فيه قناعة منتشرة كثير وهي إن الملتزمات مالهم بحركات البنات من الدلع والغنج وخفة الدم ، والكشخة والرزة ، يحسون إنهم جديات ولا يعرفون لهالأمور ومالهم وقت لها ..

أنا إلى فترة قريبة كنت متمسكة بهالقناعة مع إني من بيئة ملتزمة ، لكن الآن البنات تغيروا وأدركو إنه مافيه تعارض بين كونك ملتزمة متمسكة بتعاليم الدين وبين كونك فرفوشة و (فالتها)

تغيير هالقناعة يعتمد بشكل كبير على البنات الملتزمات أنفسهم ، المفروض يصيرون يطلعون ويجتمعون بالناس ويخالطونهم ..
فيه نماذج رائعة من الداعيات الدكتورات أعرفهم شخصياً ، إذا تكلمتِ معهم بالدين تلاقين درر ، وإذا سولفتِ معهم بالماركات والملابس وهالأمور تلاقينهم فاهمين ومطلعين وعارفين ، وإذا دردشتِ معهم تعالي شوفي خفة الدم وحسن المعشر ..
لهم سنوات متزوجين - ماشاء الله تبارك الله - من أسعد الناس مع أزواجهم لأنهم عرفوا كيف يوازنون ولايخلون جانب يطغى على جانب ..

والشباب المفروض يحطون نصب أعينهم قول الرسول - صلى الله عليه وسلم - (فاظفر بذات الدين تربت يداك) ..