الأخت الغاليه نور الإيمان دائما مبدعه في مواضيعك ولا أخفيك سرا بأني مررت على موضوعك مرتين وقرأته وقرأت جميع الردود إلا إني ماكتبت مشاركه لأني شفت الموضوع خاص بالموظفات فقلت خلني نقرآه ونستفيد من الردود فيه بس بعد ماسمحتي لغير الموظفات بالمشاركه حبيت أشارك طبعا أنا لست موظفه ولا كن الحمدالله زوجي فاتح لي رقم حساب بإسمي في نفس البنك إللي فيه حسابه وعنده هو هاتف مصرفي خاص فيه وأقسم بالله حتى رقم الهاتف مايعرفه لأنه طلب مني أشترك له فيه وجيت أعطيه رقمه قال خليه عندك ومن يومها أول ماينزل راتبه يقول لي سددي فواتير الكهرباء والإتصالات وحولي المبلغ إللي ينقصك على حسابك والباقي خليه رغم والله إنا لو نزلنا السوق وأشتريت شئ يقوم هو يحاسب فيه أو أرسلت معه في شئ يجيبه من عنده ما عمره قال مصروفك أو إللي بحسابك وينها طبعا أنا أحول مبلغ طيب حول ثلث راتبه لأنه صراحة أنا زوجي الريال لوبقي في حسابه يصير عدوه أي شئ يشتريه حتى لوماله لازمه ومو ضروري وياما أختلفنا على طريقة
إنفاقه للمال دايما لوراح السوق بلحاله يجيب أشياء مامنها فايده ولا أطلبها منه ومثلا لوأشترى شئ وجاء فيه عيب ما يرجعه إلا بعد محاولاتي معه بشق الأنفس يقول خلاص خليه نجيب بداله أقوله وش أسوي فيه يجيب لي أعذار من راسه علشان كذا صرت أحول ثلث راتبه لحسابي وأسوي منها جمعيات مع جاراتي وصديقاتي أسوي كشف باسماء الحريم إللي داخلين جمعيه معي وأنظمها وأحط كل واحده منهم بشهر تستلمها طبعا لمدة سنه كامله دوريه كل شهر عند واحده نعطيها طبعا بعض الحريم تدخل بمبلغ لزوجها وبعضهم لولدها أو أخوها والحمدالله رب العالمين أستلم مبلغ طيب وهاذي السنه أستلمتها وشريت فيها سياره وبعدهاإن شاءالله أخطط على قطعة أرض وطبعا لو نقص عليه فلوس أوعنده ظرف أعطيه صرافتي يسحب منها إللي ناقصه
و يرجعها لي وماعمره جابها لي إلا والوصل حق السحب معها رغم إن الفلوس إللي بحسابي من تعبه بس دايم يقول أنت أحرص مني على الفلوس ما تلعبي فيها مثلي والحمدالله ميزانية البيت دائما أنظمها له وأسجل كل إللي أبغاه بورقه ونروح نجيبها من الهايبر وإلباقي مصاريف عيال وطلعات وطبعا لا يخلو راتب زوجي من القروض عليه قروض بس الحمدالله راتبه زين ويغطي أما بالنسبه للفلوس إللي عندي أوفرها وقت الزنقات والظروف وكمان عندي إخوان وأخوات أيتام أساعدهم أحيانا بللي أقدر عليه والحمدالله الأمور ماشيه وطبعا
لوأنا أنفقتها في مكياجات وعطوارات وملابس وحفلات وهدايا كل شهرأتوقع إني ما راح أكون من إخوان الشياطين إلا منهم آخذ إللي ينقصني بس بحدود المعقول أما إذا كل مانزل موديل أوماركه أو شئ جديد أركض ورآه هذا غلط وتبذير وإسراف أنا آخذ العطورات والمكياج ولوازمه ماركه بس بحدود المعقول يعني أخذ شئ يكفيني ثلاثه شهور أو أربعة شهور وبعدما تخلص أجيب غيرها والملابس كذلك لاكني أنا أعرف بنات موظفات وغير
موظفات كل شهر مع الراتب نازله السوق وش تبغى تدور الجديد الموضه والجديد والموضه هاذي بتنظف حسابات البنك وتطفر بها وبزوجها بأول أسبوع بالشهر أحيانا سؤ التدبير ومجاراة الناس في المظاهر تكون وبال على الرواتب لكل الجنسين قد تجدي الواحده من الموظفات تغير جوالها كل شهر أو لاب توبها أوأي شئ بسب الموضه والجديد وكمان عندك الإكسسوات هاذي أحسها أكلت رواتب البنات الوحده تشتري ذاك الطقم بذيك القيمه وتلبسه مرة واحده بس على فستان أو تنوره وبعدها ترميه بالدولاب هو وفستانها وبلوزتها بحجة صديقاتي والناس شافوه ماعاد يصلح ألبسه مرة ثانيه ولوإنها تشتري بدل الإكسسوار طقم ذهب كان أفضل لأن الذهب معروف ينلبس على أي شئ بالذات الآن جابوا تصاميم جديده والوان حلوه وبنفس الوقت لوصارت عليهاظروف تقدر تبيعه لأنه سعره فيه
وتفك أزمتها وكمان يكون وسيله تحفظ فيها فلوسها طبعا مو كل النساء بهذا الشكل لا أنا أعرف حريم موظفات ما شاءالله عليهم عندهم عقارات وشقق مأجرينها وكمان أراضي وعندهم محلات وإستثمارات ومايعرفوا الترف والعبث والتبذير بل هناك منهم كافلات أيتام بارك الله لهم في ما أعطاهم ورزقهم أنت يا أختي سألت سؤال واحد وأنا شكلي ملئت لك صفحه بس تستاهلين أنت سمحتي للي بدون رواتب يكتبوا وأنا كتبت وحضك إن ولدي اليوم تعبان مسخن يصيح وإلا كان كتبت لك مؤلفات في الرواتب وين تروح وأنا بصراحه لو أنا موظفه بسدد ديون زوجي إللي عليه للبنك وأشتري له السياره إللي يحلم فيها هديه وأخليه يقدم تقاعد ويرتاح بعد مشوار ثلاثين عام بالخدمه العسكريه يستحق الراحه بعد هاذا العناء وأنا مستعده أخدمه بعيوني بس هاذا مجرد أحلام ويامحلا الأحلام الله يحقق لك أحلامك يانور ويسعدك دنيا وآخره وأسأل الله أن يكتبنا وإياكم في علين الله يحفظك ويخليك لنا يارب ولايحرمنا من أفكارك ومواضيعك الحلوه والشيقه دمتي في رعاية الله .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله