حبيبتي روح .. عاش من شافك يالغاليه ..
قبل كل شيء احب اقول لك .. لا تصدقين أي وحده تقول لك انها مطنشة زوجها ومرتاحه ... والدليل انها لو بس تحس
ان زوجها يدور غيرها بتحرق الدنيا .. فأبدا ابدا لا تصدقين هذا الكلام ... اللي تطنش زوجها وتقول انها مرتاحه بتشوفينها
تكثر في التسوق ... تاكل كثير ... تضحك بسبب ومن دون سبب ... تتكلم عن قوتها ومواقفها البطوليه وغيرها من الامور
اللي تثبت عدم ارتياحها لكنها تتصنع القوة واللامبالاه في الزوج ...
ثاني شيء .. انا استغرب من أي وحده تتزوج تغير اسلوبها وحياتها وهواياتها واهتماماتها .. وهذا التغيير هو اللي يسبب
المشاكل بين الزوجين بدون ما تحس .. ليش اتغير وشو اللي اسويه في فترة العزوبية ما اقدر اسويه وزوجي موجود معي ؟
والحين نجي للجد ..
شوفي حبيبتي ... الغلط من البداية كان منك ... حطي نفسك مكانه .. وانتِ اللي كنتِ اتكاليه .. شو هو الشيء اللي
بيخليك تعدلين تصرفك وتصبحين انسانة مسئولية ؟ وطبقي على زوجك ...
مسامحتك وتساهلك مع زوجك خلاه يتمادى ويزيد في الكسل والاتكاليه .. حتى لو احيانا تكونين جادة في تنبيهك له .. هو
متأكد ان من داخلك انتِ مو جادة ويقدر يلين راسك بأي حجة ..
تفكيرك الحين سلبي حبيبتي ... ليش تبين تكرهينه ... وليش تبين قلبك يكون قاسي؟ انتِ بتعبين نفسك اكثر ... لانك
بتكون كل تصرفاتك مصطنعة .. الطيبه نعمه .. والمسامحه نعمه .. والصبر نعمه .. والله انعم عليك بكل هذا النعم ..
بقولك شيء مهم في الرجل الجنوبي ... تراه ما يمشي الا بالاوامر ... ولا يمشي معاه التنازل ... وهو سهل التعامل معاه
لانك بتلعبين دور القوية ... عكس الشمالي اللي لازم تلعبين معاه دور القوة والضعف ..
وهو طيب .. فتعاملي معاه من هذي الناحية .. مثل ما يطلع لك حجج ... طلعي له حجج علشان يسوي الشيء اللي تبينه..
هو فيه برود لان حياته خالية من الاكشن ... عطيه مسئولية .. وحمسيه وشجعيه عليها ... هو يحب الاهتمام والحب لكن
باعتدال لانك اذا خليتيه شغلك الشاغل وتفكيرك كله منصب عليه ... بيعتمد عليك حتى في تقديم الحب ..
وانصحك يالغاليه ... الطيبه تلين وتجذب كل القلوب واقولك عن تجربة ... فلا تتركيها وتقولي عن نفسك ساذجة ومغفلة ..
صدقيني هو يحبك ويحب طيبتك ... بس يتهرب لانه عارف انك على حق ... واغلب الرجال جذي ..
حبيبتي روح ... خليك على طبيعتك وغيري السلبيات وحافظي على الايجابيات .. لا تغيرين زوجك ولا تغيرين نفسك ..
هو اسلوب او تصرف لازم تتعلمينه علشان تكون حياتك افضل ... الحين عرفتي ان زوجك اتكالي وانتِ متساهلة معاه ..
يعني تصرف غلط ... صححي التصرف هذا ... اعطيه مسئولية صغيره وشوي شوي كبريها ... وامدحيه اذا نفذ الشغل
اللي طلبتيه منه ...
وما يمنع حبوبه انك تهتمين بنفسك وهواياتك وتعليمك وزوجك معاهم ... صدقيني بترتاحين ... بإذن الله لكن اكرر لك
لا تصدقين أي وحده تقول لك .. انا مطنشة زوجي ومرتاحه ... لان التطنيش مثل المسكن .. يهدي لكن ما يداوي ..
والله يريح بالك ويسعدك ويهدي زوجك يارب .. تعودت منك الحكمة حبيبتي .. فإهدي واذكري الله .. ان شاء الله فترة
وبتعدي ... ربي يحفظك يالغاليه ..