منتدى عالم الأسرة والمجتمع - عرض مشاركة واحدة - حياتي تنهار امام عيني
عرض مشاركة واحدة
قديم 28-11-2010, 04:44 AM
  #9
أم سلطان1
كبار شخصيات المنتدى
 الصورة الرمزية أم سلطان1
تاريخ التسجيل: Sep 2010
المشاركات: 2,977
أم سلطان1 غير متصل  
الله يعينك يا أختي هاذي هي مشكلة بعض شباب اليوم يتزوج ومايبغى يشيل هم المسؤليه إللي عليه أنا أشوف إن أفضل شئ تجلسين عند أهلك حتى يجي إجازه ويتفاهم معاه أبوك على البيت وإذا أنتي عارفه إن ظروفه الماديه أو راتبه ضعيف فلازم تصبري أنت عارفه اليوم الإجارات نار وأنتي تقولي توه متوظف يعني أكيد إن وضعه مو ذاك الزود يمكن إن راتبه مايساعد يفتح بيت علشان كذا سكنك عند أهله أنا عارفه إن الوحده دايما نفسها في بيت لحالها وبتاخذ فيه حريتها وتتصرف مثل ماتبغى أنت من حقك تطالبين ببيت لك شرعي
بس أحيانا تكون ظروف الزوج صعبه بالذات إذا كان توه طالع من مصاريف عرس وأكيد عليه ديون أو قروض وطبعا توه متوظف فلازم تراعي ظروفه مو من أول عاصفه في الحياة تتركينه أختي إذا الزوجه أحبة زوجهاوهوأحبها يعتبر قلب كل واحد سكن وبيت لثاني وياما حريم ساكنين عند أهل أزواجهم وعندهم ثلاثة وأربعة عيال وعايشين ومرتاحين أنت عارفه بعض المشاكل لابد تحصل من أهل الزوج أنت توك عروس وماعندك عيال يعني باقي ماعندك مسؤليات كبيره وشئ أكيد إذا كنتي قريبه من زوجك إن شاءالله تغيريه
وأنت بمعاملتك معاه وحسن عشرتك وتفاهمك معاه أكيد إنه بيرجع يحقق لك إللي تبغينه منه اما إنك جالسه عند أهلك
ويابيت أو طلقني ليش كذا أنت بكذا بكلامك هاذا تزيدين عناده وكلهاكوم وكلمة طلقني كوم وأنتم بعدكم عرسان خلي عقلك براسك وإذا زوجك أنت تقولي ماتعرفي شخصيته كيف بتعرفيها وأنت جالسه عند أهلك حبيبتي تبغين تعرفين شخصية زوجك وتعامله خليك جنبه وعينك في عينه مو أنت بديره وهوبديره وتقولي شخصيته ضعيفه يسمع كلام أهله لاتنسين إن البعد يولد الجفاء والقرب يولد المحبه سكنا مع أهل أزواجنا وعندنا عيال والحمدالله إذا إحترمناهم إحترمونا وقدرونا وطلعنا بعد تحسن ظروفنا وحنا نبكي على فرقاهم
ولحد الآن أحن على أيام جلستي عند أعمامي لأن هناك ذكريات لاتنسى ممكن هناك بعض المشاكل ولاكن أعتبرها ملح الحياة أهم شئ إحترام أهل الزوج بالذات أمه وأبوه وصدقيني إذا عاملتيهم بإحترام إنه راح يحبونك ويعزونك صراحه أنا أذكر عمي أبو زوجي كان لوجلس على سفرة الأكل وماشافني قدامه ماياكل ويقول لبناته وين فلانه قالوا الحين تجي يقول لا أحد يمد إيده ياكل قبل لاتجي فلانه يقصدني وبصراحه حتى بناته كانوا يغاروا من تعامل عمي وزوجته معي وكان قبلها زوجي قد أستأجر بيت في منطقة عمله بس سأت الظروف وكان عليه دين قال له أبوه جيبهم عندي في البيت حتى تتحسن ظروفك وبعدين شيلهم معك
أذكر يوم سافرت من عندهم عمي أبوزوجي ودعنا هو وزوجته وقال لزوجي جيت تاخذهم عقب ما تولعنا في عيالك وعيونه أدمعت أذكر زوجة عمي كان عندي ثلاثة عيال كان إثنين منهم مايناموا إلا بحضنها ولوالواحد منهم مريض ماتنام اليل أنا أمه ما أسهر عليه كثر جدته عسى الله يحفظهم لنا
وأنا أنصحك نصيحه إنك تعيدي تفكيرك زين يا أختي والله إني مادخلت إلا رايده مصلحتك إذا كنتي تعرفي إن إمكانيات زوجك زينه ووضعه المادي ممتاز فلك حق تطالبيه في بيت لك لحالك أما إذا كنتي تعرفي إن وضعه مايساعده فإصبري وإن شاء الله ربي يفرجهاعليكم من أوسع أبوابه ويرزقكم من حيث لاتحتسبون وتحققون ماتصبوا إليه أنفسكم أختي الحياة الزوجية تحتاج صبر وتضحيات في سبيل من نحب أتمنا أن تشيلي كلمة طلاق من قاموسك وتحلين هاذا الإشكال بجلسة تفاهم وهدوء أنت وزوجك وأنتما مازلتما عرسان فيجب كل واحد أن يعطي الآخر فرصة كي كل منكما يفهم الثاني أكثر أتمنا لكي حياة سعيده وأرجوا أن لاتتضايقي من كلامي
لأني والله ماقصدت إلا الإصلا ح في حياتك وأردت نصحك حتى لا تهدمي بيتك ومستقبلك .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله