السلام عليكم ورحمة الله وبركاته



كل السالفه باختصار

احياناً اذا شفت امي المعاقه وصغيره في العمر تتعذب في قومتها ومشيتها وطلعتها من البيت ودخلتها تدمع عيوني ولا اقدر املك نفسي اطلع من البيت وابكي لحالي لأني ارحمها رحمه ما يعلم بها الا الله سبحانه وامي حنونه علينا مره وتخاف علينا كثير وانا احبها ولا اتخيل اني اشوف فيها مكروه ، صح انها كانت تطقني يوم اني صغير وكان ابوي يكرهني ويفضل ولد عمي اللي في سني علي (طفوله ضايعه)

بس اني احب امي مره ولا اتخيل انه يجيها شي ودايم افكر فيها وادعي لها

لكن المشكله اني ما اطيعها دايم يعني ما احب اطلع بها برا البيت مدري ليه

اذا قالت لي مشينا منا ولا منا تقوم الشياطين تناقز قدام عيوني واذا رفضت هي تحزن شوي بس انها على طول ترضى(يارب تخليلها لنا وتطول بعمرها)

وانا ما غير ضايق صدري عليها ودي اوديها كل مكان لكن المسكينه ما تتحمل الروحه والجيه

كنت ابي اوديها لمكه تعتمر لكن الظروف حدتنا على الجلسه (الشكوى لله)

المهم ان قلبي يتقطع على امي ولا ادري وش اسوي

اذا شفتها على هالحال اقعد افكر افكر في اي شي اسويه لها لكن بالأخير ما في يدي حيله وتصك فيني الدنيا ولا عاد يصير لي نفس حتى اشرب مويه

تكفون ادعوا لها ان ربي يشفيها ويعافيها ويفرحنا بشفائها إنه على كل شيء قدير

__________________
استغفر الله الذي لا إله إلا هو الحي القيوم وأتوب إليه