أخوي نحن فاهمين حزمك و طيبتك و هدوءك .. لكن زوجتك ما تفهم الشئ هذا للأسف ..

يعني سامحني على المثال هذا ..
الكرم ، صفة حلوة و الكل يحبها .. لكن المثل يقول إذا أكرمت الكريم ملكته و إذا أكرمت اللئيم تمردا
يعني ناس تنفع معها الكرم ، و ناس ما تنفع معهم ..

مثال اخر حتى أقربب لك الصورة ..
الكبر و التكبر .. صفة ممقوتة و منهي عنها ..
لكن المثل يقول أو حديث ضعيف بما معناه ، التكبر على المتكبر صدقة ..

عرفت قصدنا ..؟؟؟؟

------------------------------------

ايه إنت عاقل و مثالي بزيادة ( اتوقع إنك من برج الميزان لإنه هم طبعهم كذا دبلوماسيين )
و طيب و هادئ ووو إلخ

لكن الشئ هذا ، ما يمشي مع زوجتك ، لإنها تفهمه بمفهوم غلط ..
لإنها مغترة بنفسها و لسى ماهي عارفة قيمة الشئ هذا ..

لازم تحس إنها راح تخسر الشئ هذا ، حتى تعرف قيمة اللي كان عندها و بيدها و استهتارها خسرته

من الحزم تدبر عاقبة الأمور .. إيه صح ..
نفس اللي انت جالس تعمله حاليا ، بإنك تفكر بالعواقب ..
لكن ضيف عليها ( الإقدام ) .. فتقدم على الفعل بدون تردد إذا تداركت عواقب الأمور ..


أما سؤالك بجلب الهدية لها ، هذه مو اسمها حزم أبدا .. اسمها وضع الأمر في غير موضعه ..
و تفسيرها عند أهل زوجتك و عندها ( إنك خفت منها و إنك تعتذر وو إلخ )

أليس اقتناعي بعدم جدواية تقديم الهدية عزم ؟ في الاقتباس أعلاه " ألا أن الحزم لا معنى له بدون عزم "

صح .. إنت حازم مع نفسك بداخلك و يمكن مع الاخرين .. لكن مع زوجتك لأ .. و هذا اللي يمردها عليك
قلنا لك ، إنت مانت شايف صورتك اللي أهل زوجتك وو هي شايفينها ..

إنت تقول ماحد يلوي ذراعي و أنا بإستطاعتي أعمل و اعمل وو إلخ .. و عارفين إنك كذا و إنت تدري ..
و عندك القدرة و عندك الإمكانيات ..

لكن اللي تعمله يعكس صورة أخرى للشئ اللي إنت تعنيه و تقصده ..

مثلا ، حكاية الهدية .. يوم كنت راح تجيبه لها .. لإنك تبغى توصل رسالة مقصدها كذا و كذا و كذا ..
بس هم يفهموها غلط ..

و اكرر نفس كلامي اللي قلته من شوي ..
الطيبة و التسامح و المثالية ووو إلخ حلوة و الكل يتمناها .. لكن السؤال هنا ؟
( إيش طبيعة الشخص اللي أمامك ؟؟؟ )

إنت جربت و تعاملت من يوم تزوجت بطبيعتك هذه مع زوجتك ..
هل زادتها احترام لك و تقدير ؟ و لا تمرد ؟؟؟؟

أليس من العقل أن يتنازل الإنسان عن الإهانة لو المصلحة اقتضت ذلك ؟؟ اليس هذا بحزم ؟؟
أليس سؤالي ...هل أبدأ معها الحوار برسالة مثلاً " أنتي ترديني ؟ " تدبر في عاقبة الأمور أليس هذا بحزم ؟؟

لأ .. هذا مو حزم .. معليه ..
أية مصلحها تقتضيها ؟ في تنازلك عن الإهانة ..؟؟؟

لو فيها مصلحة وحدة بس ، أو نص مصلحة كنا قلنا لك ايوة صح تنازل ..

