اهلين ياحلاوة
ربي يجعل أيامك كلها حلاوة

بداية ياعسل
خذي هالنصيحة وربي ماراح تندمين ابدا إن شاء الله
لاتطلعين من بيتك الا بضرر
لاتطلعين مشاكلك لأي أحد أيا كان امك ابوك امه ترا مو من صالحك

والحين نجي لمشاكلك معه
**الشكل والجسم
شيء طبيعي بالبداية يفاجأك الشكل والجسم لكن صدقيني بعدين راح تعتادين عليه ويمكن تشوفينه اطخم شيء بالعالم
وجسمه صدقيني هو متضايق منه بس مكسل يسوي رياضة
انتي ولايهمك
شخصية زوجك فيها كثير من زوجي حتى الصفات الخارجية
المهم انا تزعجني زوائده بس ماقلت له عنها
قلت له مرة ان المشي صحي للقلب ويقي من امراض السمنة خلنا نمشي مع بعض كل ليلة
ومع تكرار الموضوع بين الوقت والثاني صار يروح للمشى يوميا لحد ماالوت رجله ورجعت الكرشة هههههه
المهم
ان هالنوعية من الرجال تكره (إلقاء الاوامر)و برضو تتصرف بعكس الفعل إذا حست بانتقاد او عدم تقبل>>على الرغم انهم اساتذه بالانتقاد
لكن مرررررة يمشي معهم المدح + الدفع المبطن
مثلا زوجي كنت امدح اشياء عنده علشان يحس بالثقة ناحيتي واني معجبة فيه وبنفس الوقت المح على اشياء من بعييييييد

**الانتقاد
انا عانيت منه سنوات
وكان الحل ابسط مما اتصور
الحل هو الثقة+عدم الاهتمام بموضوع الانتقاد
يعني مثلا كان ينتقد نظافة البيت حتى صار عندي وسواس نظافة وصرت امشي وامسح باصبعي من الخوف وهو يزيد
ولما ينتقد اجلس ابرر اللي انتقده
لكني اكتشفت انه انتقاده لشخصيتي اكثر من اي شيء آخر
صار لما ينتقد عادي ماازيد واقول معك حق ولا ابرر واقول ماعليش اصلا ...
لا ولا كأنه قال شيء واخلي الوضع على ماهو عليه
لأنه بصراحة انا انسان لي كيان واهتمامات واشغال ومسؤوليات مو آلي اقدر اركز على مليون شغلة بساعة وحدة
بعدها تغير وصار يثق فيني اكثر وترك سالفة الانتقاد بنسبة كبيرة الحمد لله

**الاهتمام والحنان
برضو كانت هذي مأساة عندي
تعرفين اول الزواج كيف كان يقومني من النوم
يفتح الباب بقوة لين يكسر الجدار ويفتح النور ويصارخ نبض نبض لين اقوم والله اقوم وانا ابكي ساعات
لحد مرة قلت ترا مو معسكر عسكري خير ترا الهمسة تكفي
ومو بس موضوع القومة كثير اشياء كان دفش دفش فيها
ومع الوقت الحمد لله ترك الدفاشة
زوجك مو متعود على الجنس الناعم
متعود على الشباب ومزوحهم
مع الوقت بيتعود اكثر عليك
انا مااوعدك بتطور كبير وسريع
بس انتي راح تعودينه بأسلوبك وذوقك معه وردة فعلك على اسلوبه يعني مو تضحكي والا .. بس بوزي وقولي اكره هالاسلوب ولا ارضاه لنفسي ممكن يتريق عليك بس صدقيني مرة عن مرة بيتغير ان شاء الله

**الموسيقى والصلاة
ادعي له ترا والله ربي الهادي
دائما رديي (ربنا هب لنا من ازواجنا وذرياتنا قرة اعين واجعلنا للمتقين اماما)
وسوي اللي عليك وربي بيهديه إن شاء الله

**انتي خففي شوي من انفعاليتك
كل مارديتي هو بياخذ موقف الدفاع
لكن لو سكتي بيفكر بنفسه وممكن يستخف نفسه
اول مايبدا الموال استغفري وربي ترتحين وهو بيسكت>>مجربة
ومو كل شيء تحملينه محمل الجد
بعض الاشياء فريها للوناسة وسعةالصدر
خصوصا إذا ماتعدى حدوده

**التوقيت
عودي نفسك تكونين جاهزة من بدري
وبرضو اطلبي منه توقيت دقيق
لأن هالنوع مريح انه دقيق بمواعيده
بس تتعودين عليه بترتاحين إن شاء الله

**اخيرا ياعسل
كثري استغفااااااار واتركي هالشاب مالك فيه ترضين زوجك يفضفض على وحدة مهما كانت درجة الاحترام والرقي عندها!
احفظيه بالغيب وربي يحفظك
وكل ماحسيتي بضيقة ومشاكل ارفعي يدك
ربي يسمعك
وبيده امرك
وهو على كل شيء قدير

الحين قومي صلي ركعتين وادعي ربي يسهل امرك ويفرج لك
واستخري باللي اقوله لك
ارسلي له رسالة انك تحبينه وتشتاقين له ومتأكده انه هو بعد يشتاق لك
وانك ماترضين يدخل بينكم الشيطان وان طريقته ماترضيك لأنه بعينك اكبر من كذا ولاترضيتها له مثل ماترضينها لنفسك وانك تحبين الحياة معاه بكل تفاصيلها الحلوة بس هالشيء يدمرك وهو اقوى من انه مايقدر يغيره
وماشاء الله اسلوبك مرة حلو وبتقدرين تعبيرنها باسلوب حلو
ولما يجي بكرا
اعزميه عالقهوة المغرب وروحي معاه>>كأنك واثقة تماما انه بيلبي لك اللي تبين

صدقيني الرجل يحتاج من زوجته التقدير والثقة وهو راح يمنحها الكثير
ربي يسهل امرك ويفرج لك