اقتباس:
المشاركة الأصلية كتبت بواسطة صابرة بدنيتي
المهم بحكيلكم وش صار بعد المقابلة
رحت لها البيت وتكلمنا وضحكنا وسولفنا.. انبسطت كثير مع اولاده وفرحت معهم حبوني وحبيتهم
حتى راحوا لابوهم قالو بابا لا تخليها تسافر تجلس معنا..اسعدني كثير حب اطفاله وخاصا هما صغار وحبهم بريئ..
شوي طلعنا برى ورحنا حديقة وجلسنا وكملنا السوالف ..الحقيقة هي تصرفت عادي معي ولا بينت لا غيرة ولا شى
رحبت بي وتبادلنا المجاملات ..حتى قمنا تمرجحنا مع الاطفال ..فتحت لي قلبها وقالت ان هي مغلوب على امرها وان يمكن كرهها لي بالايام الي فاتت زوجنا وتصرفاته وفعلا هو يعطي الصورة هذه بحيث لمن يروح هناك اشك ان هي عبت راسه وانا تفس الشى..قالت لي انه تزوج قبلي وجلس مع زوجته ثلاث سنوات وكان يبات برى وزوجي ينفي هالكلام وطبعا ماقلت له قالت لي ولا راح اقوله..وقالت احتمال بعد سنتين يتزوج لان شكله مزواج..وقالت انها عايشة معه سنين ولم تفهم تركيبته لحد الان وهذا فعلا ماوصلني انا بعد كل يوم بمود وكل شوي بمزاج...انا قلت لها اعتبريني اختك مو ضرتك وتاكدي لو زعلك انا بوقف معك مو ضددك ..بغض النظر عن اي شى فانا والله ودي اريحها اتجاهي وابيها ترتاح لدرجة انها قالت لزوجنا كنسل تذكرتها وخلها تجلس معنا ..انا ابي اريحها مو عشان زوجي لا والله
ابي قلبها يرتاح عشان تقدر تربي اولادها بسلام..
راح جاب العشا واجتمعنا على طاولة وحدة انا وهو وهي واولاده كان الموقف جدا صعب يناظر فيني ولا يقدر يكمل النظرة ويناظر فيها ولا يقدر يكمل النظرة ...بالنسبة لي الموقف جدا صعب لاني قعدت اتخيل كل شى يكدر علي
الزوج مبسوط ومعها حرمتين لكن امراتان مجروحتان..هي تضحك وتسولف عادي وكانه مافي شى وانا بعد نفس الشى
ولكن كنت اجامل الوضع وخاصا لمن يجي يجلس معنا كنت ادير وجهي ولا احب اطالع فيه..احيانا المحه لمن ينظر لها احس اني ابغى اموووت..من غيرة منها لا والله بس الوضع صعب جدا
فعلا وصلني احساس ان زوجي مو همه شى رحت انا ولا جيت مافرقت معه فهو عايش وسط اسرة واولاد ..انا الي اتاثر بغيابه وانا الي اعاني بفراقه..انا جزء بسيط في حياته ولست كل حياته..ولهذا قررت ان يكون هو بعد جزء بسيط بحياتي
ابي ادعس على كل شعووور يقودني اتجاهه..
اليوم قالي انتي حساسة مرره ..قلت حساسة لمن تقولي كرهتك وعفتك ولا ابيك..بس اقسم لكم برب العباد لو تكررت منه هالكلمة ياني ماجلس معه ولو للحظة
هالمرة بالذات انا راح اتغير وبتشوفون التغير كيف القلب مجروح ومستوي على الاخر ..واتمنى من الماضي الدفين تعطيني خطوااات قبل لا اسكر المووضوع لاني قربت اسكره
والشكر الخالص لكم اخواني اخواتي على ماقدمتم لي بدوون استثناء لحد واسال الله ان يرزقني دعواتكم لي بظهر الغيب ويجمعني بكم بالجنة
|
جميل جدا يالغالية ,, ربما هذه المقابلة انتي تشوفينها كانت جيدة إلى حد ما ولكن كانت تحوي مجاملات
وايد , آنا بالنسبة لي أشوفها خطوة إيجابية وممتازة لتخفف من المشكلات السابقة اللي كانت تصير
بمعنى قربج لها وزيارتج وحب أطفاله لج شي طيب جدا , وهذا الشي بعد بيخليها هي بينها وبين
نفسها تفكر فيج وبتصرفج وبمعاملتج الطيبة والحلوة معاها ومع أولادها , يعني انتي هاللون تكوني
قد أثرتي إعجابها بشكل مباشر , لأنج تعاملتي معاها ومع العيال معاملة جدا راقية وزيارتج بحد ذاتها
ربما تكسر حاجز كان بينكم بسبب زوجج , و تكوني ربما كسرتيها من الداخل يعني هي بنفسها
تفكر شلون كانت تتصرف معاج والحركات اللي كانت تسويها ولما قعدت معاج وسولفت وياج
حست إن ربما ظلمتج وايد , صح إن زوجج كان سبب كبير ف هالسالفة , بس الأهم إن الحين نوعا ما
صارت الأمور تجري بمجرى هاديء وإن شاء الله للأحسن على طووول يارب .
