رافضه وجود خادمه بالبيت ,,,
السلام عليكم
سأطرح عليكم مشكلتي اللي كل ما جيت ابكتبها ارجع وامسحها ما ادري ليه بس هالمره قررت اكتبها وانتوا احكموا عليه ...
زوجي يبغى يجيب لي خادمه وانا ما ابغى ,,,, ايوه ما ابغى لا احد يستغرب ,,,
اقولكم ليش يبغى يجيب ,,
انا ام لطفلين الله يحفظهم واحد عمره سنه ونصف والثاني عمره ستة اشهر ,,,, ساكنه بشقه نوعا ما كبيره .... واهم شي انا موظفه ....
طبعا انا ما تخيل وجود خادمه في بيتي لاسباب كثيره لا تقولون تغار على زوجها من الخادمه ابدا لانه ما خطر على بالي هالشي ولا راح يخطر والحمدلله لان ثقتي بزوجه كبيره جدا جدا ...
الاسباب هيه انا انسانه ما احب يكون فيه احد غريب يخنقني بمعنى اني ما احب احكم نفسي بلبس معين عشان شخص غريب معاي بالبيت لانه بوجودها راح يكون هناك لبس محدد ,,,
طبعا هذا غير انه راح اقدر مشاعرها وماراح اقدر اتصرف مع زوجي بحريه لازم يكون هناك حدود ... يعني اللعب والمزاح وبعض الكلام ماراح ينقال وهذا الشي يخوفني انه يسبب برود المشاعر ...
انا موسوسة نظافه يعني ما اعتمد انه احد ينظف بيتي نهائيا وان صار واحد نظفه ارجع انظف من وراه
ملابسي ما عمري خليت خادمه تمسكها حتى وانا لسا في بيت اهلي ,,, وحاليا صارت ملابسي وملابس زوجي حتى لما كنت نفاس ما خليت خدامة اهلي تمسكها كنت اقوم في الليل اغسلها عشان ما احد يشوفني ... بيتي لازم يتبخر بعد كل طبخ واذا مافيه بخور لازم يكون فيه فواحات مو وحده اكثر من وحده موزعه على البيت عشان احس اني مرتاحه ومبسوطه ...
الطبخ وما ادراك ما الطبخ انا استغرب من الحريم اللي تطلب خادمه تعرف تطبخ والله ما اقدر ولا استحمل
احد يطبخ لي نهائيا انا ما اخليها تقطع الاشياء البسيطه عشان اخليها تطبخ ....
ونجي لاولادي انا ما احب احد يتدخل في شي يخص اولادي سواء لبس او تنظيف او حتى الشيل ما ادري ليش بس الاكيد انه خوف عليهم وانا اذا جاتني خادمه ماراح اقولها لاتمسكينهم لانها راح تحقد ... وعاد شوفوا ايش ممكن تسوي ..
هذا غير المصايب اللي اسمعها عن الخادمات شي يشيب له شعر الراس فما بالكم لو دخلتها بيتي هل باكون مرتاحه نفسيا ....
بتقولون ليش طيب زوجك يبغى يجيبها انتي مقصره بشي ؟؟؟
بقولكم ان شاء الله اني مو مقصره بشي لا في البيت ولا في العيال ولا له هو شخصيا ,,, لكن السبب اللي طرا مؤخرا انه بعد ولادتي الاخيره صارت الام بالظهر فضيعه يعني اذا اشتغلت في البيت لمدة 5 ساعات واجلس عشان ارتاح بعدها ما اقدر امشي على رجولي بسبب الالم اللي في اسفل الفقرات والشي الثاني لما راجعت عند الدكتوره قالت انه عندي قرحه في الرحم وهي مسببه الضرر الاكبر لانه صرت مش بس تعبانه جسديا صار التعب النفسي اكبر .... يعني العصبيه اللي زايده عندي ,,, صرت حساسه جدا جدا وابكي لاي سبب ,,,, فقرر زوجي يجيب لي خادمه يقوللي انتي ما تجلسين الا اذا بغيتي تنامين
انا عندي عادي الجهد الجسدي ولا شي جنب اني اجيب وحده اتعب منها داخل البيت ...
بتقولون مهمله في نفسك عشان كذا يبغاك ترتاحي ,,,, راح اقولكم لا لاني لما انظف ما يكون بالبيت فعلى بال ما اخلص واتحمم واضبط نفسي هو يكون جا .... لبس ولله الحمد مدلعه نفسي شكلي اجدد فيه عشان لا هو يمل ولا انا امل لاني ما احب الروتين .... عطورات ومجموعات العطورات موجوده عندي لاني مدمنة عطورات ....
اولادي وقت الدوام يكونون عند الوالده ولما اجي من الدوام اخذهم يعني الحمدلله مدبره اموري ...
لكن زوجي مصر على حكاية الخادمه وانا اذا جات السيره تمغصني بطني
قولوا لي كيييييييييييييف امنعه ما ابغاه يجيبها لي اذا هو يبغالي الراحه انا مرتاااحه كذا واذا على الاعراض الصحيه مع الاستمرار على العلاج باذن الله راح ارجع مثل الاول ,,,,
لا احد من الحريم يجي يقوللي انتي مو بصاحيه مثل ما قالولي زميلاتي (احد يدور الراحه ويقول لا )
انا راحتي مع زوجي واولادي بدون وجود غريب بيننا ,,,,