هي سمعت صوت زوجي يوم جاء و قالي قفلي و قفل بوجهها ،
فعرفت هي إنه بدأت مشكلة بتصير بيني و بين زوجي ..

أنا ما جاء في بالي وقتها أي شئ ، غير إنه وعدني ما ياخذ فلوس من أي أحد و إنه يرد الديون اللي عليه
لإنه كان يتدين من الناس فلوس مو عشان أشياء ضرورية ، عشان أشياء تافهة لنفسه و الناس تجي تشتكي منه
فانحرج منهم ، و كنت أنا اللي أصرف على البيت فكانوا الجيران يشوفوني جايبة أغراض للبيت و ينقهروا ، يحسبوا من
فلوسهم ، يعني ما دخلت حالي في ديونه إلا بعد ما طفح الكيل

فوقتها كل همي 3 أشياء ، يوم كلمتني هذيك :
أول شئ ، الديون ؟؟؟؟
ثاني شئ ، إيش بينه و بينها عشان تقولي هي ، خليه يرجع فلوسي ؟
ثالث شئ ، كيف تعرف يوزر زوجي في المنتدى و ترسل له بإسمه ترى أعرف رقم جوال زوجتك و بأفضحك ؟
طبعا يوم إني رديت عليها في المنتدى ، أرسلت لها ايميلي و قلت لها ضيفيني عشان نتفاهم ..
على إنه ايميل زوجي ( كنت بأشوف تعرف ايميل زوجي و لا لأ ) ؟؟؟؟؟

:::::::

أصريت أكلمها و أعرف إيش فيه ؟
زوجي يبكي و يترجاني ما أكلمها و أخرب بيتنا و الحب اللي بيننا و أنا مصرررررة أعرف و أكلمها ..

أصريييييييت و بعدت عنه و قلت له بأطلع برة ، خليني براحتي ..
تركني و لبست البالطو و الطرحةة و نزلت تحت في الحديقة و قمت دقيت عليها و قلت لها إيش الفلوس اللي أخدها ؟
قالت أسأليه ، هو في يوم دق علي و قالي محتاج فلوس وو حزنت عليه و حولت له

قلت لها ، و بأي حق تحولي فلوس لأي شخص ما تعرفيه ؟
قالت ، حزنت عليه و قال بيرجعها بس إنه تأخر علي و كل شوي يقول الشهر الجااي

سألتها كم الفلوس ؟
قالت لي أخد مني 300 جنيه استرليني و رجع نصها و بقي 120 ..
قلت لها و لا يهمك فلوسك بترجع لك و هذا حقك ..

قالت شكرا ..

قلت لها بس لسى ما خلصنا ، إنت حقوقك راح أرجعها بنفسي إذا هو ما رجعها ، بس أنا لي حقوق عندك
قالت لي إيش هو ؟

قلت لها ، إيش العلاقة اللي تخليك تعطي فلوس لشخص ما تعرفيه ؟؟
قالت ولاشئ ، أنا عاااااااااااااااااااادي مع كل الناس ، أكلم فلان و علان و أطلب منهم خدمات و يخدموني
و علاقة أخوة و فيه غير زوجك كثير ،، و زوجك انسان محترم و لا تشكي فيه ..

قلت لها ، و بأي حق تتكلمي معاه ؟ هنا أنا اعتبرك تعديتي على حقوقي ..
قامت تقولي ، استهدي بالله و لا تخربي بيتك بيدك وووو إلخ ( اشتغلت لي دحين على إنها مصلحة اجتماعية )

صارت هي تقولي ، إنت زي أختي و أنا أبغى لك الخير و ترى زوجك و الله العظيم يحبك و لا ماكان أهتم إنك ما تكلميني
و هو واحد محترم و لا تخسريه و لو غيره كان عمل و عمل و عمل ... و أنا شوفيني مطلقة و طليقي بهدل فيا
و كان يضربني و أنا وحدة مخطوبة أصلا ووو إلخ .. كلام طويل

قفلت السماعة و قلت لها أكلمك بكرة
( أبغى انهي حساباتي مع زوجي )

:::::

هو من أول يدق دق على جوالي و أنا ما أرد عليه لإني كنت أتكلم معها ..
بعد ما قفلت من عندها ، جاء عندي زوجي و نزل تحت ..

أخدني و طلعني فوق للبيت و قالي أنا أقولك الحكاية