السلام عليكم و رحمة الله و بركاته


عندي مشكلة أعاني منها من سنة ، حصلت لي مع زوجي ، و أرغب بإيجاد قرار حاسم حتى ارتاح نهائيا
بإختصار إنه زوجي كان يتعامل مع مكتب صاحبه بجلب القبول للطلاب للإبتعاث ، و لإني على علم بإن زوجي
انسان ضعيف القلب و من السهل التأثير عليه ، قلت له عندي شرط ، تعاملك يكون مع الرجال فقط
الحريم مالك دخل فيهم .. و بسبب الموضوع هذا اختلفنا مرتين و اخر شئ وعدني إنه ما يجيب قبول للحريم


السبب ( لإني ما أبغى نفتح باب على نفسنا و مو ناقصنا مشاكل، و لإنه التواصل بيكون بالتلفون و الإيميل ،
و لإننا كنا في بداية حياتنا و كانت هناك لخبطة في حياتنا )
كنا مغتربين لمدة وقتها

::::

في يوم من الأيام من سنتين ، كانت عندي رحلة دولية و نازلة لبلدي كزيارة خاطفة و من هناك رحلة داخلية
لمدينتي و بالصدفة قابلت 2 و جلست معهم في الطيارة ، لا شفت شكلهم و لا شافوني و بالصدفة أصلا
إنهم كانوا في نفس الرحلة الدولية ، وحدة منهم يوم عرفت إني مغتربة و في المدينة اللي نسكن أنا و
زوجي فيها برة


قالت لي ( تعرفي فلان ؟ ) و باين عليها الإهتمام و إنها تبغى تاخد اخبار عنه ..
من غبائي ، جاوبتها بسرعة و قلت ( زوجي ليش ؟ )
ترددت و قالت ( ولاشئ .. بس أسمع عن اسمه يجيب قبولات للبنات في مدينتي اللي أنا فيها )
طنشتها و بينت إنه ما همني و ما كلمتها لحد ما وصلنا لإني كنت تعبانة و نمت أصلا في الطيارة ..

وصلت لمدينتي و أنا مقهوووووووورة منه ليه يكذب علي ؟ مو وعدني ما يجيب قبولات لبنات ؟
و مين هذه اللي مرة مهتمة تسمع عن أخباره ؟ و كنت قبل سنتين مررررة أحرق أعصابي على أتفه شئ
لحد ما طورت و غيرت نفسي للأفضل و تعلمت التطنيش و كيف أتعامل بحكمة أكثر من كثر ما شفت و ذقت


سألته ، و قالي ( طبعا ما أفتكر دحين كلامه بالضبط )
لكن بما معناه ، إنه هذه اخر وحدة بس اللي جاب لها قبول من زمان و من يوم ما وعدني إنه خلاص بس
رجال ، قلت له و لييييه بتقول بنات و إنت تجيب لهم قبولات وووو إلخ ؟ قالي مادري عنها ، يمكن كلام من
راسها ، المهم إنه جاب حجة و طنشت الموضوع و وعدني بيترك المنتدى اللي كانوا يطلبوا منه يجيب قبولات


نجي للمشكلة اللي صارت بعد الموضوع هذا بسنة ، لإنه مرتبط فيه ..

قبل كل شئ ، كانت عندي مشاكل مع زوجي هذيك الفترة ، لإنه كان يتدين فلوس من الناس و ما يرجعها
لهم و يصرف فلوسه على نفسه و ما يتحمل المسؤولية و غيرها من عيوب تصلحت دحين و الحمد لله
برضو قلت المعلومة هذه لإنها مرتبطة بالمشكلة الأساسية

::::

قبل سنة ، كنا جالسين مبسوطين أنا و زوجي بعد ما هدأت النفوس و وعدني يحقق لي كل شئ أتمناه
و إنه يتغير للأفضل و يرجع فلوس الناس كلهم و ما يطلب فلوس من أحد و يعتمد على نفسه و يتحمل
المسؤولية و يشيلها عني و يبعد عن السهر اليومي و يهتم في مستقبله .. إلخ

و نحن جالسين ، افتح المنتدى و تجيني رسالة خاصة باليوزر تبع زوجي ، من وحدة تقول له :
- يا فلان ، ترى أنا أعرف رقم زوجتك و اللي اسمها كذا و كذا و راح أقولها كل شئ

عاد أنا خلاااااااااااااااااااااص الدم بدأ يغلي في عروقي ، و مثلت عليها و رديت على إني زوجي :
- خير إيش فيه ؟

قالت :
رجع لي فلوسي و لا بأقول لزوجتك كل شئ

قلت لها :
- مالك شئ عندي ، و هذا رقم حرمتي إذا بتدقي دقي و أعلى ما في خيلك اركبيه لو إنت بنت أبوك

قالت :
- تشوف إيش راح أعمل

( طبعا هي انصدمت أكيييد لإن زوجي ما يتصف بالشجاعة أبدا .. و دايما يراعي مشاعر اللي أمامه )

::::

و قبل لا تتصل علي بدقايق هي ..

انفجرت على زوجي و قلت له مييييييييييييييييييييين هذه ؟؟؟؟ تلخبط و ما عرف إيش يقول ، و كلام كله
يعارض بعضه .
( طبعا زوجي في له طبع إنه ما يعرف يواجه أحد ، و كان زمان يكذب و دايما ينكشف قدامي )

دقت علي هي ، و قالت لي إنت فلانة ؟ قلت لها ايوة ..
قالت زوجك فلان ، و أخذ فلوس مني و مارجعه لي
قلت لها و ليش أخد منك ؟ قالت اسأليه إنت ..

زوجي جاء و قفل السماعة عليها ، و صار يبكي و يقول هذه بتخرب بيتك لا تسمعي لها
قلت لها إلا بأسمعها و أعرف إيش اللي فيه و أنا ما أعرف ؟؟؟؟؟

قالي أنا أحكي لك الحكاية ، قلت له إنت دايما تكذب علي .. أبغى أسمع منها بنفسي
و لا تتدخل دامك واثق من نفسك ..

::::

يتبع .. أنيم بنتي و أجي
و لإني بأسترجع أحداث السنة الماضية و اللي كان حلها اتفاق و زوجي ما التزم بالشرط ..
و عشان كذا ما قدرت أنسى لحد الحين ..