ياحبيبتي

لاتخافي ولا تحزني بالعكس افرحي وابتهجي

واحمدي الله جل في علاه في اليوم مليون مرة

ياحبيبتي هذه السفرة كانت خير عليكم باذن الله لانه زوجك اتعلم منها حاجات كثير

احيان الانسان يكون محتاج للتجربة بنفسه عشان يتعلم

وبالاخص الرجال احيان كثيرة تحسي انه الرجال اذا حط شي في باله مايرتاح الا لما يسويه

وبعد ما يصير تبدأ النتيجة في الظهور وانا اتكلم عن الامور السلبية فبالتأكيد تكون النتيجة غير مرضية بالنسبة للزوج

لكنه يتعلم منها حاجات كثير اولها يتلاشى تعلقه بالشي هذا سواء سفر او غيره زي مايقولوا كذه دمل وفقشناه

ثانيها يفهم ويتعلم انه كلام زوجته صحيح وانه السفر من غيرها مااايصلح وفي النهاية مايصح الا الصحيح

ثالثها يحس بالذنب وتأنيب الضمير تجاه زوجته حتى لو ما كان مسوي شي غلط يكفي انه يفكر انه سافر واستمتع من غيرها وهي مسكينة جالسة في البيت لحالها مع الاطفال او يفكر انه صرف فلوس زوجته وعياله اولى فيها وحاجات كثير يفكر فيها الرجل تخليه يندم على هالسفرة مو شرط يكون شي غلط

اما انه يتجنبك ويتحاشاك فشي طبيعي حبيبتي الانسان اذا حس نفسه صغير في عين اغلى انسان عنده وقتها ما يقدر يطالع فيه وتجي عينه في عينه يقوم يتجنبه

شوفي انا ما اقدر اجزم انه زوجك غلط ، لكن الواضح انه حاسس بالذنب انه سافر ، بغض النظر عن الاسباب وهذه نقطة في صالحك انه باذن الله ماراح يكررها وكان لازم يجرب بنفسه عشان يقتنع وما يجلس يزن عليكي كل يوم بسافر بسافر

زوجك الآن محتاجك ، عدم تكرار السفر وندمه على السفرة نتيجة لها ضريبة لازم تدفعيها حبيبتي
لاتفكري في نفسك وانك تستني منه الشوق و ...الخ

انسي انك ضحية ، وفكري في زوجك اللي هو الآن بأمس الحاجة لك

واضح انه حاسس انه ظلمك ، وانه ما يستاهلك ، وانك انسانة عظيمة ، وانه فقد ثقتتك فيه ، عشان كذه مو قادر يواجهك

دورك الآن انك تأكدي له انه مازال الزوج العظيم الحبيب الكبير في نظر زوجته ، واللي مهما سوى ومهما عمل ومهما مر فيه من ظروف تظلي انتي زوجته الحبيبة اللي ماتتخلى عنه ابد

حتى في أحلك واصعب الظروف كل الناس يتخلوا عنه حتى اصحابه واهله ، الا انتي ماتتخلي عنه

لازم توصلي له هذا المسج

وفي نفس الوقت حبيبتي الجأي لله عز وجل وادعي انه يآلف بين قلبك وقلب زوجك