كيف أتعايش مع صفات زوجي ( الحسد - الحقد )
السلام عليكم ورحمة الله وبركاته
أخواني وأخواتي أسعد الله أوقاتكم بالخير..
أتمنى تنصحوني وتوجهوني فأنا كل يوم أندمر أكثر من اللي قبله..
أنا مطلقة ومنجبة من السابق.. ومتزوجة مطلق ومنجب من طليقته..
أنا موظفة طبعا زوجي موظف ومايصرف علي إلا فتات الفتات وراتبه لعياله وأمهم..
كانت بالنسبة لي هذه مشكلة !!!
لكني مع العشرة مع زوجي اكتشفت المشكلة الحقيقية
وهي
زوجي للأسف الشديد حسود طماع لحد الجشع وما يملي عينه شي..والحسد تحول لحقد..
عشان تفهومني
يحسدني إذا اشتريت شي لنفسي وللبيت
يحسد بنتي إذا اشتريت لها شي
يتمنى كل شي يشوفه عندي وكل فلوسي تكون لأولاده...وأهله وأهم شي عنده اخواته..
يعني محرومة مايصرف علي..وكنت أعتبرها مشكلة
لكني محرومة أمتع نفسي وبنتي بفلوسي
صراحة تمشكل معي مشكلة كبيرة منبعها الحسد ..
من بعدها انكسر خاطري لحد الموووووووووووووت..
لكني مشيت الموضوع وهديت الوضع..ماأبغى الطلاق..
والمشكلة متواصلة مع أهلي
كيف أسد عينه عن أهلي؟؟
كل شي يحصل يكون قدام عيونه.. لأنه صار واحد من الأسرة..
يعني زواجات أولاد وبنات أهلي الحمد لله بفضل الله بتصير في احسن الأماكن
عيلتي بفضل الله يشتروا سيارات من أحسن الموديلات
وقيسوا على ذلك كل شي.....
كل اللي عندي وعند أهلي من خير الله وفضله ..اللهم ادمها نعمة واحفظها من الزوال..
كيف أسد عينه عني وعن راتبي وعن مادية أهلي؟؟
ايش الأسلوب المناسب اللي مايسبب مشاكل؟؟
كيف أوصل له ربي موزع الأرزاق والناس طبقات واللي يطالع فوق رقبته تنكسر؟؟
مع العلم أنا مو مقصرة معه ماديا...لكنه مايشبع..
سيارة واشتريت له من أحسن السيارات
جواله ياما سددت عنه
مخالفات مرورية وساهر ياما سددت
هذا غير الهدايا بمناسبة ومن غير مناسبة
أولاده ما نسيتهم في جميع المناسبات..من أعياد وغيره..
هذا غير أنا شايلة البيت ونفسي وكل شي..
كيف يكون علاج الزوج المحروم ماديا سنين طويلة ..ولما شاف النعمة صار جاحد وبطران وما يملي عينه شي
وشعاره هل من مزيد..
أنا صايرة أخبي وأدس أشياء كثيرة..وهذا مو طبعي أبدا ولا قادرة أعيش بطبع مو طبعي..
والله يوم عن يوم يزيد أفقد الأحساس بالأمان مع زوجي..
والمشكلة الثانية حاسدني على راحتي
عشان تكون الصورة واضحة أوضح
أنا عدد ساعات دوامي أقل منه وراتبي بفضل الله ضعف راتبه..
يحسدني على هذا النعمة ويحقد ويبان القهر بوجهه ويرمي كلام إني مرتاحة وهو التعبان
الرئيسة في العمل أعطتنا كل الموظفات اجازة يومين مكافأة حتى هذه انقلب مزاجه على طول
طول الوقت شغال مقارنات...
مع العلم عمري ماحسسته بالنقص إنه أقل مني في المادة او المستوى التعليمي او الإجتماعي..
أي نعم تحسابنا وتمشكلنا عشانه مايصرف علي ونقاشنا ومضارباتنا كأي زوجين..
لكن عمري ما جرحته بالكلام وحسسته بالدونية..بالعكس شغالة بالمديح وتكبير الراس..هع هع
من ناحية أهلي الكل يحترمه ويعامله أحسن وألطف معاملة وعمرهم مافرقوا بينه وبين أفراد العائلة
رغم الفروقات الواضحة للعيان.
والله ماعرفت كيف أصيغ مشكلتي بس هذا اللي في قلبي وما عرفت كيف أكتب..
انصحوني بحلول الله ينور دربكم ..
واللي عنده رد جارح رجاء يعفيني من قراءته..
التعديل الأخير تم بواسطة الماضي الدفين ; 29-06-2011 الساعة 12:19 PM
السبب: توضيح عنوان المشكلة