المشاركة الأصلية كتبت بواسطة بنت الحكمي
الله يعينك ياخوي أبو فهد بصراحه الإخوان والأخوات ماقصروا وأنا بقول إن لو أنت تحتويها وتحسسها في يومها إن ماعندك غيرها بحياتك وتبتعد وتتجنب أي طاري أو ذكر لبيتك الأول أو زوجتك الأولى حتى لوتطرقت هيه للموضوع له صلة بأسرتك الثانيه أنت قول لها أنا سعادتي وراحتي عندك أنتي
أولا أشكرك على قضاء جزء من وقتك هنا في كتابة وقراءة منك,
وهذا أن دل فهو يدل على صدق أسرتكم الالكترونية وحب الخير للغير.
ثانيا أكثر من كذا أحتواء ومداداة ومسايسة ماعندي!!!
كثر ما أحتويها كثر ما تتفرعن معاي,
أنا رجل ولصبري حدود, وصبري على وشك أن أفقده.
لا تفهمين من كلامي أني لا أقبل المشاكل في حياتي!! بيتي الاول لا يخلو من المشاكل لكن مشاكله لا تزيدني فيه إلا حبا وتمسكا,
فهي مشاكل تحصل في كل بيت ولكل شخص ناهيك انه ولا مرة حطيت راسي معاها ولا طلعت من عندها إلا وحنا متصافين.
بينما مشاكلي في البيت الثاني لايزيدني فيه إلا نفورا, لماذا؟
لأنه المشاكل كل وحدة أطلق من اللي قبلها!! ولاقد حطيت راسي إلا وحنا متشاحنين ولا طلعت من عندها إلا وحنا متزاعلين,
أن حاولت أسايسها وأمتص غضبها زادت في أسلوبها والقاء اللوم والعتب والغلط علي وكأني خلقت فقط لأجبر خاطرها وأتم طول الليل وأنا أشرح لها انك غالية وانك فاهمتني غلط والله والله أني تقريبا شهر متواصل وأنا أطلع من عندها للدوام وأنا مواصل بسبب أحتوائها!!!
وأروح لبيتي الأول من شدة الارهاق والسهر في الليلة السابقة أقضيه كله نوم!!
وش هالحياة يا أختي.
وإن طنشتها استشاطت غضبا!!
وأساءت في خلقها وتنكد علي نومتي وتقول والله إذا انت ماعندك ذرة أحساس فيني والله لأنكد عليك نومتك!!!
وبعض المرات توصل من شدة انفعالها من انها تقول اطلع من البيت !!!
أطلع من الغرفة وأروح للمجلس تلحقني وتقول قلت لك أطلع ما أبي أشوفك وتلح وتصر على خروجي من البيت!!!
وش أسوي فيها هذي؟ أريحها ماترتاح أطنشها ماترتاح !!!
حسسها بأنك ماترتاح إلا عندها هيه وإنك تتمنى تعيش العمر كله معاهابدون ماتذم الأولى بس قول لها حياتي معاك لها طعم آخر وسوي نفس الشئ مع زوجتك الأولى يا أخي الرسول عليه الصلاة والسلام ما أباح الكذب على الزوجات إلا لحكمه أنت الشئ إللي تحسك ماتتحمله أكذب عليها وأحتال سايرها مدام إنها إنسانة غيوره
إشتري سعادتك بحلاوة لسانك معاهاإجذبها ناحيتك وبالنسبه لعدلك إللي تحاسبك عليه ياأخي أ كيد زوجتك متعلمه وفاهمه حاول أن تأتي لها من ناحية الدين بكلمه طيبه قول لها أنتي ماترضين إني أقابل ربي سبحانه وتعالى بشق مائل وأنا لوعدلت بينك وبين ضرتك علشان ربي مايحاسبني على التقصير مو علشان إني أحبها أكثر منك أنت ياخوي شكلك عندك رواسب وتراكمات في نفسك من زوجتك الثانية وإذا
