منتدى عالم الأسرة والمجتمع - عرض مشاركة واحدة

06-09-2010, 06:40 AM

الورده زينب

موقوف

تاريخ التسجيل: Jun 2010

المشاركات: 379

ســلام

يشرفني حبيبتي اكون أول من يرد على مضووعج كوني " مطلقة "

//

آنه عمري 20

بعد جم يوم بيصير عمري 21 سنة

تزوجت لمدة سنة

وألحين آنه امطلقه

السبب الرئيسي لَـ طلاقي ... [ خيانة زوجية ]

وأسبـاب أخرى ... مثل ضعف الشخصية

والبعـد عن اللـه

والحمدلله ماعندي عيال منه

//

حيـاتي بعد الزواج ، مثل حياتي قبل الزواج

أمارس حياتي الطبيعية ..

اروح واطلع وكل شـي

أهلي ما ضيقوا علي بتاتاً ..

بـ العكس ، أبوي وأمي خلوني اشاركـهم حتى القرارات المصيـرية لـ الاسـرة

علاقتـي بـ صديقاتي زادت أكثر

صاروا ملجـأ لي من بعد اللـه

//

بـ النسبة حق إحسـاسي ، صح إن ارتحـت من زوجـي < سابقـاً طليقـي < حاليـاً

لكن مع ذلك ، الطلاق كسرني من داخل

فيه وحده من بنات المنتدى ردت بـ رد ما نسيته لـ حد الآن .. ما اذكر اسم البنت

بس قالت كلام وصفت إحساسي بـ الضبط

قالت : إن البنت تمشي على معادلة معينة في حياتها ألا وهي

عازبه > زواج > إنجاب

لكن إحنا مرينا بـ تجربة عكسية

عازبه > زواج > طلاق !

هَـ الشي كسرني نوعاً ما ، خلاني حساسه أكثر من قبل

خلاني عصبية أكثر من قبل

أي أحد يسألني " زينب شفيج ؟ "

دمعتي تسبق كلامي ..

خصوصاً بـ الليل وقت النوم ،

أحس اتمنى الحنان اللي يعطيه الرجال حق البنت !

اشتاق حق حياة زوجية !

اشتاق حق كلمة حلوه

حق نظره شوق

اشتاق حق لمه

اشتاق حتى حق الهواش مع رجال يكون لي زوجي !

اشتاق حق رجال إذا تكلمت عنه مع صديقاتي اقول لهم " ريلي " !

اشتاق اقول حق ربعي " اليوم رحت مع ريلي المكان الفلاني "

أو " باجر ما راح اييكم هني باطلع مع ريلي "

اشتاق حق رجال ازعل منه ويراضيني او ازعله واراضيه

اشتاق إن أكون " أم "

حق طفل يناديني " ماما "

حق طفل اطقه على يده اذا سوا شي مو صح

حق طفل اتهاوش مع أبوه عشانه !

اشتاق حق كل هَـ الاشياء واتمناها وكل ليلة من احط راسي على مخدتي اقعد اتخيل نفسي

متزوجة ومع رجال في بيته وعندي منه ياااهل حلوووو وحبوب وشيطاااااان

اتمنى كل هَـ الاشياء

ومن اغفى وأنام ... اخلي حلمي ينام معاي واقعد يوم ثاني أمارس حياتي بـ ابتسامه كبيررره

ومن يصير الليل وارجع لـ مخدتي اصحي حلمي وابجي عليه

وارجع اتمناه وارفع يدي لـ ربي واقول " يارب عوضني خير "

واتذكر رحمة ربي علي واقول " يؤجل الله أمانينا ولا ينساها "

بس فعلاً الطلاق يكسر البنت ويخلف وراها فراغ عاطفي

//

وبـ النسبة لي الفراغ العاطفي والانكسار الداخلي اللي اعيشه والحساسية أهون بـ مليون مره من حياة كنت عايشتها مع طليقي