صحيح قيادة السيارة مو ضرورية للجميع
لكن فيه حالات يا بنت الحلال شفناها فعلا الأب والاخوان ساحبين على أهلهم ولا كأنهم تحت ولايتهم
وحتى لو فيه عم ولا خال مو دايما قريبين ولا ملزومين فيهم بوجود زوج ولا اب ولا ابن
هذا بغض النظر عن الناس اللي ما عندهم أب ولا أخ ولا زوج
وغير ظروف سفر بعض الأزواج أو الآباء أو الاخوان لأعمالهم
مشكلتنا غير انه بيكون شيء جديد على المجتمع المسافات البعيدة بين المناطق وقلة الوعي بثقافة القيادة
بعض اللي عندنا أستغرب كيف معطينهم رخص
الشوارع مخالفات مرورية كثيرة ومرات قدام المرور
هذا غير الهجولة في الشوارع من بعض الشباب بغير سبب
ويمكن مع قيادة المرأة بتزدحم الشوارع على غير سنع فوق ما هي زحمة أساسا في المدن الرئيسية
قريباتي في دول الخليج يسوقون ولا عليهم وما قد تعرضوا لمشاكل بفضل الله
ربما مشاكل بعضهم من نوع اتكالية الزوج أو الأب عليهم في كل شيء
مشاوير المدارس والمستشفيات ومقاضي البيت وكل شيء
أما تحرشات ونزع حياء ونزع حجاب مافي الحمد لله
ولفلفة في الشوارع ما عندهم تقضي أشغالها وترجع مو من حبهم لأنه شيء عادي ووالفين عليه
بنظري تعلم القيادة أمر ضروري
أنا شخصيا وقت نسافر وزوجي بالسيارة ويتأخرالوقت علينا تجي زوجي حالات نوم
ويرجرج فينا السيارة ومرات يوقف على جنب الطريق والمكان يروع في قطعة
ما في محطات قريبة ولا الشوارع مضاءة
فدايما أقوله علمني أسوق تمام لحالات الضرورة لا قدر الله
أو حتى أكمل الطريق وانت نايم بدل الوقفه في مكان يروع غير إننا نضيع وقت
هذا غير إننا في مدينة مافيها من أهلنا لو صار عنده شغل ولا شيء وتعب أحد من العيال ولا صار حادث مفاجيء
فأقرب شيء اتصل على الجيران لو عندي سيارة خذتهم على طول من غير أزعج أحد واربطهم فيني
لكن تبقى قيادة المرأة لو طبقت عندنا شيء جديد على المجتمع
وكلش بيتأزم لازم تنحط خطط وعقوبات وتنظيم واضح
بس انه الموضوع صاير قضية من قضايا العالم ماله داعي
وحركات البعض إلا تسوق غصب وتصور روحها بعد مالها داعي
جزاك الله خيرا على حرصك
التعديل الأخير تم بواسطة colors ; 26-05-2011 الساعة 09:06 PM