع ومن اول مرة نعالج الامور بعصبية وعناد .. تطلع لنا مشاكل جديدة
غير الاصلية .. يمكن تكون انت حليت مشكلة من مشاكلم بهالاسلوب ...
ووصلتو للمرحلة هذي ..
مابيكم ترجعون لبعض بس عشان الاطفال
ابيكم ترجعون لبعض وكل واحد عارف وش مضايق الثاني ومستعد ما يكرره
عشان كذا اتمنى تطبق كلامي ..
وبتابع موضوعك .. لين الله يفرجها
دمت بود
__________________
شتان .. بين من تسيره مبادئه ، ومن تسيره مصالحه