الله يسعدك يابيتا دنيا وآخرة يارب
حسيت حنان متدفق ينبع من كلماتك ومشاعر اخوية صادقة ورغبة خالصة في المساعدة وبذل الخير
الله يجعله في ميزان حسناتك يارب وما يحرمك الاجر

شوفي حبيبتي

هي تتبع معاه اسلوب غير مباشر مادري ليش هي تحب اللف والدوران تقول انها تخاف من المواجهة رغم اني لاحظت انه زوجها يحب الصراحة (اعرفهم الاثنين قراب مني)

المهم تقول انها تكتب رسائل في مسودات جوالها وهو يقراها من وقت للثاني وتكتب فيها كل اللي في قلبها وتتخذ اساليب مختلفة مرة انها تحبه مرة انها مجروحة مرة انها تحس باهماله

تقول حتى لو ما شفت نتايج المهم يوصله احساسي

انا احس انها محتاجة اكثر من كذه لازم يفهم انه الوضع مو تمام وانه ممكن يخرب بيتهم بسببه ، تقول مرة قرأ المسودات وقال لها مع مرور السنين انا كنت اعرف انك ذكية بس اكتشفت انك اذكى مماكنت اتصور ، وانك لئيمة اكثر مما كنت اتصور(يقصد انه حركاتها غير عفوية وانها تقصد من وراها شي معين)

حصل موقف وهم مسافرين ، اتصلت وحدة منهم والزوجة لمحت اسمها في الجوال ، وكانوا في السينما ، قال لها امي تتصل ودي اروح اكلمها ، ماردت عليه انقهرت من قلب ، عاد السؤال قامت ردت عليه روح كلمها بقهر وعصبية

وطول الوقت الدموع ماوقفت ، ولما شافها لقاها تبكي وعيونها حمرا مثل الدم ، قال لها ايش صار ؟ قالت انا شفت الرقم ، قال عارف انك شفتيه ، قالت له انا تعبت ، قال لها تعبتي مني ؟ قالت ايوة ، صار يعتذر ويقسم بالله انه يحبها ويموت فيها

تقول خلاص تنكدت السفرة ولا عرفت تنبسط بشي

ومن بعدها صار يمسح كل شي في جواله

******

تصدقي انا كمان قلت لها هو يستفزك يبغى يشوف غيرتك بس تقول انها تبين له غيرتها باستمرار وهو يقولها انتي غيورة وينبسط لما يشوفها تغار حتى من بنات التلفزيون تبين له غيرتها

*****

شوفي هو عارف انها متنكدة وتعبانة نفسيتها ، بس من ايش ؟ مايعرف

وهي تخاف تقوله السبب

كلام سليم ، هي تتنكد لكنها ماتقول السبب ، وهو يحتار ويحاول يراضيها في النهاية يتهمها انها انسانة نكدية

خوفها منه يقهرني ، تقول ما اخاف منه شخصيا بس اكره الجدل والمشاكل ، وبصراحة هي عودته على السكوت والرضا بكل شي ، فلما تحاول تتكلم معاه على طووول يقولها انتي تغيرتي وصرتي ترفعي صوتك وماتحترميني

تقول كيف احترمه وهو اصلا نزل من عيني ؟؟

احس جواها فيه صراع نفسي الله يعينها