السلام عليكم

موضوعي يمكن يكون بالنسبة لكم غريب و تافه
بس بالنسبة لي وايد مأثر على حياتي و على سلوكي و على اعصابي و حتى على عملي

من وأنا طفلة أمنياتي احققها بأحلام اليقظة قبل ما انام اقرا سور صغيرة و بعدها تبدي رحلتي شنو اتمنى من الحياة اتخيل اني حققته

حتى بالمدرسة كنت بعض الأحيان اشرد بتفكيري و اجلس اتخيل

و بسن المراهقة زاد الأمر

و اللحين انا متزوجة و عندي عيال و مازلت اي شي يضايقني او اتمنى احققه اسرح بتفكيري و اتخيله

لدرجة اني بعض الأحيان ما أتذكر اللي صار هو صج و حقيقة لو كنت نايمة و احلم

بتقولون اشلون اثر عليج اقول لكم صرت وايد انسى

امور كثيرة انساها انسى اني اتصل انسى اني اسوي شي مهم انسى اني متفقة اقوم بعمل معين في وقت معين

صرت اخلط بين الحقيقة و الخيال

تقولون ليش تحلمين و انتي قاعده اقول لكم كثير من الأشياء ما اقدر اسويها بالواقع و اتمنى اسويها فألجأ للخيال
و كثير من الأشياء تضايقني و ما اقدر أغيرها بالواقع اغيرها بالخيال

صرت ارتاح اكثر لأحلام اليقظة لدرجة اني من اتضايق احط راسي على المخدة و ابتدي اتخيل

و ما اقدر اترك هالتصرف ليشنه هو المنفس الوحيد لي من الضغوطات اليومية

و ليشنه غصب عني ما اشوف نفسي الا بوادي ثاني

كثير من الأحيان يكلموني اللي حوالي و ما ادري شنو قالوا لأني كنت سرحانه
و بتسألوني ليش صرتي عصبية اقول لكم اذا احد قطع علي خيالي اعصب لأنه طلعني من حالة السرور اللي كنت فيها
و لأني اذا انتبهت للواقع اللي حوالي اتضايق اني كنت احلم ما كانت الحقيقة اللي كنت فيها و تتوتر اعصابي

انا ادري انه احلام اليقظة شي عادي و خصوصا للبنات بس احس انها مسيطرة علي و انا احلم زيادة عن اللزوم
يعني تخيلوا اني اذا قعدت من النوم الساعة 7 ما اقوم من الفراش الا الساعة 10 ليمن اشبع من أحلام اليقظة و التخيلات و الوقت اللي اتحرك فيه او اقعد فيه دام اني ساكته يعني انا اتخيل و المشكلة اني دوم ساكته يعني دوم اتخيل

ايش اسوي؟ ابطل التخيل؟ ما اقدر مثل ما قلت منفسي الوحيد لأني ما احب اتكلم مع الناس حتى مع اهلي بخصوصياتي او باللي يضايقني ما عندي غير الله و زوجي اشكي همي بس بعد ما اشتكي لزوجي كثير علشان ما اضايقه

شوروا علي

__________________