محتاجة رايكم وخصوصا الرجال
السلام عليكم ورحمة الله وبركاته
كيف حالكم اخواني وأخواتي؟؟
الله يعطيكم العافية على مجهودكم ، والله يجزيكم خير ويعطيكم على قد نيتكم
أنا محتاجه رايكم وضروري
أنا كنت متزوجة لمدة 3 سنين ونص تقريبا وكنت اعيش مع زوجي خارج دولتنا، بصراحة زوجي كان رجال صايم امصلي عارف ربه ما عنده اي مشي يغضب رب العالمين، بس كان بصراحة جااااااااااااااااف وياي ولا يحس فيني، بصراحة حاولت وياه والله على ما أقول شهيد إن أنا ما قصرت في حقه في كل شي يطري على بالكم، كنت كل الي ابيه منه الكلمة الي اتحسسني اني زوجة مرغوب فيها في بيتها، كان دايما ايقول انتي مرة ومافي منج بس انا بيني وبينج حاجز ما اقدر احس فيج كنت اتقطع بس اقول زوجي لازم اصبر عليه، وبعد صبري للأمانة تحولت حياتي نكد، صرت عصبية وانعزلت عن الناس، هذا غير غيييييييييييييرته وما يخليني اروح مع احد ولا اطلع، كان التفاهم معاه صعب وايد،،،شلون ايقول بيني وبينه حاجز وهالغيرة؟؟؟كنت اموت لما اسمعه ايقول شوفي زوجة فلان وشوفي فلانةواقسم بربي ان انا مو اقل منهم في الي اسويه، المهم ان احنا حتى الله ما رزقنه اولاد، وبعدها صار دايما اكلمني عن الطلاق واحنا لازم نطلق
جيه يوم وخلص صبري فيه واخذت كل اغراضي وسافرت عند اهلي ما رجعت له وطلبت الطلاق، والحين انا امطلقه سنة بالضبط، حسيت روحي بموت من غيره، 3 شهور من طلاقنا وبعدها كلمني، وصار يعتذر ويقولي انا الي كنت غلطان طول هالسنين، انا الي قصرت في حقك، انا وانا وانا، بس انتي لازم كنتي اتصبرين، انتي كنتي اتعصبين ، وفعلا انا بعد ما كان اجيب لي طاري الطلاق والانفصال ويعاملني بقسوة كنت اعصب وحالتي نفسية تنعفس كان ايقول لي انا ما احب اتعصبين، يعني كلشي كنت اسويه خرب بس لعصبيتي؟؟
المهم ان انا طنشته فترة وما عطيته اي اهتمام خصوصا ان انا كنت مقهورة بسبب الطلاق، وبعد فترة بس حسيت ان بديت افكر في الرجعة وهو احسن لي من غيره، بس واحد من عيوبه ان عشان بيسوي شي بطيييييييييييييئ جدا وياخذ له وقت، لما صار ايكلمني وحس اني موافقة قال احنا لازم انفكر عدل ونتخذ قرارنا صح عشان مانرجع واتصير بينا المشاكل الأولية، وبس احس ان لما حس ان انا ابي ارجع برد الموضوع يعيني شنو الي قاعد ايصير؟؟؟؟
اهو على فكرة امعقد في افكاره كلش وعلى طول عايش بروحه لأنه في ديرة غير ديرة اهله، شنو يعني ارجع؟؟هل انا كنت غلطانة لأني كنت عصبية؟؟ اهو طبيعي هالرجال؟؟؟ ولا شنو؟؟؟
انا محتارة وصايدني ضيق ما يعلم فيه غير ربي
التعديل الأخير تم بواسطة في الإنتظار ; 16-08-2010 الساعة 11:09 PM
السبب: طلب رد