-------------------------------------------------------------------------------------------

الحزم ..
إني مثلا ، إذا ولدي اللي عمره 3 سنوات قل من أدبه علي بيوم .. أو مد يده فرضا ..

مو إني أفكر أجيب له هدية ؟؟؟ مو إني أجي أكلمه ؟؟؟ مو إني أتنازل عن الإهانة علشان المصلحة ؟

الحزم ، إنه إذا قل أدبه ..
اعطيه أوامر حازمة و ما اتراجع عنها ، إني أصدر قرار - بعد ما افكر إيش العواقب - و ما أتنازل عنها
إلا في حالة وحدة .. إذا شفت من ولدي إحساس بالندم أو تأنيب للضمير

--------------------------------------------------------------------------------------------

أخوي الأخلاق ..

اعطيك اقرب مثال أمس .. ولدي الشغالة تدلعه و تخرب اخلاقه لإني مضغوطة حاليا مع مشروع تخرجي
فهو يوم يخاصمها و يقل أدبه عليها .. تسكت له و يزيد .. مستحيل تقول له ( لأ ) ..
لكن التعامل هذا ما يمشي معي .. و هو يدري ..

أمس مسكت ولدي و اتكلم و امزح معاه .. جاء يبغى يخرج من الغرفة مسكته و حضنته ..
فجأة دف يدي و قام يصييييييح و يرفس و يعطي بكس ووو إلخ و يصيح ،، تركته و بعدت عنه
( في داخلي قلت اعلمه يبطل الحركات هذه .. لإنه ما عمره عملها قدامي )

رجعت مرة تانية حضنته .. و قام رجع يعمل نفس الشئ و يصيح مجرد ما امسكه ..
مسكته و طالعت فيه بحزم و هو جالس على عبي .. و قلت له :
" ولد ،، ؟؟؟؟ ايش فيه ؟؟؟؟ ضربتك ؟؟؟؟ ليه تعمل كذا ؟؟؟؟ "

عاد هو رافع يدينه الإثنين مجهزحاله .. قلت له نزل يدك ..
ما رضي ،، قلت له ، نزل يدك .. و مو راضي و حاط عينه في عيني عناد و رافع يده

خليت عيني في عينه لحد ما نزلت يده ، قلت له ما ترفع يدك على ماما .. و عاندني و رجعها
مرتين كررها .. ثالث مرة اعطيته علقة على كتفه و قلت له ( نزل يدك قلت لك ) ..

و تركته يبكيييييييي بس نص دقيقة و يستناني احضنه ، لإنه يوم يبكي أحضنه و اطبطب عليه
( و متعود الشغالة تسكت له و تضحك له ) ..
و طنشته ،، بعدين قلت له ( تعال حبيبي .. و جاء يحضنني و يبوسني و فهمت إنه اعتذار بلغته )
و كلمته بعدين و مزحت معه و فهمته .. و جلس معاي و يضحك و يلعب .. فمستحيل يقل أدبه
علي لإنه عارف إيش عقوبته ..

لكن شوف ، مع الشغالة ؟؟؟
مرة ضرب الشغالة ( كف ) ؟؟؟؟ أنا انفجعت الصراحة .. و جلست تضحك له هي و تبغى تدافع عنه ،،
قمت خاصمته بنفسي و هزأته ،، و من يومها بطل يمد يده عليها - عالأقل قدامي - و فهمته ما يمد يده
على أحد و تقصدت قدام الشغالة لإني ما أحب إنه ولدي يكبر و يستقوى عالضعيف ..

مع إنه الشغالة تعطيه اللي يبغاه .. لكن هو مستهين بها لإنها تسكت له عن الإهانة
( طبعا مسكينة هي ما تقدر تخاصمه لإنها تحبه و لإنه ولدي .. بس هي كذا قلبها طيب عالأطفال )

------------------------------------------------------------------

مرات الإنسان يحب الشخص اللي يوجهه و يوقفه ،، مو اللي يعطيه كل شئ و يتنازل و يسكت عن
الإهانة ..