طبعا وقتها .. رد عليا - زي زمن أول - بكل رومنسية و هدوء و سمعني للأخير ..

جلس يقول خلاص اليوم تلمي عفشك كله و بدون نقاش .. و ننام في بيتنا و من اليوم خلاص نروح
البيت .. و قبل ، يعني في الفترة الأخيرة .. يا يتأفف ، يا يقول مشغول ، يا نعسااااان ، يا يطنش .. إلخ ؟

.
.

راحوا الضيوف ،.
زوجي صار يتصل و يتطمن علي و يسأل عني من غير ما اتصل عليه و لا أدور عنه ؟

يتصل علي بعد ساعة و يقول لي ، ما لقيت عمال دحين عشان يشيلوا الأغراض ،
بس بأخذ السباك عشان يركب سخانات الموية كلها في الحمام - الله يعزكم - و المطبخ ..
و أركب المرايا في الحمام ، و يصير بكرة نروح للشقة ..

ثم بعد ساعتين يتصل و يقول ، أنا جاي عندك .. أجيب عشاء معاي ؟
قلت له شكراً .. تبغاني أجهز لك شئ تاكله ؟

كنت فاتحة اللاب توب و كتبت ردي أمس .. جاء من حاله و دق الباب، و جلس معايا أنا و ولدي ..
و لعبوا مع بعض و ما خاصم ولده أبدا .. و حكيت له عن مصر و ( وائل غنيم ) ..

و صار يلزق فيا ، و مرررررة حبوب زي زمان .. و مرة ذوق و رومنسي ..

نام عندنا من غير ما أطلب منه ، و صحيته الفجر يصلي .. قام صلى و راح يشتري معصوب لأمي ، لإنه أمي
نفسها فيه من يومين ، لإنه حيلها مهدود و أخوي مسافر .. و جلس معايا بعد الفجر .. و بعد الظهر خرج من
العمل و دق عليا و جاب بروست البيك و قلت له لا يحسب حساب أهلي ..

و جلس يمزح مع ولده و يتكلم معاه و يأكله و يشرح له أشياء، و خليته ينام ..
ثم صحيته عشان يروح لدوامه

حسيته من جد .. رجع مثل قبل ؟؟؟؟

.
.

قبل شوي متصل علي ، إنه معزوم عالعشاء .. و إنه ننقل لبيتنا يوم الخميس هذا ..
و طوووووووول في المكالمة مرررررة ، حتى إني ساكتة و هو اللي يتكلم و يقول أشعار مرات و مرات
يغني، حتى استغربت في داخلي ( من زمان ؟ و كل شوي أقول دحين يقفل ؟ ) ؟؟؟

و شوي إلا يقول لي ( غريبة ؟؟؟ من زماااااااااااااان ما طولت قد كذا في الجوال معاك ؟ و صار يضحك )
بس أحس إنه قلبي ميت صاير ، و ما بأهتم .. و أستنى متى يقفل الخط ؟

و من حاله يعرض علي يخلص أشغالنا من إجراءات الفيزا و تسجيل ولدي في روضة ..
و قال بأعزمك على المكان الفلاني بمناسبة استلام الراتب ..

.
.

أنا بأقول كذا ..

لإني عجزت من جد كيف أتعامل معاه ؟ و كيف أفهمه ؟

و أنا من جدددددددد استخرت و دعيت ربنا ، و قررت أمس إني خلاص مستحيل أعيش معاه ؟
و كنت من جد خلاص تعبت منه ، جرحني كثير في الفترة الأخيرة ..

اليوم حسيته رجع للإنسان اللي كنت أعرفه ؟؟؟؟

.
.

أختي اتصلت علي أمس، و كل شوي تقول لي ..
يمكن هنا غصب عنه بيتأثر بتعامل أهله ؟ يمكن لإنه بعيد عنكم فيسمع لكلام أهله ؟
يمكن بيشوف كيف تعامل أخوه مع زوجة أخوه ، قاسي و جاف .. و تعامل أبوه مع أمه .. فيتأثر لا شعوريا ؟
يمكن يوم تكونووا في بيت واحد بيرجع مثل قبل ؟ يمكن و يمكن و يمكن ... إلخ ؟

.
.


صرت أخاف أقول له كلمة حلوة ، و يرجع ينقلب و يطنشني .. إلخ ؟


و طبعا كلامه عن عزيمة الخميس ، و عن إننا بننقل لبيتنا يوم الخميس ..
بأدخله من أذني و أخرجه من الثانية .. لإنه مو أول مرة يعملها ..


ما أعرف إيش النهاية ؟ و هل كل مرة أقول له ما ننفع لبعض .. لحد ما نمل من بعض ؟
و فين الصح و فين الغلط ؟ و إيش المفروض أعمل ؟ و كيف المفروض أتصرف ؟


اسفة جدا عالإطالة

بأقرا الردود من جديد .. و أشكر للكل مساندتهم ..
و كل كلمة انكتبت بتشيل عني الكثير ..

.
.

إيوة ، حكاية إنه يستخير ..
فهذه طريقته عشان بس يسكتني فيها ، لإنه يقول : كنت أخذك على قد عقلك ..
و يقول ( مافي فكّة مني لحد ما تدفنيني بنفسك تحت التراب )