منتدى عالم الأسرة والمجتمع - عرض مشاركة واحدة - العمر يؤرقني في مسالة الزواج

03-03-2011, 10:08 AM

#10

bint Q8

عضو نشيط

تاريخ التسجيل: Jan 2011

المشاركات: 168

أختي العزيزة:
في نقاط وددي تفكرين فيه قبل ما تقبلين او ترفضين الرجل:
هل شخصيتة الرجل أكبر من عمرة؟
قصدي تفكيرة و اسلوبة في الحياة؟
هل هو من النوع اللي عنده خطط للمستقبل و لحياته معاج؟
ام هو يبي يتزوج و حياه اللة
*****
هل لما جلستي معاه في الشوفة الشرعية حسيتي انه ريال تقدرين تحترمه و تقدرينه؟
******
أنتي شكلج أكبر ام أصغر من عمرج؟
لأن الصراحه في بنات شكلهم وايد أصغر من عمرهم و حتي لو تزوجوا اللي اصغر منهم الريال ما يحس
و العكس
في بنت شكلها و شخصيتها اكبر من عمرها و لو تمشي مع زوجها كانها اخته الكبيره
هل اشياء يمكن ما تلعب دور الحين بس في المستقبل و بعد الولادة و السهر علي العيال أكيد بتلعب دور
لان في رياييل يقارنون بين الزوجه و بين غيرها من ناحية الشكل
*******
أما عن الدراسة:
فأسمحي لي يخلق فرق و فرق كبير بعد
خصوصا لو انتي كنتي دارسة و مثقفه و هو صاحب ثانويه عامة و ما عنده اي طموح
ساعتها صعبة جدا
و تحسين انه ما يفهمج و مو قادر يرفع من مستواه التفكيري
و تصبحين في دوامه لانج لازم تلعبين دور المنقذة و المديرة في البيت
*******
لفت انتباهي هل جملة:
وانا انسانه محافظه ولكن لست بالدرجه الي تجعلني ارتبط بمتدين فانا لا اعلم مالذي يرضيه ومالذي لايريده
حبيتي لو أنتي مو متدينة وايد فصعبة انك تتزوجين انسان طريقة التزامه غير عنج
لان في اشياء بالنسبة له اساسية و بالنسبة لج فرعية
(مابي ادخل في الحرام و الحلال لان هذا مو ضمن نقاشنا)
بس أكيد راح تكون في اشياء في حياتة من الضروريات و في نظرج لا
*******
صحيح الفرصة ما تتعوض مثل ما الخوات قالوا
بس اولا أنتي كم عمرج؟
و ثانيا:
هل لان الفرصة ما تتعوض احط نفسي في زواج انا مو مقتنعه فيه لمجرد انني اكون متزوجه و بس
*****
يالغالية:
الزواج مهم فهو ستر و أكمال دين و سعادة و راحة نفسية
ولكن
مع اللي انتي تكونين متفاهمة معاه
اللي انتي تختارينة بقناعة
اللي انتي تحسين انج راضية فيه بصفاته الزينة و الشينه
اللي انتي تحسين انج قادرة تمرين معاه في درب الحياة بامان
*******
بناتنا للاسف يختارون الخيار الغلط و من ثم يتندمون و يقولون ليش انا مو سعيده؟
طيب حبيبتي ليش من البداية ما اخترتي صح؟؟؟!!!
مافي حياة من غير مشاكل ولكن لو قدرتي تحصلين انسان تكونين مقتنعه فيه
ساعتها المشاكل تهون و تقدرون تحلونها بسهولة اكثر
*****
فكري و استخيري و شوفي انتي شنو اللي تبينه
كتبي علي الورقه ايجابيات الشخص و سلبياته
ثم قرري و توكلي علي اللة
*******
ربي يكتب اللي فيه الخير يالغالية
******
تجربة شخصية:
اللي من داخلج مو مقتنعة فيه ... مو نصيبج