الأخ الكريم البليغ الله يجزاك خير على ماتقدم في هاذا المنتدى من نصائح لإخوانك وأخواتك وحتى أنا أتفق مع الأخت دلوعة مودي بأنك تصلح تكون عضو في الهيئه الإستشاريه بس بقدر مانتمنى إنك تصير عضو في الهيئه بقدر ماراح نخسر مواضيعك التي تتحفنا بها بين الحين والآخر لأني أحس إن كل من راح هاذي الهيئه الإستشاريه صرنا ماعاد نحضى بمواضيعه ونصائحه المفيده أقرب مثال كان هنا فيه عضوه معرفها نور الإيمان كانت تكتب مواضيع تساوي ثقلها ذهب ونصائحها لاتقدر بثمن ولها مواضيع حضيت بالتميز بس للأسف بعد ماتم إختيارها للهيئة الإستشاريه وأنا أسميه إختطافها من هاذا القسم بالذات ماعاد شفنا لها مواضيع ولامشاركات معانا أنا بصراحه أول ماعينوها في الهيئه فرحت لها كثير علشان تحل مشاكل أناس هم في حاجتها في قسم الإستشارات بس بنفس الوقت حزنت عليها لأنا راح نخسرها ونخسر مشاركاتها هنا كعضوه فيها من الخير الكثير نحسبها كذلك والله حسيبها علشان كذا حناهنا بحاجة الأعضاء إللي يحلون مشاكل الإخوان والأخوات إللي بحاجتهم في هاذا القسم نبغى أناس تقدم حلول مفيده وليس طبطبه على صاحب المشكله وحنا تقريبا جميعا هنا نتفق بأنك أنت تقدم حلول جاده ومفيده لإخوانك وأخواتك وعندك وجهة نظر ثاقبه في حل بعض الأمور ونسأل الله أن يكتب لك الأجر والثواب في ما تقدم لإخوانك .
وأرجو منك المعذره في هاذي المقدمه الطويله .

ونرجع لموضوعك الطيب يا أخي بما إني لا أملك إجابه كافيه لأسئلتك عن الهجر وأثاره وفوائده بين الزوجين أنا وزوجي ولله الحمد من يوم تزوجنا إلى الآن لم يسبق لنا وهجرنا بعضنا أو بالأصح تعرفنا على الهجر وممكن تصير بيننا خلافات ونزعل من بعض بس ماتستدعي إنا نهجر بعض لأنا سرعان مانتراضى أول شئ زوجي ولله الحمد إنسان متفاهم وطبعه هادئ وما أنكر إنه أحيانا يطول باله عليه ويحاول يهدي الأموربكل مايستطيع ولو شافني معصبه ومافيه حل وسط يضطر يطلع من البيت يجلس في سيارته برى ساعة أو ساعتين وعقبها يتصل عليه إذا شافني هديت دخل البيت وحلينا المشكله أو إني إذا أناعارفه نفسي غلطانه عليه أتصل عليه ويرجع ونحل المشكله في جلسة والله إن كل خلافاتنا لوطولت ماتتعدى ساعتين بالكثير إلا وهي محلوله ونضعها في طي النسيان والحمدالله زوجي بيتوتي ومايحب يجلس ياكل لحاله أو يتقهوى لحاله ومايحب يتابع التلفزيون وهاذي الأسباب كلها جأت في صالحي أنا لأنه يطفش ويحسه متضايق وهو من النو ع إللي يحب السوالف طبعا يشتاق لقرقتي على راسه فيضطر يراضيني علشان ترجع المياه لمجاريها وأنا طبعا ما أصدق بها لأني أطفش وحنا ساكتين مانكلم بعضنا خصوصا إذا كان عندي أخبار بقولها له أو بستأذنه في شئ والحمدالله من يوم ماعرفته ماعمره رفع عليه صوت ولانكد لي خاطر ولاعمري نمت ليله وأنا زعلانه منه أو شايله في خاطري عليه
الله يحفظه ويخليه لنا أصلا حتى لو وداني زياره لأي وحده من صديقاتي مايخلينا نطول في زيارتنا يقول أطفش وأنا جالس لحالي بالبيت مثل هاذا كيف يعرف يهجر حتى نفسي أرو ح أجلس عند أهلي لحالي آخذ إجازه وأرتاح فيها حتى نغير الروتين هو مايقصر يودينا الديره أنا وعيالي ويسافر وعقبها بيومين نلقاه راجع خير وش فيك قال طفشان وأشتقت لكم وماقدرت أنام بالبيت لحالي أحسه يخوف وأنتم مو فيه فأخذت إجازه شهر من العمل وجيت عندكم نقضي الإجازه مع بعض و بعد ماتخلص نسافر سوى يعني خرب الروتين كله فهاذي حياتنا بإختصار والحمدالله والشكر وأسأل الله أن لايجعلنا لانحن ولا أنتم نتعرف ونذوق الهجر
ونسأل الله عز وجل بفضله ومنه وكرمه بأن يصلح أحوال بيوت الأسر المسلمه ويحفظها من كل سؤ وضرر ونسأله سبحانه وتعالى بأن يحل عليهم نعمة الأمن والإستقرار والسعادة والطمأنينة وراحة القلب والبال اللهم آمين يارب .
أخينا الكريم بارك الله فيك وجزاك الله ألف خير وربنا يبارك لك في زوجتك وذريتك ومالك وعملك ويجعل كل ماتكتبه في هاذا المنتدى من خير في ميزان حسناتك وزادك الله علما تنتفع وتنفع به إخوانك المسلمين ورفع الله شأنك في الدنيا والآخرة ورزقك الله رزقا حلال طيبا من حيث لاتحتسب اللهم آمين .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله