الله يجزاكم خير علي تفاعلكم معي والله انا ما ادري وش اقول ما اقول الا الحمد لله الي يسر لي وفتحت هذا المنتدي بالصدفة ربي يسر لي ان اكون معاكم انتم أُناسٌ رائعون و اجدُ الروعة في تفاعلكم والله انكم ريحتوني من جد تصدقون " تجيني حالات واحس ان الحين ما احد يصرف عليها واحس اني ارحمها " أنا إنسان طيب بشكل اني اتعبت نفسي
يا اخوان انا ما احب احد ينضر بسببي وتصدقون اني كلمت اختي علشان ارسلها شهاداتها الاصول علشان تدبر نفسها وتتوظف وما ودي انها تنحرم من الوظايف و اختي تقول ايه اكيد ترسلها هذا من طيبتك وانا ايدك بقوة .
يا اخوان هي خريجة بكلوريوس وانا اكبرها ب 10 اشهر
انا صراحة ممتن للجميع الله يرفع قدركم ومقامكم ويجعلنا نتقابل في الجنة. في الفردوس الاعلي يا كريم
انا اشكر الأخ المهندس البليغ واقول رحم الله والديك وصراحة كفيت ووفيت من غير قصور في الباقين وثقوا ان كل الردود التي قرأتها انها كانت تبكيني وتغرس فيني وردة أمل في وسط قلبي المكلوم واني اعيد قراءتها مرة ومرتين وثلاث .انت رائعون الله لا يحرمني منكم فانا اتكلم معكم بلغة صامته واكتب لكم بانامل مكلومة و اقرا ردودكم بعين دامعة أعلم ان الحياة ليست تنتهي عندها فأنا اعلم اني ولله الحمد لو بغيت الحين اتزوج ست ستها والله من بكرة اخطب ولا يجي اسبوع الا حنا بامريكا
لكن انا اعيش صدمة والله اني ماني مصدق بعد الصبر هذا تكون ردة فعلها كذا كان المفروض انا الي ارميها علي وجهها لكن للأسف الضرب في الميت حرااااااااااام
انا قررت قرار والله اني مجبور عليه بسبب المؤخر وهو "" إذا تبي تتطلق تروح للمحكمة وتبشر اليوم الثاني وصكها عندها وما ابي منها شيء "" ولو مافيه مؤخر كان انتهت القصة من قبل لا ارجع أما بعد الي سوته فيني من بهذلة و سنة كاملة هي من جهه والجامعة من جهه ثانية وانا صرت منضغط طول الفترة وكنت احمد الله اني ما سكنت جنب عائلة سعودية كان افتضحنا من كثر الصياح في البيت فمستحيل انها ترجع لو لم يبقي في الارض الاهي والله اني افضل اعيش عزابي واموت لوحدي لا ولد ولا تلد لو يصير عمري 200 سنة ما ترجع لي هذه الناكرة الجاهلة البائسة .
فيه موقف بسيط ودي انكم تقرؤونه
صار زعل ما اتذكر ليش بس طلعت لغرفتها وتتكلم وتقول اطلع برا البيت قلت لا قالت اطلع وصياح قلت خلاص انتي فوق وانا في الصالة تحت وخلاص اعتبريني برا البيت قالت بيجوني زميلاتي كلمتهم وبيجون قلت امري لله تعرفون انا انسان بيتوتي رحت ودقيت علي زملائي وقلت ابي نطلع كفي قالوا الشباب اوكي رحنا وصلينا بالمسجد وبعدها رحنا للكفي بعد ما جلست مع الشباب طلبنا الطلب اتصلت الست هانم طلعت برا ورديت وقلت خير ان شاء الله وش تبين سكتت قالت ليش ترد علي كذا قلت ياسلام العصر تقولين اطلع برا البيت والحين وش تبين قامت تخاصم سكرت الجوال في وجهها ورجعت للشباب واعرف انهم شايفين الاحداث علي مراسم وجهي بس يحاولون مجاملتي بعد شوي بدا الجوال يدق ويدق خليته علي الصامت بعد قليل جاءت رسالة منها تقول بترد والا والله لاسوي في نفسي كارثة . رحت ودقيت عليها قالت انت وينك قلت في الكفي قالت الكفي الفلاني الي فيه حريم وانت ما رحت الا علشان الحريم وووو الخ قلت لا عاد تدقين انا باجي بكيفي وقفلت الجوال ورجعت للشباب و بعدها ترجع تدق وتدق وتدق والجوال علي الصامت انا مطنش الجوال فجأة الجوال سكت
وحنا نسولف واحد من زملائي جاه اتصال وقام راح يكلم وقال الثاني المكان طفش وش رايكم نروح بيت احسن قلت الله يحيكم في بيتي لاني انا الي دقيت عليهم وقلت باسبقكم وبعد ماركبت سيارتي كان الجوال طافي لانه مخلص الشحن.
