تغيرت نضرتي للحياة بعد المنتدى
اخواني اخواتي
الله يصبحكم بالخير والمسرات
من يوم دخلت المنتدى وانا اقرى في المشاكل الزوجيه وفي قسم المطلقين والمنطلقين المهم اني تعوور قلبي كثير والله في احد المواضيع خنقتني العبره وغرقت عيوني وانا في المكتب في العمل زين ما دخل علي احد من هول ما قريت من مصيبه وكل ما قريت في مشاكل الرجال وشكواهم على ازواجهم زاد حبي وتعلقي بزوجتي وكل ما قريت في مشاكل النساء وتقصير ازواجهم فيهم اشك في نفسي واحاول ما انقص على زوجتي واشوف العيوب اللي تشتكي منها الزوجه هي فيني ولالا
المهم واللي ابيكم تساعدوني فيه انا الحين قررت اتغير الى الافضل واحاول اني ما انقص على زوجتي بشي
هي على كل الاحوال لاحضت فيني التغير بدون ما تدري عن السبب
من يوم الخميس كنا معزومين والجمعه كامل اليوم مع زوجتي ولا طلعت وعزمتها على عشا برى البيت في مطعم وصرت احاول اني ما اقصر معها وامس بعد جالس كله بالبيت ونمت بدري
مع العلم اني من اول ماني مقصر اسمعها كلام حلو وادلعها باسم حلو تحبه هي كثير واذا سوت شي اشجعها بستمرار على الاشياء الجميله اللي تقوم بهاا وفي الشهر نطلع كم مره نتعشا في مطعم راقي غير المناسبات العائليه والمناسات الخاصه فيها
وكنت في السابق معتقد اني من افضل الرجال صبرا وتدليلا لزوجته
حتى امس اتصلت عليها من الدوام اسلم واتطمن قالت وش عندك بغيت شي قلت لا بس اتطمن عليك
مع ان ما فيها شي وهي استغربت وانا نقدت على نفسي ماهي متعوده اتصل عليها من الدوام
المهم اخاف اجي كلي وادللها اكثر واجيب العيد 
ادري كل شي اذا زاد عن حده انقلب ضده
الحين انا ودي اكون معها زين بالمعقول وما اقصر في جميع حقوقها
واحاول ان حالتها ما تجيها
اليوم الصبح يوم قمت لقيتها جالسه وجههاا منور ونفسيتها حلوووه والحمد لله
صحيح المثل اللي يقول اذا شفت مصيبت غيرك تهون عليك مصيبتك الا تحس ان ما عندك مصيبه 
اذا عندكم توجيهات لي لا تبخلون علي الله يخليكم
والله يكون في عونكم جميعاا