اخواني واخواتي الاعزاء ... حبيت اليوم أشارك بهذا الموضوع البسيط .. وان شاء الله يعجبكم ..
الله يسلمكم .. البارحه كنت قاعدة مع زوجي .. واولادي يحكون لنا قصة علاء الدين والمصباح السحري .. بعدها قال
واحد من اولادي اذا كان عندي المصباح بطلب دراجه .. والثاني قال بطلب بيت من الشوكولاته .. المهم زادت الطلبات
وكلها خياليه .. 
بعدها طلعوا يلعبون .. وإلتفت لزوجي وشفته سرحان .. سألته : خير يا الغالي شو اللي شاغل تفكيرك ؟
قال : أبي أسألك سؤال .. وأبيك تكونين صريحه معاي ...
قلت : طبعا .. اتفضل .. إسأل ..
قال : لو كان عندك المصباح السحري .. ومسحتيه .. وطلعت منه أنــا .. شو بتطلبين مني .. أحققه لك ؟
تفاجأت من السؤال .. بس حسيت انه يبي يعرف شو الشيء اللي قاصرني منه .. بصراحه فكرت وفكرت وفكرت ..
وما لقيت شيء أطلبه منه ... وقلت له : والله ما اعرف شو اطلب .. باختصار مو مقصر علي في شيء يا حياتي ..
وقعد يصر علي وااايد .. إلا أطلب شيء ... فطلبت إنه يظل يحبني جذي على طول ..
بعدها انا اللي سألته نفس السؤال ... والحمد لله كانت نفس الاجابه .. بس قال لي : أطلب منك أمانه إذا كنتِ متضايقه
من شيء فضفضي لي ولا تكتمين ... لان موت اخوي الله يرحمه لين الحين مأثر فيني .. وفراقه كسرني من الداخل ..
واحيانا زوجي يلاحظ هالشيء بس ما افضفض .. اخاف اضعف امامه وامام اخواني فبالتالي هم يضعفون ..
فحبيت اشارككم هذا الحديث اللي دار بيننا .. علشان نتناقش ونساعد بعض في تحقيق لو جزء بسيط من أمنياتكم
يمكن أي أخ او أخت يلقى او تلقى طريقه يخلي زوجته او تخلي زوجها يحقق اللي تبيه او يبيه ..
وممكن كل اخ يطرح هذا السؤال على زوجته ... او كل اخت تطرح هذا السؤال على زوجها .. لمعرفة التقصير او
امنية الطرف الآخر ومحاولة تحقيق ولو جزء منها ..
فالســؤال :
لو كان عندكِ المصبــاح السحــري .. ومسحتـيه .. وخرج لكِ زوجك .. علشان يحقق لكِ أمنياتكِ
شو الشيء اللي بتطلبينه منه ؟
لو كان عندك المصبــاح السحــري .. ومسحتـه .. وخرجت لك زوجتك .. علشان تحقق لك أمنياتك
شو الشيء اللي بتطلبه منهـا ؟
اتمنى من الجميع المشاركه .. وان شاء الله نستفيد كلنا من الموضوع .. ربي يسعدكم ويهنيكم ..