3- أنا من أطلب دائماً الخروج للنزهه وأحدد حتى أي مطعم سنأكل فيه وماجدولنا في العطل ولو طلبته أن يشاركني يذهب بي لأماكن مللنا الذهاب لها أي روتيني لا يصنع المفاجأت ولا يستطيع حتى التسوق بدوني لإحتياجات المنزل مع أن أغراضنا متكرره ومع ذلك لو راح لوحده يقلقني إتصالات وكأنه أول مره يشتري هالغرض مره يسأل الكتشب الكبير وإلا الصغير الصابون 6 كيلو وإلا 8 كيلو يعني مدري شقول عنه .
نفس الشيء تطلب النزهه وتحدد المكان اللي تبي وأي مطعم والجدول وأنا بصراحة من النوعية اللي ما أحب كثرة الخروج من البيت وإذا خرجت أحب أخرج لمكان هادئ يعني الأماكن المزدحمة تضايقني جداً وهي تحب هذي الأماكن ، أما التسوق أنا أستطيع بدونها لكنها أكيد إن في أشياء ما رح تعجبها ورح تخليني أرجعها وأستبدلها . وفعلا أنا أكثر اتصالات عليها لما أكون لوحدي تدرين ليش عشان ما تقول رجع هذا أو هذا مو أصلي. أما الكتشب الحمدلله ما نحب الكتشب.
4-دوامه من 7صباحا -5مساء وأنا بعيده عن أهلي مسافة ربع ساعه بالسياره ومافي أمل أروح لهم بدونه ونهاري بايخ وروتين في روتين فأضطر لقلب النظام أنام بعد الفجر وأصحى العصر وأولادي معاي وأيام المدارس اطبخ قبل أنام وأصحى للصلاه وقت رجوعهم واغديهم وأرجع أنام لبعد العصر بعدها أذاكر لهم وأعشيهم وينامون وهكذا
أنا دوامين مو دوام واحد وبيت أهلها بعيييييييييييييييييييييييييد يعني لو بوصلها أحتاج قريب ساعة لكني والله ما أقصر معاها في روحاتها لبيت أهلها ولا بيت عمها اللي بعيد كمان ولو وافقت تروح مع أخوانها ما عندي مانع وأنا أروح لها في الليل بعد الدوام يعني ما أحب أقطعها عن أهلها مع إن بيتي صاير قريب جدا من العمل وفي نفس المبنى.
ومع ذلك قالبة النظام تنام بالنهار إلى العصر وتسهر بالليل ويم تزعل من شيئ تنتقم من الأطفال يعني ما تصحيهم للمدارس وأرجع أنا من شغلة توصيل المدارس ـ طبعاً توصيل أولاد أما البنات توبة منهن الله لا يحوجنا لمثل هذا العمل ـ تترك الأولاد نايمين ما تصحيهم للمدارس عناد وتحدي وتضر أطفالها بهذا التصرف والطبخ عكسك تماماً ما في طبخ إلا نادراً جداً وأكلنا أكثره من المطاعم أو أنا أطبخ إذا لقيت وقت. وهي لا تصحى تغديهم ولا تعشيهم يعني زي بعضو ، وأكثر كلمة تألمني لما أدخل البيت وأسمع عيالي يقولون جيعانين يابابا.
5ـ طبعاً أعمد للنوم عشان ما أحط عصبيتي فيهم وهم شاقين الأرض من شقاوتهم
وهو يرجع أعشيه ويجلس معانا ولا كأنه جالس نعساااااااان وتعبان وسااااااااااااااااااكت أنتظر بفارغ الصبر متى يقرر يروح ينام في غرفته عشان أرتاح نفسياً
زوجي ماعنده أصدقاء يروح يسهر معهم أو حتى يطلع معهم أو يتابع معهم مباريات عشان ينشغل عني أبداً كل ربعه بمدينه ثانيه مايشوفهم إلا كل شهرين مره وأهله مو جنبنا برضوا بمدينه ثانيه
يعني ماله أحد غيري ومع ذلك مو شايفني
ماتفرق معي لو تزوج لكن أول شئ يطلقني ويروح بحال سبيله
عايشه معه بس كذا عشان أولادي لكن والله لو تزوج حتى أولادي ماراح أفكر فيهم لأنهم نقطة ضعفه ولايمكن أخليه يحس أنهم نقطة ضعفي أبداً مع إني مستحيل أفرط فيهم طبعاً
آخر موقف صار لما هنيته بشهر رمضان برساله وكتبت له فيها إني أحبه وللعلم الرساله هاذي أختي راسلتها لزوجها وقلدتها وليتيني ماسويتها
أكتشف إنه راسل لكل أصدقائه وحتى إللي ناسينه وقليل من عبره منهم وأنا أستكثر حتى يرد على رسالتي وسكتت
ولما أشتاق لي جاني بس ماهان عليه ينطق أشتقت لك ويموت ولا يقولها
