شوفي غاليتي..
بالنسبة لموضوع صرفه على نفسه وانتي تحرمين نفسك..

زوجك طيب ومو سيئ وقابل للتغيير.. مثله مثل اغلب الرجال.. إذا حس انه في مجال أحد يسد محله أتكل..

فالغلط غلطتنا أحنا..

بس ما عليك بقولك عن موقف بحياتي عشان تعرفين أنه الرجال إذا صاروا اتكاليين فهذا طبعهم..

وحنا نساعدهم.. لكن إذا وقفتي وقفة جد صحوا وتغيروا..

أول حياتي مع زوجي كنت له الكل بالكل.. مولعه له اصابعي العشرين مو العشرة..
حاطه له الشمس بيد والقمر بيد..
مدلعته على الاخر.. ما اتصور انه في أنثى سوت اللي أنا سويته له!!

تخيلي بالشتا أول مرة بحياتي أشوف برد وشتا الرياض كل يوم كنت اصحى من النوم قبل الفجر بوقت..
اشغل الدفايه بالحمام عشان يدفى الحمام وأوزن الموية عشان يتوضا بموية دافيه..
وبعدين اقومه للصلاة >>>>>>أنا مو ملزومة اسوي هذا كله!!

لكن تركت كل شي وتفرغت له هو وبس..

عمري مانكدت عليه ولا ارهقته بطلبات.. ماعمري قلت له عطني ولا أبي ..

أبوي االله يطولي بعمره ويخليه لنا فاتح لي حساب وكل شهر يحول لي رصيد..
فيعني عندي رد ومصرف خاص من ابوي.. بس طبعا زوجي مايدري عن ابوي..


اذا صار ودي بشي المح له او اطلب الشي منه مرة وحدة ولا اثقل عليه..
سواه لي الحمد لله ما سواه عادي بكيفه..

حسبالك زوجي تعلق فيني!!!

ما اقولك ما حبني.. لا يحبني لكن مو باللي أنا ابيه..

كنت احس أني اخر اهتماماته..

وش هي الاهتمامات؟
الاهتمام انه ودي بيوم يجيني يقولي يلا نطلع نغير جو..
ودي بيوم من الايام بنهاية الاسبوع يطالع وجهي ويقعد معاي..
(بس يوم مو كل نهاية اسبوع)..

ودي إذا طلبت منه شي.. وعنده قدره يجبه لي لو كان نفسي فيه يجيب لي ياه من نفسه..

طبعا كان كله بالاستراحة عند اصحابه مستحيل يقعد معاي بالبيت
إذا قعد بالبيت فهو نايم..

ودي يدخل علي بوردة .. ولا يفاجئني بشي احبه..

اقوله ودي احس باهتمامك فيني يقول أنا كلي لك

وين كلك لي وانت طووووووول الاسبوع عند اصحابك؟؟!!!

وين كلك لي وأنت راتبك كله مصاريف للاستراحة من قطة اجار وراتب الحارس
ومقاضي الستراحة من عشا ومن شواهي وسكر وقهاوي وادوات مطبخ من كاسات وفناجيل وبيالات ووو الخ

وانا مالي مصرف خاص..

كنت راضية لو 200 بالشهر!!!
ماتسوي شي الـ 200 بس على الأقل احس انه لي جزء من اهتمامه..

طبعا هذا كله داخل نفسي ماطلعت له ولا شي من اللي بداخل قلب..
كنت فقط اقوله مثلا : ودي اليوم تقعد معانا طبعا بدلع وبعدين على طول اضحك واغير السالفة..
بعدها بشوي يقول تبون شي أقوم ابوسه على خده واقوله سلامتك يا أحلى ريال بالدنيا.. ولا كاني طلبت منه يقعد قبل شوي..
اقوله وانت جاي أبي جالكسي .. وأشغل السوني واقعد ألعب ولا أحسسه أني تظايقت من تجاهله..

مرة من المرات شفت كرسي بإيكيا ومرررررررة دخت وانسطلت عليه..
فقلت له شرايك بالكرسي ؟
قال حلو وغريب.. قلت والله ودي فيه بس غالي..

((يعني اقصد لو عندك امكانية قول مايغلى عليك))..

((ولو ماعندك امكانية قول الشهر الجاي اجيبه لك ولايصير بخاطرك إلا طيب))..

أنا بوقتها ما كان عندي رصيد ولا كان شريته..
لاني خلصت رصيدي شريت غلاية براون ومكيفين سبلت
وأخته تزوجت وجبت لها هدية .. ومرت اخوه ولدت وجبت لها هدية..
طبعا هذا كله من الرصيد اللي عندي.. فخلص رصيدي..

المهم-

بعدها بيومين من (إيكيا وقصة الكرسي).. شفت بجواله رسالة لواحد من أصحابه يقول له حولت لك 2500 حقت مصاريف الاستراحة!!!

أنا أنقهرت الكرسي بـ 850 تحسفته علي .. والأستراحة تقط ولا تبالي!!!!!

طبعا خبيتها بنفسي ولا قلت..

صبرت صبررررررررت أليــــــــــن انفجرت ..

طبعا صار الانفجار بسبب مشكلة وقررت اني اتركه فيها.. المشكلة ماكانت كبيرة لكن انا خلاص ماعاد اتحمل.. اعطي أعطي واظغط على نفسي بدون مقابل..

هو انهبل انجن يترجاني اعطيه فرصة.. يحب أيدي يبيني أسامحة..
وأنا ثقلت عليه .. وكنت مصرة على موقفي..
طبعا هو طلع كل الكلام اللي كنت اتمنى اسمعه منه:

انتي كل شي بالنسبة لي..
أنا أموت بدونك.. أنتي إذا قررتي الطلاق فأنتي قررتي أنك تنهيني من الدنيا..
طز بالدنيا واللي فيها مدام انتي معي..

هنا بديت أطلع كل اللي بقلبي

قلت له بالله عليك أنا عمري قصرت عليك بشي؟؟
قال حاشاك..

قلت له :
كم مرة طلبت منك اهتمام؟؟
كم مرة طلبت منك انك تقعد معاي..وأنت تطنش وتسوي نفسك ما سمعت؟؟
كم مرة طلبت منك مصرف خاص.. ؟؟
ماعمرك سمعت انه نفسي بكرسي إيكيا؟؟ >>>>> ياذا الكرسي اللي طفشتكم منه
ليش ما قلت والله زوجتي مو مقصره معاي وتستاهل أجيبه لها؟؟


قال: لا بس كانت ظروفي ماتسمح!!!
قلت له ظروفك؟!!!
طيب حنا متى شفنا الكرسي؟؟
قال برمضان..
قلت طيب عطني جوالك..
عطاني ياه .. فتحت الرساله حقت القطة -وكانت برمضان-.. قلت هذي شنو؟؟
2500 للأستراحة .. وأنا 850 تقولي ظروفي!!!!

هو طبعا طايرة عيونه مو متخيل اني شايلة بقلبي كل هالسنتين ونص..

المهم-
أعطيته فرصة وتسامحنا وتعالي شوفيه الحين..

خلاصة القصة..
كل اللي كنت أتمناه يسويه من حاله قام يسويه..
- يقعد اسبوع 10 أيام ما يطب الاستراحة وإذا راح ما يتأخرالساعة 11 هو عندي..


-كل بين فترة وفترة شوفي الورود اللي يتنقاها لي.

- مصرفي الخاص 2500 كل شهر وساعات أكثر..

بيني وبينك بعض المرات يصير عنده ضغوطات وأقول حرام الشهر هذا ماني ماخذه منه شي.. حرام يكسر خاطري..

بعدين أتراجع واقول لا ليش ما أخذ وبعدين أعاتبه أنت ما سويت وما فعلت..
خلاص هو رجال وهو يدبر نفسه ..


الحين لنا سنتين مثل الحلاوة.. وأنا صرت له أكثر من أول..
عطني أعطيك ..


فزوجك على ماتعودينه.. لا ترحمينه وتخففين عنه المسؤلية وبعدين تطالبينه على شي هو ماتعود عليه..

بالاخير اتمنى اني قدرت اوصل لك أللي أبيه يوصلك..
وصدقيني اولا و اخيرا طالما انتوا مو مستقرين مو بسهوله راح يتعود على المسؤوليه..
لأنه مايمديه يتعود إلا وتغير نظام حياتكم.. فيرجع لطبعه..

ربي يوفقكم ويفتحها بوجهكم وين ماكنتوا
ويوفقك ويسخرك له ويسخره لك..

__________________
سئلت اي الرجال تحبين؟؟
قلت : من اختلط عنده الحب والخوف علي..
عذرا- ليس هناك حب كحب ((أبــــــي))