خويي الي كان يكلم بالجوال كشح النور العالي علي مرتين انا قلت يمكن يمزح سبقتهم للبيت وقلطتهم بالقراج تعرفون بيوتهم ما تقدر تقلط الشباب لانها مفتوحة علي بعض المطبخ والصالة فنستخدم القراج كمجلس المهم دخلت البيت و احصل المطبخ كله (قزاز) مكسرة الست هانم كل فناجيل الشاهي والقهوة وبعض الصحون رحت لها وقلت خير ليش مسويه كذا قالت انت طنشتني وانا لما دقيت عليك كنت ابيك تجيب عشاء و نتعشي قلت انا لا والله بإستهزاء لولا رحمة الله وان زملائي في المجلس كان ارتكبت جريمة وقتلتها قالت انا كلمتك خويك وقفل الجوال في وجهي طبعا لما سمعت الكلام ابليس جاء وجلس فوق راسي واعطيتها كف ملعون والدين والله انه بغي يكسر وجهها والله رحمني بوجود زملائي في القراج ولا قسم بالله يمكن اكون بالسجن الحين الحمد لله
والله يا اخوان جيتهم للبيت كانت مالها داعي و ما استمرت اكثر من ساعة بس هذي من رحمة ربي
وبعدها كلمني اليوم الثاني خويي يقول انا ما اشك بزوجتك بس وش الجراة الي تخليها تدق علي قلت حنا هنا اخوان يعني لو دقت عليك عادي من باب انها كانت تعبانة وجلست اصرف الموضوع وانا والله ياقلبي مو يغلي احس اني ابي اذبحها طبعا هي اخذت رقم جوالة من زوجته .
وش تبون اقول يا اخوان كل شيء اسوأ من الي بعدة لكن الحمد لله ولا اعتراض لحكم الله
انا احس اني في تحسن مع التواصل في قراءة ردودكم الجميلة والله يجبر الخاطر و يجبر خواطركم يا اروع ناس بالدنيا تصدقون وانا اكتب لكم احس اني مع اهلي الله لا يحرمني منكم
و بالنسبة لأسئلة الخت همس 2009
مانقاشتها بتصرفاتها من تسلط وتأمر ..ماوضحت لها شعورك اتجاه تصرفاتها ..؟؟
إلا كلمتها وقلت اذا كنتي تتوقعين اني بأكون تبعك فشيليها من راسك
ماتذمرت يوم عليها من افعالها ؟؟؟
كل يوم تجي مشكلة كنت اتكلم معاها بعد ما نتراضي و اعلمها بس لا حياة لمن تناديوما هي صفاتها من ناحية اخلاقها بنظرك انت ؟؟بعيدا عن افعالها اللي انت ذكرتها !!
يا اختي انا كنت اعشقها و اموت فيها وكنت اذا ضحكتها احس اني ملكت الكون بيدي واذا ضميتها كنت احسن ان ما في الدنيا غيري وغيرها وكنت احب اسمع ضحكتها و اناظر في عيونها كنت احس ان القمر امامي وليس فوق راسي و ما اصبر اشوفها تبكي و كنت اشوفها بعين النحلة التي لا تقع الا علي الازهار ولم تكن عيني كعينها "" عين الذباب "" التي لا تقع الا علي القمامة .
الان
مالذي تنوي فعله ؟؟ هل تريد ارجاعها ام الانفصال افضل ؟؟
بصراحة ما اود ان اسمع اسمها ولا اسمع صوتها ولا اري وجهها والله يختار لي الخيرة
اما من ناحية التواصل فلم يعد هناك اي تواصل من شهر محرم الي الان لا اتصال ولا غير اتصال وكل ارقامي غيرتها