منتدى عالم الأسرة والمجتمع - عرض مشاركة واحدة - حياكم الله على الفطور عندي ورددا اللهم اغفر لهموارزقهم وزدهم خيرا

21-08-2011, 01:03 AM

...حلم حياتي...

عضو مميز

تاريخ التسجيل: Feb 2009

المشاركات: 286

حياكم الله على الفطور عندي ورددا اللهم اغفر لهموارزقهم وزدهم خيرا


	بسم الله الرحمن الرحيم السلام عليكم ورحمة الله وبركاته حياكم الله على الفطور عندي ويارب يعجبكم طبخي واكون بيضة الوجه وياكم اليوم فطوري عباره عن اصناف منوعه ومن الاكلات الرئيسه على مائدتنا سواء برمضان او غيره طبعا كنت عازمه اهلي على الفطور الله يخليهم لي يارب ويلايحرمني منهم راح ابديها لكم بالترتيب ,سفرتنا اليوم مكونه من: 1-شوربة كبة الحامض 2-تشريب لحم 3-دولمه 4-برتي بلاو 5-دجاج مشوي 6-باي الدجاج او (بف باستري الدجاج) 7-كبة حلب وسمبوسه هسه راح ابدي كل اكله بالتفصيل 1-كبة الحامض: العجينه عباره عن تمنّ(رز) مغسول ومصفى بعده نطحنه وناخذ الطحين ونضيف عليه لحم مفروم ويفضل لو بيه اشوية سمن نعجنهم ونفرهم سوى بالمفرمه ونكون مجهزين الحشوه وهي عباره عن لحم مفروم وبصل محموسين مع بعض ,طبعا اني مجهزتهم قبل رمضان بالفريزر نجي لطبخ احمس بصله صغيره مفرومه صغار بس تشقر اجيب عصير طماطم او صلصه بس العصير اطعم اضيفه على البصل مع فلفل اسود وكمون حبة فلفل احمر مجفف حسب الرغبه بعدها اكون مذوبه الشوفان بماء بارد واضيفه على الشوربه واخليها تطبخ 5دقايق وبعدها اضيف الكبه والملح واحركهم كل اشوي حتى لاتلصق واتركها تطبخ على النار لحد ما تتماسك الشوربه وتستوي الكبه وهذا شكلها 2-تشريب لحم: من الاكلات المهمه عندنا بالفطور واكثر شي يفضلها الرجال لذلك لازم تكون موجوده على السفره برمضان نجي لطريقه طبعا افور اللحم بماي حتى اتخلص من رغوته اول مايفور وتطلع الرغوه على طول اصفيه من الماء واغسله على السريع مجرد تروح الرغوه عنه بعدها اكون فارمه بصل احطه على النار واحمسه مع اللحم بالزيت واضيف حبة هيل ورق غار وبس يشقر اضيف عصير الطماطم اكون مجهزته على جنب والبهارات وحمص مسلوق على النص مجهزته بالفريزر طبعا وفلفل احمر مجفف للي يحب واتركه يطبخ وعلى نص الطبخه اضيف الملح وحبتين نومي بصرة (ليمون ناشف) واتركه يطبخ لحد ما تتماسك المرقه ويستوي اللحم وهذا شكلها طببعا اقطع خبز ايراني واصب عليه المرقه بس في بلدنا نخبز بالتنور لذلك اطعم وهو الخبز المعتمد عندنا 3- الدولمه: وهي من اشهر الاكلات عندنا ومعروفه بكل مكان والكل يحبها ولازم باي عزيمه تكون موجوده واذكر ام امي الله يرحمها كانت تقول ان وجدة الدولمه مع الاكل معناته انه اهل البيت يحبون الضيف ومقدريه المهم الدولمه شغلها متعب اشوي ولازم تتاني وتشتغلي اشوي اشوي حتى تكون مضبوطه الحشوه عباره عن بصل مفروم وطماطم وبقدونس ونعناع وعصير ليمون بعدها نكون مجهزين التمنّ(الرز) مغسول نضيفه على الخضار ولح مفروم ويفضل بسمن اشوي ونضيف ملعقتين اكل معجون طماطه وزيت طبخ وزيت زيتون وبهارت الي انت تحبيها وفلفل اسود واشوية كمون وكركم ودارسين وملح ,بعدها نخلطهم ونجهزها نجي على القشور اكون مجهزه البصل اقصه من فوق وتحت واسوي شق طولي من بره لداخل البصله للب يعني نفوره على النار بماء حتى تفكك الطبقات وبعدها افكك القشور واجهز كوسا وباذنجان وطماطم وفلفله خضره احفرهم واجهز ورق العنب اغسله واخليهم على جنب واكون مجهزه اما ريش لحم