إذا كان عصبي إذا سكتي فتراه بيزيد في رفع صوته ونجرته لاكن أنتي أمتصي زعله بطريقتك طبعا لما يرفع صوته ويعصب عليك أنت هدييه وسمعيه كلام طيب وحلو مثلا تامر أمر أبشر مايصير إلا إللي يرضيك لاتعصب حبيبي من لي غيرك بتتعب صحتك ونفسيتك أهم شئ صحتك أنت كذا تتعب موزين العصبيه والزعل حقك إللي تبيه أسويه من عيوني لك أهم شئ رضاك والله إني ما أحب أشوفك بهاذي الحاله كل شئ يهون عندي إلا زعلك وشوية كلام زياده حلو وأبتعدي عن أساس المشكله أو تناقشيه فيها حتى يهدأ وتهدى نفسيته يعني أجليها لوقت يكون رايق اما بالنسبه إذا كان غير عصبي ألتزمي الصمت أفضل حتى يفرغ مافي جعبته أنا بقول لك موقف حصل لي قبل يومين زوجي أتصل عليه من العمل وقال لاتسوين غداء خلي العيال
يجون من المدرسه وأنا جاي بأتسبح وأغير ونطلع نتغدى بالمطعم المهم جو العيال من المدرسه وتسبحوا وغيروا لبسهم وتجهزوا بسرعه لأنهم أولاد الولد بسرعه يجهز مومثل البنت طبعا عندي ثنتين بنات صغارالله يخليهم البنت لازم تسريح شعرها وبكلات وشباصات وطبعا لبس كشخه وعندنا برد بجامات وملابس وجاكيت وخلافه المهم تأخرت بتجهيزهم وزوجي جهز نفسه وأخذ الشباب ونزل لسياره وأنا حوسه أنا وبناتي والله إني جلست حول ساعه وأنا أجهز وأتجهز والرجل ملطوع بالسياره وأرسل واحدمن عيالي يقول أبوي يقول يالله بسرعه عاد أنا أعطيته البنات قلت نزلهم معك طبعا أخذهم ونزل فيهم لسياره وأبوه يدقدق الجوال يدق عليه بس أنامطنشه مارديت عليه ويدق بوري السياره وجهزت ونزلت بعد حول نص ساعه والله يوم ركبت السياره إلا والرجل فل أوبشن شوي وينفجر لما مشى بالسياره قال ساعه كامله تتجهزين متى يمدينا نوصل المطعم الحين بعد شوي يأذن العصروأنتي ليش ماتجهزتي من بدري المهم خليته يهذري إلين خلص إللي عنده طبعا وصلنا المطعم وانا في داخل نفسي عارفه إني غلطانه ميه بالميه بس مدري ليش ما أحب أعتذر منه إلا نادرا طبعا طلب الغداء وجاء قال لي وش تبغين عصير أطلب لك قلت له إللي يجي ولا خله ماله داعي شفته جاء حولي وأنا جالسه وباس راسي وقال شكلك زعلانه مني معليش أنا آسف والله ماعاد أكررها لوماعجبك المطعم أغيره الحين ما أحب نجلس نتغدى وأنت حاطه في خاطرك مني قلت له أنت أول شئ ما عطيتني خبر من بدري ثاني شئ أنت تعرف بناتك الواحده يبغى لها ساعه لحالها علشان تجهز طبعا تراضينا وطاح الحطب والحمدالله أنا وزوجي ماعمرنا زعلنا من بعض زعل كايد أو يطلع من البيت وحنا متزاعلين على شئ نزعل ونتسامح بسرعه وزوجي ماشاء الله عليه قلبه طيب ومايحمل عليه بشئ بس أنا صراحه أحيانا ما أحتمل وأنفجر عليه بس كمان هو يسكت وقتها وبعد ما أهدى نتراضى والحمدالله لو حصلت مشاكل تكون بسيطه جدا ولا تأثر في حياتنا بشئ أختي الغاليه إفعلي كما نصحتك إذا كان عصبي سوي مثل ماقلت لك بالأول أما إذا كان يزعل زعل بارد يعني بدون نرفزه ورفعة صوت فأستخدمي الصمت حتى يهدأ وبعدها تفاهموا بجلسه هادئه مع دلة قهوه أو كوبين عصير أو كبتشينووشوفي كيف تصير حياتك أنا طولت عليك واجد أتوقع إن ردودي دائما طويله بالمنتدى بس أسأل الله أن أكون أفدتك بشئ وأتمنا لك حياة زوجية سعيده.

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله