و الله اختي الفاضلة واضحه لكن سأحاول الشرح أكثر
و لكن سأطرحها كقصة
بينحكى إنه كان هونيك إم و أب وعندون ( بنوته زي القمر) و ( ولد زي الشمس )
كبرت البنوته وصارت ( صبيه عين الله عليها ) و كبر ( الولد و كان كله شبوبيه )
و لأن الصبيه و الشب ما أسسن الإم و البي بشكل ديني صحيح
مشيو بطريق الشيطان و تعرفت الصبيه ع شب يخزي العين شو مهضوم
و تعرف الشب ع صبيه عين الله حواليها شو بتجنن
يوم من الأيام كانت الإم جالسه بأرض ديار فسمعت ضحكات إبنها
فسارت تتسحب بدا تعرف لشو و من شو عم يضحك و قربت إدنا مـ الباب
فسمعت إبنا عم بيغازل صبيه فإمه زعلت فقالت ( عيب عليك يا إبني ) و هيك الأم عملت الي عليها
بعد شوي صارت الأم عم تسمع ضحك من أوطيت بنتا فقربت من باب غرفتها فسمعتها عم تحكي كلام كله حب و غرام
فدفشت الباب بإجرا و فاتت على بنتا و قالت ( ربي يبعتلك سوى نار وبارود وهوا وحريق وغريق وموته بالطريق وصياح ونياح وهز رماح وكومة دين وغضب الوالدين وداء السبع سنين تفوت من خرم الابره تلاقيه تخين )
و سمع الشب أمه بتسبا لأخته ففز من مكانه و قال لرفيقته ( حياتي بحاكيك بعد شوي )
و دخل على إمه و أخته و هو عم يضرب أخماس بأسداس و ومضوج وما بيعرف شو صاير
فعرف إن إخته عم بتحاكي شب فقام سبا و قال شو شايفه البيت ( سري مري ) و ضربها
و إمه وراه عم بتقول إيه ( فش نيعك منا ) هاي ما عم تستحي عـ وجا
و بعد إجا بيون و قالت له الإم شو عملت بنته فـ انطمز البي فقام ضربها
وما قالت الإم للـ البي شو عمل إبنه لأنه يقبر قلبا شب و ما بينخاف عليه وما بيلطخ ( شرف العيله )
وحتى لو قالت له ما راح يعمل شي لأنه رجال وكله شبوبيه و ما بينخاف عليه
وهيك إنتهت الحتوته
و من بعدا صار الشب بيغازل بيزني يطلع في النسوان عمال على بطال ما فيها شي
( لإنه أول باشتان متل ما قال عضو هون الرجل بمليون شرف وتاني باشتان رجال ما بينخاف عليه )
بس الصبيه تعمل متل الشب حرام و عيب ( لإنه أول باشتان ما عندا غير شرف واحد و تاني باشتان بتلطخ سمعة العيله )
و بنفس هاي الطريقة تربى كل أهل ضيعه .
و صار فكر أهل الضيعه و عاداته مقدم على فكر الشرع و تعاليمه
( و صرنا عايشين بضيعه ضايعه )
المصطلحات الواردة بالقصة
يخزي العين شو مهضوم :- منعاً للحسد فدمه خفيف و حليوه
عين الله عليها :- تحميها لأنها حلوه و صاروخ
شبوبيه:- متعافي و صحته عال العال
أرض ديار :- الحديقة داخل المنزل
أوطيت :- غرفة
دفشت:- فزرت - دفرت - فتحت الباب بقوة
إجرا :- رجلها
ربي يبعتلك سوى نار وبارود وهوا ... :- دعوه قويه و تخوف
سري مري :- رايح جاي
فش نيعك :- إنتقم و أظهر غضبك وغلك
انطمز :- إنقهر
أول باشتان تاني باشتان :- طريقة في عد أسباب و توضيحها