الأخ أبو سعود بارك الله فيك ياخوي ماعليه الصبر زين ولأجل عين تكرم مدينه علشان زوجتك تحمل بصراحه بالعاده الزو ج يشتكي من أم زوجته وتدخلاتها لاكن أنت عمك ماخذ الدور كله الله يعينك عليه أحس تصرفات عمك همجيه بزياده لاكن حنا عندنا واحد راح أخذ بنته من بيت زوجها والبنت تحب زوجها وزوجها يحبها ومابينهم شئ متفاهمين بس أبوها أخذها غصبا عنها من بيتها بحجة ليش مايحط لها تلفون بالبيت وجاء الزو ج من دوامه مالقى زوجته بالبيت أتصل على أبوها يسأله قال له تبغى زوجتك تعال البيت ولما راح البيت أحتد بينهم النقاش وقام أبوها وإخوانها بضرب زو ج بنتهم وماشاله إلا الإسعاف من البيت للمستشفى وصل أمرهم لشرطه وحولوهم للمحكمه والقاضي حكم عليهم بالسجن وحكم إن البنت ترجع لزوجها وماتزور أهلها إلا يوم واحد بالأسبوع
وأبوها و أهلها مالهم شغل في حياتها أو بيتها أبد بس الولد زوج بنتهم طلع إبن أصل وسامح أبو زوجته و إخوانها وكل الناس لامو أبوها على تصرفه وقالوا له أنت غلطان بصراحه ياخوي أنا أ كره التدخل من قبل الأهل
من كل الطرفين بين الزوجين
وأنت ياخوي حاول تمدح فيه وتثني عليه وقول ل ياعم عندي زميل يشتكي دايما من عمه أبو زوجته يقول دائما يتدخل بحياتهم و مايحترمه و لايقدره
وسألني وقال ياخوي و ش الحل معاه وسألني قال ياخو ي أنت حياتك مثلي عمك مثل عمي قوله قلت لا وش جاب عمك لعمي عمي سيد الرجال و ماعمره تدخل بحياتي أنا وبنته و يحترمني ويحبني مثل ولده وأكثر و الظاهرأنت عمك من النوع إللي يحب الترزز والفشخره و يحب يسوي نفسه فاهم بكل شئ ويبغى إللي حوله يمشون على كيفه ومايحب شئ إسمه خصوصيه
ويبغى الكلمه الأولى له أهم شئ أنت عليك بزوجتك إحتويها وخلها تتعلق فيك أنت و تسمع كلامك أنت وتعليماتك أنت
علشان ماتتأثر ببيئة أهلها وكلامهم عنك وأنت خلك هادئ ولاتكشر بوجه أ بوها علشان مايقلب رأس بنته عليك وتصير مشاكل بينكم خلك عادي معاه
وخفف زيارتك لبيت عمك ولما تودي زوجتك عندهم إعتذرهم بلطف ورو ح عنهم وصدقني بعد فتره لما يجون عيال لبنته
راح ينشغل بأحفاده وماعاد يركز عليك في شئ وترى شئ أكيد مدام إنه زوجتك وحيدة أبوها أ كيد إنه يحبها ومتعلق فيها بعد وتلقاه يحس بفراغ في البيت من بعدها يعني لاتلومه إن شاء الله ربنا يرزقك الولد والبنت و تشوف حينها قد إيش تتعلق ببنتك و تحبها وماودك تفارقك لحظه ترى أنا عندي ثلاثه أولاد و بنتين وزوجي مجنون بناته حتى دايما أقول له بكره يكبروا ويتزوجوا ويروحوا عنك بعيد يقول لي أنا بكتب شرط بعقد الزواج حقها إن بنتي تسكن عندي للي يبغى يتزوجها
أقول له ليش يقول أخاف ينقصها شئ مايجيبه لها زوجها أو يزعلها بشئ ويضايقها وأزيدك من الشعر بيت كمان بيشرط على العريس مايتزو ج عليها مرة ثانيه علشان مايحرق قلبها بالضره أقول له ياالله عافنا إلين ذاك اليوم يجي الظاهر بناتك يجلسن بحلقك ماخذ بياخذهن و هاذي أ ولتها
يعني ياخوي حب البنات غير عن الأولاد وهم أكثر من بنت فما بالك بوحيدة أبوها وأمها وإخوانها وأنا أبوي الله يرحمه عنده عشرة أولاد ماشاء الله وست بنات كان يفضلنا عليهم بكل شئ حنا البنات حتى الفلوس لورحنا السوق يعطينا ضعف إخوانا الذكور و دائما يردد البنت مسكينه و ضعيفه مالها بعد الله أحد تحتاج إهتمام ورعايه فأنت ياخوي أخذت بنته وحيدته توقع كل شئ بالذات مع زيادة الجرأه والميانه الله يكون بعونك و يسهل لك حياتك
ويصلح عمك و يهديه و يصرف شره عنك أنت و زوجتك .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله