دايما نسمع لما يبغو يعيّبو على واحد يقولو عليه (تربية حريم) تزعلني الكلمة دي كتير. لانها غلط. الستات احيانا والله يطلّعوا اولاد ما في منّهم. احسن من تربية بعض الي عندهم ام واب. ودا الكلام عن تجربة. الله يعينك على تربيتهم ويصلحهم لك
اختي بما انو ابوه متوفي الله يرحمو ضروري تكوني انتي الاب والام. يعني تكوني حنوووونة وفي نفس الوقت حااااازمة معاه بقوة. ولما يغلط او يدخّن اصحك تبكي قدامو. خليكي قوية، عاتبيه، بيّني انك زعلانة وانك ما توقعتي منو انو يخيب املك فيه. وعاقبيه عقاب يتناسب مع حجم الغلط. ولما يبطل يعمل الغلط وضحيلو انك مبسوطة منو. وانو سندك بعد الله، وقد ايش كنت متأكدة انو ما حيخيّب ظنك فيه.. وانو ابوه كان راح يفخر بيه
زي ما قالو لك الاخوات اشغلي وقتو بنشاطات كتيرة ويكون فيها مع قروب شباب من سنو تكوني انتي متاكدة انو ما عندهم من دي القصص. يعني الصبح مدرسة والعصر تحفيظ والمغرب نادي رياضي وما يجي الليل إلا الولد مهلوك من التعب. ويومو كلو يستفيد منو ويرفّه عن نفسو.
مهم كمان انك تخليه يتحمل مسؤولية معينة حتى لو كنتي تحسي انها اكبر من سنو. مثلا في الصيف تخليه يشتغل شغله تصلح لو، حتى لو كنتي انتي وهوا مو محتاجين. بس عشان يتعلم المسؤوولية. مثلا يشتغل في سوبرماركت او أي حاجة تكون تصلح لو.
ان شاء الله اكون افدتك.