بعد الطلقتين نفسيتي دمار شامل هل يمكن اصلاح مافسد
السلام عليكم ورحمة الله وبركاته
كلمة حق أقولها لهذا المنتدى... ليس له مثيل في روح الأخوة الصادقة والنصيحة المخلصة والمشورة الطيبة
وهذا ماشجعني أفضفض همي لكم ..
إخوتي وأخواتي الله يحفظكم ويرعاكم
أنا موظفة تزوجت على كبر بس لسة شابة والأهم روحي شابة 
المهم
من يوم تزوجت وزوجي عينه على راتبي بحجة ((ماعندي))
الزبدة:
اتطلقت طلقتين من غير ذنب والسبب هي الفلوس
أعطيكم مثال بسيط وإنتوا قيسوا ..
العام الماضي طلبته ياخذ إجازة عشرة أيام مع إجازتي عشان نخرج نتمشى فيها..وفعلا أخذ الإجازة..
كنا وقتها في منتصف الشهر..
وأول يوم في الإجازة قررنا نطلع الهدا نتمشى ..دوبنا نركب السيارة اتذكرنا نبغي نشتري فرشة نجلس عليها
ورحنا نشتري دفعني قيمتها (ماعنده)
شوية ويقول لي نفسي آكل آيسكريم ..قلت طيب..راح وقف عند موفنبيك ويقول هاتي فلوس..
أنا تنرفزت وقلت له أنت كيف نتمشى وإنت مامعك فلوس؟؟ قال اش أسوي ماعندي..أنا صراحة انقهرررررت
وأعطيته من غير نفس..
دوبنا نمشي يقول هاتي عشرة حق البنزين... هنا أنا خلاص ولعت قلت له رجعني البيت..قال عشان عشرة ريال ؟؟
المهم كملنا التمشية اللي بالهم..لما رجعنا البيت ..
قلت له إنت كيف بتمشيني العشرة الأيام وإنت ماعندك فلوس؟؟
المهم صارت مشادة بيننا ملخصها هو ماعنده....وأنا نزلت من قيمته وخليته مايسوى على عشرة ريال..
قلت له المسألة مسألة مبدا مو فلوس..ايش الفرق بينك وبين الركوب مع سواق؟؟
وإنت ليش مادبرت عشان تمشيني؟؟على الأقل دبر حق البنزين والآيسكريم وأنا أدفع الباقي لكن مو تحسسني إني آلة صراف
طبعا هوووووووووووووشة وقلت له طلقني طلقني وكان الشيطان حاضر و طلقني..
هذه طلقة والثانية لسبب مادي برضه..
طلقتين دمرتني وزلزلت كياني وهشمتني وخلتني رماد رماد رماد..لأن مالي ذنب.
ياجماعة الخير
زوجي وقفت معه في الشدائد..ما أقولها منا ولا احسانا لكن ربي يشهد على قلبي..
الصدق في العطاء له مراعاة لحاله وظروفه..
بالمقابل أهداني وكافأني
بطلقتين
المهم
يا أخوان ويا أخوات..أكيد تسألوني راتبه فين يروح..
هو كان متزوج ومطلق وعنده منها ماشاء الله خير.. ويصرف عليهم.. وأنا الغلبانة أصرف على
نفسي كأني بلا زوج..أو كأني مطلقة أو أرملة.
المهم.....
أهلي ما يعرفوا أي شي عن مشاكلي بحكم صمتي المطبق..لأن أمي تفهمني بطريقة وبأخرى
(حافظي على زوجك ومافي شي اسمه طلاق)
شفت نفسي نفسيتي في الحضيض وحالتي للأسوا..
سألته كم تحتاج من الوقت بعدها تصرف علي؟؟قال سنتين..
قلت له طيب هذه السنتين ماراح أطلبك شي إلا ماتجود به نفسك..بعد السنتين تقوم بواجباتك ناحيتي بالكامل..
واتفقنا والعرض بالنسبة له مغري جدا وفي صالحه وصالح أسرته الكريمة........(لأني أنا مو أسرته).
العواصف هدأت وهو ارتاح..
وما أنكر انا ارتحت من ناحية ليش ماجاب ليش مادفع ليش ماصرف ......الخ
لكن نفسيتي زفت وزفت الزفت
يعيني نكون طيبين وفجأة أتذكر كل المواقف المؤلمة وأقلب وأبكي وأنتحب
نكون طيبين وفجأة أقلب وأتذكر الطلقتين
يا أخوان أنا مو حاسة بالأمان مع زوجي كيف أحس بالأمان بعد الطلقتين
أحس الثالثة على الأبواب..وهذا الشي اللي مخليني أبكي ودمرانة وحزينة على طول.
أحس إني زوجة مؤقتة صلاحيتي مرتبطة بزمن معين مع زوجي وهذا الزمن هو عارفه ومحدد النهاية ومرتب لها يمكن السنتين اللي سكتني بها..يمكن أقل..
المهم أنا بصراحة فقدت توازني وعقلي مشتت بسبب الطلقتين
ما أنكر ولا أجحد زوجي فيه الحنية
لكن ماعاد متحمل تقلبات نفسيتي ومزاجي وأنا ماعدت متحملته
يعني هو لو عوضني بهدايا ,,,بسفرة,, بمفاجآت..والله أرض وأنسى تقصيره
لكنه حاف ناشف ما افتكرني بقشر بصلة بعد المشاكل الكثيرة جدا اللي بيننا..
وانا ماقصرت معه في الهدايا والمفاجآت ..
أنا كل اللي محتاجته منه دعم نفسي...أحتاج يحتويني بحب وحنان..أحتاج أحس بالأمان
أريده زي ما اتسبب في جروحي وآلامي ينسيني
أريده زي ما اوجع قلبي يداويه...
وأنا طلبته وقلت له هذا ما أريده منك
لكن
هيهات............هو ماعاد متحمل مزاجي ونفسيتي المتقلبة وأنا ماعدت متحملته ولا متحملة نفسي..
والله إني أكتب بدماء قلبي ودموع عيني..واللي جربت الطلاق حتفهمني وتحس بي أكثر..
والله إني أحس بمرارة الطلقتين في حلقي....لأني مالي ذنب فيها وانا ما أخطأت بحقه ..كل اللي سويته أصريت إني أكون زوجة ..مو آلة صراف.
صحيح محد فيكم يقدر يحل محل زوجي ويقدم لي ما أريد..لكن ربما كلمة أونصيحة أو رأي يغير مجرى حياتي.
أحتاج معونتكم ورأيكم السديد ...
لا حرمكم الله أجري ..
التعديل الأخير تم بواسطة أم داليا ; 09-03-2011 الساعة 12:07 AM
السبب: علامة ترقيم بالعنوان