لكل من تفاعل معي لكم الشكر الجزيل على مشاركتي همي والادلاء بآرائكم التي استفدت منها بشكل كبير جزاكم الله كل خير ووفقكم في الدراين
حبيت اوضح للي حرصوا على تطورات الموضوع ان الموضوع ما استجد بأي شكل من الاشكال كل ما حاولت القى حل اجيبه يمين يسار مافي فايده ,, كل ما اقول بديت اتقدم خطوه ارجع لورا مية خطوه
في اليوم اللي قررت اني اكلم بنات الجيران واعزمهم في البيت دقيت على البنت عشان يزورونا قالت لي ياليت والله نجي بس بكره مسافرين .. طيب سافروا ,, وراح يرجعون بس متى يرجعون لما نكون احنا بدينا نرمم البيت وما راح يخلص الا بعد شهر او اكثر الفتره هذي ما نقدر نستقبل احد واحتمال نطلع من البيت مره وحده
قلت الحين بيخلص القلق والتفكير في هذا اللقاء المبهر لقيت مافي نهايه للقلق والهم
عيا الحظ ما يضبط معي كل ما اقول بتفرج اشوفها تتقفل بوجهي اكثر والله انا منحوسه او دعوه صابتني كل يوم اسمع عن ناس بنات واولاد وناس كبار تجيهم اخبار تفرحهم ما شاء الله عليهم ما احسدهم والله يزيدهم من النعيم اكثر واكثر بس انا ما جاني خبر يسر لا وظيفه ولا زواج ولا تسلسل الاحداث الحلوه اللي تصير بعد الزواج من سكن بيت جديد وحمل واطفال ولا شي وش بقى من العمر من يضمن انه بيعيش ربع اللي راح .. خلاص مليت وانا اصبر نفسي بكلام كلنا عارفين اننا نصبر انفسنا فيه وبس ( انتي باقي صغيره .. ومااشتد الحبل الا وانقطع .. ونصيبك راح يجيك .. اطلعي خلي الناس يشوفونك .. اشغلي نفسك باي شي .. الف واحد يتمناك بس اصبري .....) طيب وبعدين والنهايه
والمصيبه الناس اللي احبهم واحطهم بعيوني هم اللي صاروا يعايروني شافوني ما اهتم لكلام الناس اللي برا قالوا احنا نخليها تهتم ونسمعها كلمتين زي السم .. قسم بالله حتى الاطفال تكلموا عيال اخواني اشوف في نظراتهم علامات تعجب بنت اخوي عمرها 6 سنوات امس تسألني انتي ليه للحين ما تزوجتي وليه ما عندك عيال مثل ماما < ناقصتها انا طبعا
قالت انتي ماراح تتزوجين اذا صرتي عجوز , بس لازم اول شي تكبرين شوي وبعدها راح تتزوجين ( لا والله طمنتني رفعت معنوياتي الصراحه )
لا وقبل فتره اختي الصغيره باول ابتدائي انا امها طبعا انا اللي اهتميت فيها وربيتها ودللتها اخر دلال وحطيتها بعيوني في الاخير حصل سوء تفاهم معها قالت روحي اطلعي من البيت المفروض انك متزوجه مو عندنا في البيت ؟؟ ؟؟ وش اسوي طيب انتحر مثلا
والله شي يقهر وجهي ماصار شي قدام زوجة اخوي انثبرت وقتهاورحت غرفتي والكلمه تصقع باذني للحين
متضايقه مره والاحداث اللي صارت تراكمت وبديت ادقق على اللي صار
اللي زادني قهر ان محد يسأل ولا احد يهتم الكل مشغول بنفسه وعياله وانا ما علي خلاف
والله ما اذكر متى اخر مره طلعت فيها من البيت اقول بكره بيجي اللي يعوضني بس مدري وينه الظاهر جاي بالطريق بس ياخذ نفس استراحة محارب
سامحوني بس والله ما عاد اطيق الوضع هذا ابغا افضفض قبل ما انفجر
وش اقول وش اخلي يمكن العوض في الآخره خير من الدنيا ومافيها
الله لا يجعلني من اليائسين والله لا يواخذني على الكلام كل اللي املكه هو املي في الله انه ما يخيبني ولا يطول انتظاري اكثر
اتمنى من مشرفات القسم غلق الموضوع ونقله لأي منفى
__________________
دعاء لجلب الرزق وسعة العيش بإذن الله اذا ضيق عليك في الرزق فقل :
( حسبنا الله سيؤتينا الله من فضله إنا الى الله راغبون )
التعديل الأخير تم بواسطة ~ أمل ~ ; 24-05-2011 الساعة 05:34 PM