منتدى عالم الأسرة والمجتمع - عرض مشاركة واحدة

25-05-2011, 05:26 PM

#39

روح الطير

كبار شخصيات المنتدى

تاريخ التسجيل: May 2005

المشاركات: 12,052

ندى ...

صدقتي و الله ، الطفل ما حتفرق معاه بعد كذا .. عشان كذا جيت سألت ؟
لإنه ولد قريبتي زي كذا ، ما يسمع كلام أحد .. لإنه متعود عالضرب و ( يتلذذ ) به ..
من جد ، يجلس يضحك يوم ينضرب و يعاند أكثر و أهله تعبوا منه

و مرة الكل استغرب منه ، يوم نفذ لي طلب طلبته منه ..
و مو عارفين إيش السر و كيف سمع كلامي و معروف إنه أشقى طفل في العيلة ومجنن أهله ؟
و السر ، إني دايم أمدحه قدام الناس و أرفع من معنوياته و يموت فيا ، حتى أمه تستغرب منه ؟
تقول عمره ما يحب أحد و لا يبوس أحد و لا حتى يسمع كلام أحد ..

عشان كذا انقهر من ولدي ؟؟؟

ليه يعاندني و أنا اللي ما أضربه و دايم أمدحه و أتكلم معاه ؟
يبغالي أبدل ما بينهم ، عشان يعرف قيمة أمه و أبوه

الصراحة ، بديت أؤمن إنه ( الضرب للولد ) مرات لابد منه .. <- مهرة بتنبسط دحين

بس ( بشروط و قيود ) ..

و أفتكر يوم ولدي كان أصغر شوي وو ما كان يتكلم لسى ،، و يوم يبكي ..
يجي أبوه بيضربه ، فأوقفه و أقول له أستنى أكيييد فيه شئ يبغاه و نحن مو فاهمينه
و يطلع من جد ، يكون هناك شئ مخليه يبكي ..

......................................

زحمة ذكريات

قلتيها و الله ، ولدي في البيت و معاي و مع أبوه .. مافيش أحلى و أحسن منه ..

بس إذا أرسلته للروضة أو إذا تركته مع أولاد أخواتي كم ساعة يلعب معهم ..
تلاقيه يقلب علي و يعمل حاله ( رجال ) علي و تتغير أخلاقه ..؟؟؟

ما أعرف ليش بيتغير ؟؟؟

الكل يقول إني مدلعته ، بس أمي الوحيدة الله يسعدها ، اللي تقول لي :
( دام ولدك عاقل ماشاء الله و يسمع كلامك ، فلا تشدي معاه .. سيبيه )

أنا ما أضربه ، بس إذا شفت مثلا أخلاقه مرة بدأت تتغير ،، فأحاول أدور عن السبب ؟
قلت في داخلي ، احتمال إنه بيشوف بزورة أخواتي يردوا على أمهم و يتصارعوا .. فيقلدهم ؟؟؟
طبعا ولدي كان ( متغرب ) فترة و دحين اللي بدأ يختلط مع أولاد الأقارب

بس ليش بيتغير يوم يروح الروضة ؟ مادري ..؟؟؟
المفروض يتحسن مو العكس ..

.........................................

شيهانة ..

مع حق في نقطة ( التدليع ) ..
و الحمد لله بديت أحط له حدود في الدلع ،.

من زمان كنت أقول لزوجي ، ولدي من يوم يصير عمره 4 سنوات و يبدأ يفهم كل شئ ..
وقتها بأتركك تعلمه و تعاقبه .. بس دحين لسى طفل و مو عارف يتكلم عشان يعبر عن نفسه ..

و يوم أنزل السوق مع ولدي ، أعلمه ما يشتري أي شئ .. مع إنه الفلوس موجودة و الحمد لله
بس خليه يتعلم ،، و دحين في روضته أتقصد أحط له عصير في شنطته و كيك و حلاوة و ( ريال واحد )
لإني كنت من قبل ، أعطيه الفلوس من غير أي حساب ..

الأسبوع اللي فات ولدي يقول لأبوه ، يبغى يشتري ( ايفون 4 ) ..

و ضحكتيني في كلمة ( البربسة ) .. يعني كلام زوجي طلع صحيح ؟؟؟
إنه ضربي له عالكتف ، و لاشئ ..

أحسن شئ إني أشد شوي في ( العقاب ) ..

و لا من ناحية الحنان و المدح و الدلع ، فأحسه شبعان منهم ..
و هذا اللي مخليه يتمرد علي و يبدأ يطنشني و يعاندني ..