او ضلوع مسلوقه على النص ابدي احشي اول شي احط زيت بقاع الجدر واحشي البصل اول طبقه وبعدين الكوسه والباذمجان والفلفل والطماطم وبعدها اضيف الريش او الضلوع واخر طبقه ورق العنب وبهاي نكون خلصنا منها طبعا يفضل انك تجهزيها قبل بيوم من العزيمه حتى لاترتبكي من شغلها نجي لطبخ احطها على النار تحمس 5دقايق تقريبا واتاكد اني اسمع صوت الحمس بعدها اكون مجهزه تمر هند ودبس رمان مذوبتهم بماي اضيفهم على الدولمه ومعلومه حطي صحن على الدولمه حتى لاتتفكك وخليه يغلي على نار متوسطه وبس يبدي ينشف حطيه على اوطى نار وخليه يتهدى على راحته وبدها طفيه وبس اطفيه ضيفي عليه اشويت زيت حامي حتى يفرقع ويعطي طعم ولاتقلبيها الا لحد ما تبرد اشوي ولو مستعجله حطي الجدر بحمام مائي 5دقايق واقلبيها وهذا شكلها 4-برتي بلاو: عباره عن تمنّ برياني مغلف بعجينة الكلاش اقطع بطاطا وجزر مكعبات وبصل شرايح وبازلاء واقليهم كلهم واضيف عليهم بهارات برياني ودارسين وهيل مطحون وزنجبيل وجوزة الطيب وفلفل اسود بعدها اسلق التمنّ مع ملح وحبتين هيل وورق غار وقرنفل بعدها اصفي التمنّ واحط زيت وتمن بقاع الجدر وبعدها الخلطه وفوقها باقي التمنّ وارش فوق زعفران منقوع بماء ورد وصبغه صفره ومرقة دجاج واخليه يتهدى اشوي بعدها اكون مجهزه صينية فرن داهنتها بزيت وحاطه عليها طبقات من عجينة الكلاش بعدين اجيب التمن واحطه وبعدين اغطيه بالعجينه وادخله الفرن بس يتحمر من تحت وفوق وهذا شكله 5-دجاج مشوي: انظف الدجاج واتبله قبل يوم بلبن وزيت وملح وخل واشوية ثوم وبهارات وفلفل اسود وعصير ليمون ثاني يوم اطلعها واغسلها على السريع من الخلطه واحطها في بايركس مع بصل وبطاطا وارش ملح وزيت وليمون وكوبين ماء وادخلهم الفرن لحد ما يستوي 6-باي الدجاج: الحشوه دجاج مسلوق ومفتفت احمس بصله وبطاطا مسلوقه وبعدين الدجاج واخلطهم مع اشويه بازلاء وفلفل اسود وملح بس يستوا اطفيه واضيف له قشطة ك دي دي نص علبه وملعقة جبن سائل انا حطيت كرافت وخلطتهم وجبت عجينة البف باستري وصفيتهم في بايركس مدهون بزبده وبعدين العجينه طبقه وحشوه طبقه وحليب سائل نص كوب واخر شي طبقة عجينه فوق ونص كوب حليب ايضا ورشة فلفل اسود ادخله الفرن لحد مايستوي وهذا شكله 7-كبة حلب وسمبوسة : كبة الحلب هي كبه معروفه عندنا وكثير يحبوها العجينه عباره عن تمنّ وصبغة اكل صفره اطبخه بماء مجرد يغطيه وبس ينشف اطفيه واعجنه مع حبة بطاطا مسلوقه بالفرامه واشكلها دوائر واحشيها لحم مفروم مع بصل وبقدونس وبهار ورشة هيل مطحون وفلفل اسود ,طبعا انا مجهزتها قبل رمضان بس اطلعها واقليها على طول السمبوسة عباره عن دجاج مسلوق ومفتفت واحمس بصل مفروم وبطاطا مسلوقه ومقطعه مكعبات وجزر انا ابرشه وبازلاء احمسهم وبعدها اضيف الدجاج والبهارات وفلفل اسود واحشي العجينه وهذا شكلهم المشروبات عباره عن لبن وعصير زبيب وعصير تمر هند وماء وعصير توت جاهز وببسي لخوي مو لنا هههههههه وهاي صور السفره الجماعيه اول وحده كانت شوربه ولبن وتمر وراحوا يصلوا المغرب ويرجعوا الرجاء عدم الرد حتى يكمل الموضوع

__________________

[IMG]http://im27.***********/2012-03-18/1332067164591.jpg[/IMG]
"ان في القلب لحسرات لايطفؤها الا الرضى بقضاء الله وقدره"
"يارب ارحمني واقبل ابنائي ال7شفعاء لي ولوالدهم يوم القيامه"

التعديل الأخير تم بواسطة الماضي الدفين ; 26-08-2011 الساعة 06:44 AM