السلام عليكم ورحمة الله وبعد:
راح اقول اللي بقلبي موضوعي ملخبط شوي وان شاء الله تكونون وسيعين صدر معاي

انا عمري 18(على الأقل بعد اسبوع) سعودي ومشكلتي هي الخوف من مواجهة الاخرين

منذ ان كنت صغيرا وقد نشأت على الطيبة(الزائدة) والاحترام والبعد عن المشاكل

هذا الموضوع لأول مرة اطرحه على احد لأني تعبت بصراحة وما احب اقول مشاكلي لغيري,يمكن تكون مشكلتي سخيفة لكن بالنسبة لي كما يقال(بلغ السيل الزبى)
لا اعلم هل ما اعانيه هو ضعف بالشخصية او هو جبن او خوف غير مبرر
كثيرا ما اواجه بالمدرسة(انا صف ثالث ثانوي) مضايقات في الفصل من بعض الطلاب ولا ارد, اما لأن الذي امامي طفل لو رديت عليه راح يزيد.او لأنه من (المهايطية)اخاف ان اضرب او يأتي لي بشلته لأني وببساطة اصدقائي قليلون
في حياتي ما قذفت ام احد او سبيت سب(بذيء جدا) لاني صراحة استحي واعتبر سكوتي هذا ضعف حتى لو سببت من احد ما ارد عليه الا بسب(خفيف)
انا محتقر نفسي مرة وانعزالي مقصر في صلاتي مدمن على العادة (السيئة) اللي اتعبتني وحاولت اتركها لكن ما قدرت.
دايم على الاب توب (مفيد وغير مفيد) او اقرأ المهم اني ما احب اطلع ,اخر مرة طلعت لمجمع بدون مبالغة من ثلاث سنين,ولا احب اطلع مع اهلي , دايم انحرج بزيادة لو كنت قدام حرمة حتى لو من محارمي كثير ما ارفع صوتي على والديني مع اني والله اندم,ما ادري لو احد تحرش بخواتي هل ممكن اني اقدر ادافع عنهم او لا(ما صارت لكن انا دايما احط افتراضات) كنت حافظ القران والحين شبه نسيته بسبة رفقة السوء (وهذا احد الاسباب الي خلتني ما اسوي صداقات مع احد)
ابوي (وهذا سبب موضوعي كله) نفس شخصيتي تماما,وهذا اللي كرهني بنفسي ما ابي اصير مثل ابوي

لأن ابوي ما ياخذ حقه لو انظلم,متسامح جدا,دايما يكذب على امي لو سوى شيء غلط(عشان ما يطيح بالمشاكل) او يقولي لا تقول لأمك شيء,وايضا يعتمد على غيره في اموره ولا يتصرف ومقصر في صلاته وينام عنها ويطالع افلام(توصل للجنسية) وانا عارف وساكت وكم مرة واجهته,وفيه اللامبالاة يعني لو فتحنا التلفزيون وشفت المسلمين في فلسطين اوالمساكين في ليبيا او سوريا ,واقوله تخيل احنا مكانهم وما ودك لو تساعدهم ,يقول دام انك ماكل وشارب مالك دخل في غيرك
دايما يقولي لا تتهاوش مع احد حتى لو شفت خويك ينضرب مالك دخل(وهذا اللي خلاني اكره هالضعف وما ودي اصير مثله),ابغى الحق على حالي قبل ما تصير هذي شخصيتي طول حياتي

امي على النقيض من الوالد(شخصيتها قوية جدا جدا) محافظة على العبادة,ولكنها ودايم تحبطني برجولتي واني خواف وجبان وما اقدر اتصرف(طبعا نفس الحال مع ابوي)

انا ماراح اتعذر باخطائي وارميها على ابوي انا ابي بس احل مشكلتي

عموما امي واضعة امل كبير فيني واني اصير مهندس او دكتور(انا متفوق ويمكن الصفة الوحيدة الحلوة فيني) وانا والله احبها واتعب في دراستي عشانها واحقق لها اللي ما حققه ابوي لأنها صارت لها مشاكل كثيرة في حياتها غيرتها وخلتها عصبية لكن الله يهديها على اسلوبها(للعلم حالتنا المادية متوسطة)
وعندي قناعة اني ما راح اصير اللي تبيه امي الا لو غيرت شخصيتي الضعيفة
انا دايما اشارك برأيي واقول كلمة الحق,لكن اخاف اتواجه مع الشباب في المضارب(يمكن لاني قصير طولي 170 سم)

خوفي هو من المجهول ومين اللي بتقبل فيني مستقبلا وانا بهذي الحالة وكيف راح اربي عيالي واخليهم رجال ما يخافون الا ربهم,

ابي حل لانعزاليتي والخجل الزائد وتقصيري في صلاتي والقدرة على مواجهة الاخرين واخذ حقي لو انظلمت لأن عندي قناعة انه في هذا الزمن ما تنفع الطيبة

وابيكم تسامحوني على طول الموضوع