السلام عليكم ورحمة الله وبركاته
أختي الغالية صعب تفهميني
ما شاء الله لا قوة إلا بالله باين عليكي إنك بنت عقلها أكبر من سنها وهذا الشي كتير حلو ومميز
غاليتي عجبني فيكي اعترافك بالغلط وهذا أول الطريق الصحيح بإذن الله تعالى
الحمد لله إنك انتبهت على نفسك وما انجرفتي أكتر لأنك أكيد بتعرفي كم من البنات إلي انضحك عليهن وضاع مستقبلن من وراء هالأشياء فاحمدي الله انو نجاكي على خير
متل ما قلتي بالضبط كل الشباب إلي بيحكو مع البنات على النت كذابين وكل كلامن الحلو والمعسول كذب بكذب
وعمرك لا تصدقي يا حبيبتي انو أي شاب قال لفتاة انو بيحبها بهالطريقة رح يكون صادق وحتى لو حلفك
لأنو الانسان إلي ما بخاف الله وبيتسلى بأعراض الناس بيكون أكبر كذاب
انتي غلطتي كتير لما عطيتيه الصورة بس لا تغلطي أكتر وتصدقي كلامو وانو بحبك ورح ينتحر أو من هالخرابيط إلي بيقولوها الشباب لكل البنات
حتى انتي يا صغيرتي ما حبيته ولا شي بس يمكن يكون عندك نقص اهتمام من عائلتك وحاولتي تعوضيه بهالأشياء
لأني لاحظت انك ما ذكرتي امك وأبوك أبدا بالموضوع ويمكن يكونوا عن غير قصد منهم أو بسبب مشاغل الدنيا انشغلوا عنك شوي فبالتالي حسبتي انو محبتن إلك قلت فحاولتي تعوضي هالشي بالكلام مع الشباب
حبيبتي أنا الآن بدي قلك على طريقة اذا اتبعتيها رح تنحل مشكلتك بإذن الله تعالى
بس بدي وعد منك انك تلتزمي فيها وأنا رح كون معك أول بأول
أولا اقطعي مكالماتك مع هذا الشاب فورا ونهائيا وبدون رجعة
تانيا ارجعي اهتمي بصلاتك وقراءتك للقران حتى لو بدأتي بالقليل
تالتا ارجعي وبهمة ونشاط على دراستك والتفتي الى دروسك واثبتي للجميع انك كنت ولازلت الفتاة المتفوقة والمثالية
رابعا خبري أمك أو أختك الكبيرة ضروري جدا جدا بموضوع الصورة مشان إذا حاول الشاب لا سمح الله يهددك فيها يطلع تهديده على الفاضي وأنا متأكدة انو هو أصلا واحد جبان وما بيقدر يعمل شي بس الاحتياط واجب
خامسا اذا شاكه انو فيكي عين مع اني ما بعتقد لأنو حالتك إلي بتحكي عنها بتجي للإنسان لما بيبتعد عن ربه ولما بيكون عنده فراغ بس مع هيك بقلك استمعي للرقية الشرعية اكتبي بالانترنت ورح تطلعلك على طول كل يوم اسمعيها وبإذن الله رح تفيدك كتير لأنك متل ما بتعرفي انو القرآن شفاء من كل داء
سادسا وهالنقطة كتير مهمة اشغلي وقت فراغك بأشياء مفيدة (تطريز _ تعلمي الطبخ مع ماما _ ارسمي اذا بتحبي _ اسمعي اناشيد _ العبي رياضة _ اقرأي قصص مفيدة _ اتفرجي على التلفزيون على أي شي مفيد يعني برامج دينية واجتماعية أفلام وثائقية )
يعني بالمختصر في مية شغلة مفيدة أهم شي انك
تبتعدي عن الانترنت نهائيا يعني لا ألعاب ولا مسن ولا أي شي يتعلق بالانترنت
وأخيرا بقلك لا تخافي من شي طول ما انتي بتحبي الله تعالى وبتخافي من عقوبته وبهمك رضاه فهو رح يكون سبحانه وتعالى معك ورح يحميكي بإذن الله من كل سوء بس انتي لا تضعفي
آسفة غاليتي أطلت عليكي كتير بس من خوفي عليكي
الله يحفظك ويحميكي
طمنيني عليكي

__________________
اللهم اشف أخي شفاءا لا يغادر سقما
أسأل الله العظيم رب العرش العظيم أن يشفيك يا أخي