أنت شايل بقلبك على زوجتك الثانيه من تصرفاتها ترى ماراح تحسن في حل مشكلتك مهما سويت أنت بالأول إنسى مامضى ولاتخلي اليأس يتسلل إلى نفسك ويحسسك بأن زواجك الثاني فاشل لا ياخوي مو أنت أول واحد تعدد ولا آخر واحد وهاذا من حقك أباحه لك الشرع سوى عندك أسباب أو بدون أسباب وترى مافيه أحد معدد وهو مرتاح موأنت عندك مشاكل وبس فيه غيرك عندهم أ كبر وأ كثر من مشاكلك بس التعدد مايحتاج منك عدل وبس لا ياخوي لازم عدل وحكمه وحزم في أمورك وزوجتك الثانية مانفع معاها لاحزم ولاهجر ولاطلاق أنت جرب معاها الكذب والحيله يمكن تفيد معاها بالنسبه لإتصالها على زوجتك الأولى حاول إنك تمنعها ماتتصل عليها وتجرح مشاعرها بالكلام بس إمنعها بشده حتى لو تضطر تجيب أخوها وتشهده عليها ويكون حكم بينكم وباقي مشاكلك معاها حاول تجلس معاها جلسة هدوء وتفاهم وتناقشها وتوضح لها إنك تحبها وتريدها وماتزوجتها إلا وأنت بحاجتها وإن مالك غنى عنها وإرفع معنوياتها وحسسها إنها هيه الكل بالكل حتى لو شريت لها شئ وشريت لزوجتك الأولى نفس الشئ إعطي زوجتك الأولى بالسر وزوجتك الثانية إذا جبت لها قول لها ترى ماجبت إلا لك أنتي لحالك الأولى ماعطيتها شئ وكمان إذا هما مايتواصلون ببعض بيكون أحسن شوف أهم شئ أنت لاتمدح الأولى عندها ولاتجيب طاريها ولاتقول لهافلانة عاقله فلانة طيبه ماعمرها نكدت عليه في شئ أنت إ بتعد عن أي مقارنات بين زوجاتك نهائيا لأنه ياخوي كل إمرأة لها تركيبه خاصه وأسلوب يختلف عن الأخرى كل واحده من زوجاتك لها شخصيه وأنت يجب عليك التعامل مع كل واحده منهم على حسب شخصيتها وأسلوبها إستخدم لكل واحده نمط خاص فيها إعرف مفاتيح قلب كل واحدة منهم إعرف وش تحب وش تكره وش تفكر فيه كل وحده منهم عاملها بالطريقه إللي هيه تفضلها تجنبا للإزعاج ووجع الرأس بعدين أنت إعطيها الثقه فيك ولاتحسسها إنك مليت من تصرفاتها وكرهتها وماعدت طايقها لأنها بهذا الشكل راح تشك بأن زوجتك الأولى وأهلك هم السبب في تغيرك عليها وكرهك لها فتصير تحقد عليهم وتكرهم لما تشوفك تتصرف معاها بجفاء وقسوة أنت خف عليها شوي وتعامل معاها باللين
والهدوء أمتص غضبها وأسكت عنها وقت ماتصايح وتعصب عليك وأتركها وروح أشغل نفسك بأي شئ آخر أهم شئ ماتطلع من عندها علشان ماتشك فيك وتحس إنك رايح عند زوجتك الأولى وإنك عندك غيرهاوإنها ماتهمك في شئ لأنك لو رحت لبيتك الثاني وهي في قمة غضبها راح تزيد نارها وحقدها وكرهها لزوجتك الأولى
لاكن خلك عندها وقول لها لوهديت أعصابك تعالي إجلسي خلينا نتفاهم مدام أنت ياخوي عندك صبر وربنا معطيك طولت البال فتحملها شوي علشان عيالك وإن شاء الله ربنا يصلحها ويهديها لك وأهم شئ تأكد إن زوجتك ماعندها مؤثرات خارجية يعبون راسها عليك وعلى زوجتك الأولى مثل صديقاتها جاراتها أحد من أهلها
ترى بعض الشياطين على هيئة بشر كل همها تخرب بيوت الناس المستقره إنتبه لهاذي النقطه وحطها في بالك وإبحث عنها زين نسأل الله لك التوفيق والسعادة في حياتك الزوجية .
|