المشاركة الأصلية كتبت بواسطة جوهرة الكويت
آآآآآه والله إني نفس حالتك ويمكن أسوأ
ماصرت اجد في العيد أي فرحة بل بالعكس يزيد همي وحزني وبكائي
صعب العيد مع العنوسة صعب حييييل
كل وحده فرحانه مع زوجها وعيالها بالعيد تطلع وتستانس معاهم
وانا منعزلة بداري اعايد الحيطان
عمري ماصليت صلاة العيد بالمصلى
وهالعيد اشتهيت اروح لصلاة العيد لكن كالعاده ما في احد يروح معاي
صرت ما اشتهي اشوف احد
امس بالغصب طلعت سلمت على اخوي وزوجته وعياله قعدت ساعة ورجعت لداري ماقدرت اسولف معاهم ولا ابتسم
بكيت بالليل الى ان نمت واليوم الصبح مابي اقوم
جت امي وصحتني عشان نروح نعيد على جدتي
قلتها مابي اروح ورديت نمت ،، ومو من عادتي ما اروح بيت جدتي بالعيد
بس ما لي خلق اشوف احد ولا لي خلق البس ولا اتزين مالي خلق شي
و الحين قاعده بالبيت بروحي واحس اريحلي ،، أشوف الحجاج بالتلفزيون وأعيش أجواءهم
مادري شفيني صرت ما احب اطلع لاي مكان ولا اشوف احد ولا ابي احد يجيينا البيت
ابي العطلة تخلص بسرعة ,, ليت اليوم آخر يوم ،، موعشان مشتاقة للدوام بالعكس ما ودي اداوم
بس لأني مابي أحد يزورنا مابي اشوف احد
مابي اشوف نظرات الشفقه بعيونهم ،، مابي أسمع كلام يجرح،،
فانا الوحيده العانس اللي بالعايلة وانا الوحيدة اللي وصلت لهالعمر من غير زواج
يكفي امس نظرات ابوي تذبح ،، نظرات احتقار ،، نظرات ازدراء،،
كأنه يقولي انتي فاشلة محد يبيك،، الكل كون اسرة وصار عنده عيال وانتي ليلحين قاعدة
ينتقدني بكل شي لدرجة اني صرت اكره اطالع وجهه ولا انظر لعيونه اللي كلها نظرات تجرح
كنت شاريه هديه له ولأمي كنت بعطيها لهم أول يوم عيد لكن ماعطيتهم
صار موقف خلاني ابكي
هذا بدل مايحتوني بحبهم وحنانهم في وقت اعيش فيه بوحده فظيعه لا خوات ولا اخوان ولا قرايب ولا صديقات
كلهم تزوجوا وخلوني بروحي صرت اتحاشاهم وافضل العزلة حتى تلفوني سكرته لأني مابي أكلم أحد
شلون بسولف معاهم واندمج بينهم وانا الوحيدة الشاذة العانس فيهم ..
حمدلله على كل حال
يارب ارحمنا برحمتك
ساعات احس الفرج قرييب واقول لنفسي قاعدة اشم ريحة الفرج ، أسليها
وساعات احس انه بعييييييد بعييييييييد بعيييييييييييييد
|