صبورة انتي من داخلج إحساس طفلة برئية حساسة جدا وغيورة جدا و متملكة جدا , محتاجة فقط لحنان واهتمام , محتاجة فقط لقلب يحويها , ويد حانية تمسح عليها على طول , و روح مرحة تفرفش معاها , و عقل واعي يسمعها , و حضن دافي يلمها , محتاجة الزوج المحب , وبنفس الوقت يكون الصديق الوفي اللي يسمع ويخفف الألم , ويكون الأم الحنونة جدا , ويكون الأخ المعين و يكون أيضا الأب المرشد والسند , ربما الأيام كانت قاسية عليج وقاسية معاج , و ربما الظروف كانت أقوى منج , و ربما الدنيا ظلمتج زيادة , وربما القدر كان وايد سريع معاج ومفاجيء جدا , لكن رغم كل هذا إلا إنج تحووين مزايا كثيرة حباج فيها رب العالمين , ومن اهمها سعة صدرج , طيبتج , نقاوة قلبج , تسامحج , وحبج الخالص , واللي ينعكس عليج من كل النواحي فيكسبج جمال داخلي وخارجي بالطبع .
أحس إن الأيام الماضية والظروف القاسية والحياة اللي عشتيها أو تعايشتي معاها و ذكريات طفولتج كان لها دور رئيسي ف حياتج الحين , يعني ربما لو ما مريتي بكل اللي مريتي فيه ما كان صرتي ألحين جذي , ولكن احنا نقوول دايما وأبدا إن الله سبحانه وتعالى ما يعطينا شي وما يكتب لنا شي إلا صلاح ورحمة لنا , فثقي تمام الثقة إن كل اللي يصير لج من مشاكل و من أحداث ومجريات وأمور ما هو إلا صلاح لج و خير
من رب العالمين .
صحيح كلامج من جهة إن زوجج عايش وسط أسرة , وانتي جزء من حياته هذه , هذا واقع حبيبتي
وانتي تقدرين تمحورين هذا الواقع لنفسج , مو بس بالكلام طبعا , هو وسط أسرته في كل الظروف وانتي جزء من هذه الأسرة كما هو يفكر , انتي الآن ناوية تغيير جذري وناوية يكون الجزء اللي هو حاطج فيه بحياته انتي بالضبط تحطينه فيه , الآن انتي مخليته الكل في الكل بحياتج بمعنى أصح محور حياتج , انتي الآن وخصوصا بعد زيارتج له وسط بيته " وضحت لج أموور كثيرة " تبين تخلينه جزء من الكل , وهالشي راح يصير ولكن مو بسهوولة , هالشي يعتمد عليج وعلى عزيمتج وإرادتج بهالتغيير , آنا أشوفج هالمرة فعلا
ناوية بجدية أكثر , أحس زيارتج لهم جابت نتيجة كبيرة لأنج شفتي كل شي بعيون الواقع , وهالشي مفرح جدا , لأن لما التغيير يحصل حياتج كلها راح تتغير وكأنج تبدين من جديد .
انتي رايحة لأهلج على ما أعتقد , زيارة جت فوقتها أول شي فكري تفكير عميق بهالموضوع , وخليه ينحى منحى أخر يعني قولي لنفسج " خلني أتخيله دوم مسافر أو دوم مشغول وبشوف هل حياتي بتمشي أو لا " يمكن أول شي ما تقدرين ما تتحملين تقولين لا ما اقدر آنا أعشقه واحبه , بس ترجعين تفكرين من جهة ثانية يمر اليوم واليوم اللي بعده تشوفين رووحج عادي الحياة ماشية والأمور كلها اووكي , أول الأيام بتفكرين فيه بشدة وبحنين , لكن مع توالي الأيام بيخف عندج هالإحساس , وبتقولين طيب ليش آنا أكدر عمري وأزعل روحي !؟ سؤال يطرح نفسه !
الحياة به و بدون ماشية عمرها الحياة ما وقفت عند إنسان واحد أبدا , ولا جان كل من حب مثلا و وفارق حبيبه انتهت حياته , أو كل من تزوج وماتت زوجته انتهت حياته , أو كل من انفصل عن زوجته انتهت حياته , أبدا الحياة ماشية وسايرة وكلنا فيها ماشين , ومافي شي فيها أبدا يستحق إن احنا نحزن ونتضايق أبدا .
استمعتي بوقتج في الشغل لو تقدرين تشتغلين شي وايد زين , استمتعي بوقتج في البيت , مارسي هواياتج المفضلة , تزاوري مع الجيران , حاولي الإختلاط بصديقاتج , مارسي حياتج كما يجب أن تكوون , مو معنى هذا إنج تتناسينه بالمرة , ولكن خلي حياتج حلووة والجزء الحلو اللي يكملها هو !!
هذا ما دار بخلدي ألحين , أتمنى أكون قد حللت و ولو جزء بسيط منج كصابرة الإنسانة , وأتمنى أيضا قد وفقت في إعطائج شي وكلام قد يفيدج ولو بالجزء القليل , داعية المولى العلي القدير إني يوفقج ويسهل أمرج
ويحفظج وينولج مرادج , راجيته أن يجمعني وياج بالقريب العاجل إن شاء الله + تذكري دايما إني أحبج وأحبج وايد بعد ,,,,
تحملي بروووحج ولي عودة بإذن الله
__________________
"إخوان سنـة وشيعـة هذا الوطن ما نبيعـه ,, خذ هالشعار و ذيعه و تذووب الطائفيـة"
( منصووووووووووووورين والناصـر الله )