شاب في مقتبل العمر ورحلة الإدمان : ( !
السلام عليكم ورحمة الله وبركاته
اخواني بقولكم قصة واحد من اقاربنا وهو شاب عمره 24 سنه بداية قصته عندما ترك الدراسه وهو في صف ثاني متوسط وذهب مع شلة شباب فاسدين - وانمسك مره بالهيئه ومعاه واحد من اخوياه ولقوا معهم حبه " حبوب " وصارت سالفة وكل واحد يقول مو لي للثاني - المهم كلهم انسجنوا تقريبا لمدة 45 يوم .. وطلعوا بعدها ، والشاب هذا من بعد ماطلع من السجن وظهرت عليه تصرفات غريبه ! دايم يسرق من آهله فلوس ذهب أدوات كهربائية كل شي ينباع يآخذه ويبيعه ، أخر مره سرق من ابوه تقريبا 2000 ريال ، ومايدرون وين وداها ..
وتقريبا قبل كم يوم مسكوه وهو بياخذ مكيفات من مستودعهم عشان يبيعها ، قامت مسكته امه واخوه الكبير واخوه الصغير وضربوه على اساس انهم يبون يعرفون وين يودي هالفلوس ، تركهم وقام للحمام وإنتوا بكرامه وشرب كلوركس - يعني بينتحر - لحقوا عليه اهله و ودوه للمستشفى وصار تحاليل وغسيل معدة وما الى ذلك ..
المهم اتصلت ام الولد بـ ولد عمه وكلمته وقالت له يودي ولدها مستشفى الامل عشان يكشفون عليه اذا هو مدمن او لا ، لأن تصرفاته مرره تبين انه انسان مدمن
وطبعا صار وكشفوا عليه وتبين ان مدمن بـ نسبة قليله في الدم ..
دروا اهله وهاوشوه ولكن لا حياة لمن تنادي .. اخرها اليوم سرق من ابوه 150 ريال وما تاب ...
تكفون قولوا لي وش التصرف الصحيح مع هالولد ..
لا تقولون مستشفى الامل ، لأن اخته كلمتهم وقالوا لازم موعد وما الى ذلك ، وانا ابي حل سررررررريع جدا ‘ لأن لو تركوا الولد على هالحال بتطوور والله وبيصير مدمن من غير شر 
مع العلم إن الحالة الاجتماعيه للولد ميسوره
والده مصاب بمرض نفسي لانعلمه
الام والاخت مابيدهم شي يسوونه
الاخوه وجودهم كعدمهم
وهم في منطقه بعيده عن اهاليهم - اي انهم غرباء في المنطقه التي يعيشون بها الان .
لا تبخلوا بالمشورة والنصح ، جزاكم الله خيرا وسدد خطآكم ..