المشاركة الأصلية كتبت بواسطة شوك11

تبين تعرفين ليش مجتمعنا ذكوري
أقول لك وفكري في كلامي زين
مجتمعنا ، تحكمه الهيئة الدينية ،والتي هي ذكور فقط
لذلك ترين كل الفتاوي مسيرة لمصلحتهم لأنهم يمشون حسب طبيعتهم التي خلقوا عليها وهي الأنانية
الرجل مخلوق وهو كل شي له
خلق أولاً وقبلها هُيئت له الجنة ليسكن فيها وينعم بالعيش
وحتى لا يشعر بالضجر والضيق خُلقت له حواء ليسكن إليها وينعم بالراحة
الكون بأكمله لم يُخلق إلا للرجل، وكل شيء في هذا الكون يجب أن يكون مسخراً لهذا الرجل
هذه هي الفكرة الأساسية يعني head Line اللي على أساسها تندرج بقية التصرفات التي تجعل مجتمعنا ذكورياً.
بعدها جاء المشايخ هذا الزمان ومن قبلهم ليوجهوا الفتاوى لصالح هذا الرجل الكامل العقل والدين والذي لم يخلق إلا لأجل أن يكون كل شيء مسخر له ، هو وحده
أبسألك ، زواج المسيار الذي سكت عنه بن باز والعثيمين ( ولا يجي أحد يقول له ظروفه ) من يخدم في الأول والأخير؟
أليس الرجل ، لا سكن ولا نفقة ولا أولاد مجرد متعة فقط ، لذلك البعض أسموه " زنا مقنن" واللي يجي يرد علي هنا فيه يكتب قبلها أنا أرضى أن يتزوج ابنتي رجل يدق عليها تلفون وتفتح له الباب وياخذ غرضه ويطلع وأنا جالس أتقهوى في المجلس ما علي منهم لأنها زوجته!" أتحدى أي شخص يرضى بذلك
طيب رح أقول لك شي ، حفظونا عظم حق الزوج على الزوجه بأحاديث السجود له وغيره ، لكن هل أخبرونا أن المرأة ليست ملزمة بالطبخ والتنظيف وأكدو على الرجل مثل ما يأكدون علينا ، هل أخبرونا أنها تأخذ أجرة على رضاعتها لولدها ، بل بدل هذا كله ظهروا لنا بفتوى أن الزوج غير ملزم بمعالجة زوجته إن مرضت والسلسلة طويلة وخذي وخلي.
الرسول عليه السلام لم يقبل على بناته بالتعدد ، ووقف في وجه علي رضي الله عنه حينما أراد الزواج على فاطمة ولو تكلمينهم بيقولون هذا الرسول ولا تقارنين نفسك فيه وبناته ، أليس هو عليه الصلاة والسلام قدوتنا، وراكم تقتدون به في التعدد؟!
طيب أبقول أمر آخر " رسولنا الكريم عليه أفضل الصلاة والسلام كان يشترط على أزواج بناته ألا يتزوجوا عليهن " هذي ليش ما قد سمعتها في حياتي ، ليش شيء مخبينه مشايخناالأفاضل وكأنهم مديرة مدرسة تخبي التعاميم اللي من صالح المعلمة عشان ما تعارض مصلحتها ، أرجع وأقول لاحد يقول هذا الرسول وهؤلاء هن أمهات المؤمنين رجاءً
تدرين يا صاحبة الموضوع إنني حينما أردت أن أغير شريحة جوالي وكان معاي جوازي وبطاقة العائلة رفضو مع إن الشريحة بإسمي؟!! وقالوا جيبي معرف وللأسف دخل وبدل وأنا في السيارة طيب يمكن هالإنسان اللي جايكم متهاوشه معاه وبيحرني وبيغير شريحة جوالي من وراي أو أي شي ، ليش وثقتوا فيه وما وثقتو فيني مع إن الأمر يخصني لوحدي
تدرين إنني فزت بمسابقة في سوق صحارى وكلموني أروح أستلم الجائزة ولما رحت قالوا وين محرمك ،ورفضوا يسلموني أياها بدون محرم!! مع إنه جائزة وأنا من حليت وأنا من فزت بها وش دخل محرميياخذ تعبي حتى لو هي جائزة ، عدا أنها مجرد جائزة رمزية لا تتعدى 200 ريال ، وتدرين إني لما رحت أطلع بدل بطاقة صراف رفضوا إلا بمعرف مع إني ببطاقتي وهذه أموالي وقد استودعتها البنك وأنا بكامل قواي العقلية ، بس ما وثقوا يرجعون لي فلوسي لأني حرمه خافوا ألعب فيها الظاهر؟
قلت لهم طيب أفرضوا إن المعرف الوحيد لي هو الوحيد اللي ما أبيه يعرف بحسابي عندكم ،يمكن يستغل أموالي ، قالوا مالنا شغل هذا نظام مؤسسة النقد
أكمل ؟