كلامك من بعد الملكه والله كانك تتكلم عن همومي وعن علاقتي مع خطيبتي

لازم تخلي قلبك حجر و تثقل من كل قلبك حتى لو ارسلتلك رساله غرام لا ترد عليها
واذا عاتبتك قولها مشغول شوي

يا جماعه ترى البنت اذا شافت الرجل يحبها و مخليها هي محور حياته ترى تعتبره ما عنده شخصيه تفكر
تقول اذا هذا ميت علي يعني اكيد ما يستاهلني

والاخت الي تقول المصارحه ترى ما تنفع ابدااااااااااااااااااااااا
والبنت الي عندك ترى من النوع الي كل ما تقرب عليها تبعد عنك
وكل ما تبعد عنها تركض وراك





تجربه شخصيه:

جت فتره قبل مده كنت ارسل لخطيبتي رسائل بالهبل يعني كل شي يصير وياي ارسلها اياه
ورسائل غزل وحب وهدايا و كنت اكلمها كل يومين ساعه مع ان اهي ببلد و انا ببلد ثاني يعني المكالمات مكلفه
هي مره وحده اتصلت تخيلو 7 اشهر خطوبه مره وحده اتصلت!!!!!!!!!!!!
كانت تصدني و جفا بشكل مو طبيعي و لما اكلمها تكلمني بدون نفس و داومت على هالحال يمكن شهر و انا متحمل

الى ما طفح الكيل قمت مره وحده قطعت اتصالاتي عنها لا اتصال ولا مسجات و لا ايميل
بعد اسبوع حست اني ما اتصل قامت ارسلت مسج حب ما رديت عليها بمسج (كنت معودها ما ترسل مسج الا انا ارد عليها)

بعد يومين زياده ارسلت مسج عتاب بعد ما رديت

قامت خلت الرساله الشخصيه لايميلها عنوان اغنيه اعتقد لنجوى كرم عنوانها راجع تسأل عن مين بتقول بحبك لمين
الغنيه باختصار تقول اني نسيتك

بعد انا مطنش و بعد يومين تقرييبا اتصلت عليها كانه مافي شي و لا كاني زعلان وانا متعمد اتكلم كانه مافيه شي
ابيها تحس انها مو بذيك المكانه انها تقدر تكدر خاطري و ابيها تحس انها مالها هذاك التاثير على حياتي بس لو كانت تدري انا شنو سويت حتى اصبر هالمده كان ضحكت علي

المهم تكلمنا عادي كانه مافي شي وبعدين سكرت

بعد المكالمه على طول جاني مسج مكتوب فيه "اموت فيك"

ما رديت

و قطعت المسجات حتى لو هي ترسل

الحين علاقتنا انا اكلمها متى ما يعجبني و هي بس تبي ترضيني باي طريقه
بمسجات برسائل الايميل حتى صورها ترسلي اياهم بالـ
MMS
انتهى


يا جماعه لا تفهموني غلط و الله العظيم اني احبها واموت على التراب الي تمشي عليه
وكلامه لو شنو ما تقولي لو تسولفلي عن اسخف شي بالدنا احس نفسي منشد لكلامها

و اتمنى اني اقدر ادلعها و خاطري الفها بحرير و اخبيها عن عيون الناس و اشتريلها كل الهدايا الي فالدنيا
بس للاسف اذا هي ما تقدر هالشي و تعتبره ضعف منك او تعتبره واجب عليك تسويه انا شنو ردي؟؟؟؟؟؟

للاسف ما لقيت حل غير اني اجافيها و ما اخليها تشبع دلع
اككبر غلط انك تدلع مرتك زياده عن الزوم



ملاحظه انا ما اعم هالشي على كل البنات بالعكس في بنات و الله اذا تعطيها كلمه حلوه ترجعلك اياها عشره