* ردة فعله *

جلس ساااااااااااااااااكت و ما يقول شئ و يطالع فيا.. و بعد ما كان مكشرّ عشان يخوفني منه..
لإني قلت ، أخلاقه بتخرب كل شوي و خاصة يوم يشوفني - ميّتة عليه و هادية و طيوبة و مسالمة - ..
( انسان عجيب بجد ) ؟؟؟؟؟ ما قدرت أفهم له ؟؟؟؟؟

المهم ..
قام عدّل وجهه .. و تركني أخلص كلامي ..

.
.

للأسف ، إنه زوجي يعرفني .. ما عندي ما عند جدتي .. يعني أتكلم كلام وقت الزعل و أرضى
بكلمتين بعدين و أنسى ، فياخذني على قد عقلي و يسايرني لحد ما أهدأ .. بس بعد ما يطفح الكيل
<- هذه إيجابية من إيجابياته .. مع إنه هو اللي يخليني أوصل للمرحلة هذه ، بس أحسن من لاشئ

حاول إنه يضحكني بكم جملة كان زمان يوم يقولها ، فكنت أعلق عليها و نجلس نضحك عليها ..
بس المرة هذه كتمت ضحكتي بالقوة ..
و جمدّت وجهي و ملامحي و جلست افتكر أشياء سيئة و محزنة عشان ما أضحك ..

.
.

يوم شاف إني من جد أتكلم و ملامحي جادة بالفعل ، و أصريت على طلبي و كنت من جد ماخذة
قراري .. قال خلي أحد من أهلك يكلمني ، و رديت عليه أمي مريضة و أخوي اللي فيه كافيه
و أنا المسؤولة عن نفسي .. و ما مسكت حالي و صرت أبكي و بسرعة مسحت دموعي ..

قال لي ، إنت استخرتي ، أنا كمان خليني استخير كم يوم ..
قلت له ، صلي دحين و استخير ، ما بتاخذ منك وقت .. و بعدين إنت يوم تزوجتني ، قلت إنك ما
استخرت ، عشان خفت نتيجة الإستخارة تطلع العكس ؟ فمو لازم تستخير ..

قال ، لأ .. الإستخارة لازم لها 3 أيام ..
قلت له ، هذه أول مرة أسمع بها ، و ناس مطلعينها من راسهم ..

قال لي: بس أنا عندي الإستخارة 3 أيام ..
قلت له ، خلاص .. يعني الثلاثاء ترد علي ..

قال لي ، لأ .. الثلاثة ايام تبدأ من يوم الإثنين ، ثلاثاء ، أربعاء ..
قلت له خلاص .. الأربعاء و لا تأخرني أكثر من كذا ..

خرج من البيت و لا تكلمنا بكلمة .. و لا طالعت فيه ..
و كنت من جد مصممة على قراري و مرتاحة له ؟


+++++++++++++++++++++++


شغلت حالي كم ساعة من الظهر لحد العصر، حاولت أنسى و أقوي نفسي و أشيله من راسي ..
جيت نزلت الموضوع .. عشان أمسك نفسي أكثر و أستمد طاقة أكثر .. و كنت مقررة ما أكلمه أبدا

ضعفت و اتصلت على عمل زوجي و طلبت من السنترال يحولووني على مكتبه ..
ما أعرف إيش اللي جاني وقتها ؟؟؟؟
كنت مخنوقة ، و كنت أبغى أسمع صوته بس و أقفل الخط على طول .. من غير ما يدري إنه أنا ..

.
.

شكله كان مشغول و ما يردّ على مكتبه ، فالموظف تبع السنترال الملقوف .. يوم ماحد رد علي ..
دخل في الخط و قال لي : إنتوا الأهل ؟ قلت له إيوة .. قال خلاص دحين أبلغه يتصل عليكم ..

دق عليا زوجي من جواله ، قمت تورطت ، لإني ما كنت أبغى أكلمه و لا يعرف إنه أنا ..
و قلت له .. بس كنت بأسألك .. الشيكات اللي بإسمي و تبع الحجوزات لسى ما وصلت ..
و مرة تأخرت ؟ قال لي ، ادخلي على ايميلي و ارسلي لهم و لا كلميهم إنت ..

قفلت الخط ..


+++++++++++++++++++++++++


شغلت حالي كمان ، و فيه ضيوف جايين عند أمي .. و وجهي مقلوب و عيوني محمرة من البكاء ..
و خفت انفضح عند الضيوف و عند أمي .. و دقيت على أختي أبكييييييييييي و أشهق من البكاء ..

<- ما أدري إيش صابني ؟
دقيت على زوجي ، و قلت له : كيف أبيع السيارة و هي بإسمك ؟ <- حجة عشان أكلمه ..
قال لي : اعرضوها في الحراج و لو جاء مشتري ، خليه يكلمني ..

قلت له مع السلامة ..

و قبل لا يقفل الخط .. ما مسكت حالي و صرت أبكييييي و أقول له .. إنت اللي خربت بيتنا بيدك ..

و كم مرة قلت لك محتاجين لك أنا و ولدك ، و إنت ما تهتم فينا .. كم مرة أنا اللي أسأل عنك و إنت
ما تهتم ..؟؟؟ رامينا في بيت أهلي من 3 أشهر ، كأني مسيار .. و إذا كلمتك تقوم تتأفف و تعصب
إنت ما كنت كذا هناك .. و كمان ما بتبطل كذب أبدا .. و من حقي أسأل عن الإستقطاع ، و ماحد
يزعل من الحق .. و كل شوي أترجاك تجي تنام عندنا كأني ثقيلة على قلبك و أرمي نفسي عليك ؟

الشقة موجودة ؟ إيش باقي ..؟؟؟
خلاص بترتاح مننا مرة وحدة ..


+++++++++++++++++++++++


راجعة شوي ، بأقيس ضغط أمي ..