بالعربي أنسان بعيد كل البعد عن الرومنسيه
بنقول مانبي رومنسيه نبي حنيه أبي رجال يحسسني إني أنثى عشان أحسسه إنه رجال
إذا أهتميت بنفسي ولا كنه يشوفني ولو بيقول كلمه حلوه يبيي حقه الشرعي
أنا أبي أسمع المدح منه
زوجي لا يعاني ولله الحمد من أي مشكله صحيه وعلاقتنا الخاصه تخطت المشاكل
لكن لو أهملت نفسي مستحيل يقول ليه وش فيك عادي عنده
حلوه وإلا شينه بزينه بدون زينه ريحتي عطر وإلا مطبخ كله واااااااااااااحد
لو أنا أبادر في كل شئ عادي عنده ولا يمكن يبدل طبعه تعبت معاه والله تعبت
عذراً دخلتك في متاهتي لكن والله إني أتشارك مع زوجتك في أغلب صفاتها وهاذي أسبابي
تبلدت بكل ماتحمله هاذي الكلمه من معنى
للأمانه مايرفض لي طلب أبداً
آسفه للإطاله
طبعا مثل ما قلت لك في أوجه شبه كبيرة بيني وبين زوجك وبينك وبين زوجتي مع وجود فوارق بالنسبة لي لو جسلت في البيت أكيد إنها رح تطلب أشياء ولو قلت ما أقدر صارت مشكلة ولو قلت طيب يعني ضغط على نفسي مع إنها عارفة البير وغطاه واليوم اللي أكون فيه مهموم بسبب معين ومشاكل في العمل وهي عارفة ويش هي المشاكل ألقاها مهتمة ببعض الكماليات وتطلب مثلا هدية جوال قيمته أكثر من 4000ريال وتعتبر هذا مقياس لحبي لها مع إني أكون في أزمة مادية. وعندها شعار إن اللي يحب واحد يبذل كل اللي يقدر عليه حتى لو يكلف نفسه. وأنا والله إني علي ديون هي السبب فيها.
وأنا كمان ما أروح عند أصدقائي ولا أحب جلساتهم وأحب أجلس في البيت لكن المشاكل تتفاقم ، أحب أجلس أمازحاها وأكلمها بكلمات حلوة لكنها مثل ما قلت ( جماد ) .
أحيانا تلبس لبس يعجبني لكن الشعار يقول : ( متع ناظريك ولا تلمس بيديك ).
تتزين عند خرجاتها وإذا في زواجات مثلا وقتها أنا أموت قهر لأن هذي الزينة مالي فيها نصيب إلا نادراً وأقل أقل أقل من النادر.
تخالفني في طريقة لباسها لأن في بعض اللبس أنا ما أرضاه لزوجتي تلبسه بسبب إنه يكون ضيق مثلا وأنا أكره أن زوجتي تخرج بلبس ضيق لكنها والله تعتبر كلامي هذا تدخل في أشياء خاصة فيها وتقول أنت ما تشوف الحريم ويش يلبسون أقول لها والله لو ما يلبسون شيء أنا أنهاك إنك تلبسين مثل هذا اللبس الضيق لكن للأسف لا حياة لمن تنادي أو تحصل مشاكل أنا في غنى عنها.
إذا نهيتها إنها تروح عند فلانة من الناس لأني ما أحب إنها تزورها لأن عندي تحفظ عليها من تاحية تعاملها مع زوجها لأنها دائما كانت تذكر لي إن فلانة قالت لزوجها كذا وكذا وأنها تسبه وترفع صوتها عليه . طبعاً أنا ما أحب زوجتي تروح عند وحده تعامل زوجها بهذا الأسلوب وتحكي كمان عن سوء أخلاقها مع زوجها.
طبعاً يجي الرد من زوجة المصون : ( مين إنت حتى تمنعني أروح عند صاحبتي !!
أو تكون مين ؟ أو بصفتك مين ؟ )
يعني مشاكل × مشاكل ولا نهدأ ولا نرتاح ولا تبدأ العقوبات الاقتصادية في البيت يعني تلقى فرصة في أي زعل أو أي تقصير مني في إنها تمتنع عن أداء أي حقوق لي أو لأبنائي.
أنا حبيت أرد على ردك بتفصيل أكثر لأنه بصراحة كان أهم رد في الموضوع ويمكن تستفيدي من تجربتي كما استفدت من تجربتك في ردك لأني رح أقرأه عدة مرات وأشوف مواطن الخلل في حتى أعالجها.
وعلى فكرة هي تقول نفس كلامك روح اتزوج غير مأسوف عليك يعني ما في أمل إنها تصلح وضعها وتعدل مزاجها مهما كان ، وأنا بصراحة تعبت من صدودها وهجرها ورح أتزوج بإذن الله عن قريب لأنه من المستحيل إني أعيش بقية عمري عزوبي.
الله يوفقك أختي ويصلح زوجك ويصلح لي زوجتي.