منتدى عالم الأسرة والمجتمع - عرض مشاركة واحدة - هل ينجح الزواج من جنسية أخرى ومقيمه بنفس بلدي؟؟؟؟؟

27-08-2011, 11:21 PM

#44

البرنتيسا

عضو دائم

تاريخ التسجيل: Jan 2011

المشاركات: 81

اقتباس:

المشاركة الأصلية كتبت بواسطة ابن الأجواد

أنا الآن اسئل عنهم بشكل مكثف وإلى الآن ما سمعت إلا كلام طيب لكن الله يستر والبنت لاحظت تلبس
عباية كتف هل بالإمكان أقناعها بعباية الراس ؟؟

الحمد لله استخرنا والله يكتب اللي فيه الخير

زمان كنت أقول هذا الكلام لكن الوقت يتغير البنات هذا الوقت تغيروا كل هم الوحدة المظاهر
والأمور السطحية وقلة الحياء وانتشر بينهم الإعجاب و الشذوذ والحب المحرم مع الشباب في النت
وشوفيهم في الأسواق كيف قلة الحياء وقوة الوجه أمشي مع الوالدة في السوق وتجي وحدة تتكلم
بكلام وقح وتضحك ومعها خوياتها وتروح الوالدة تخاصمها وتجلس تستهزء وتضحك بغيت أفسخ
النعال واعطيها على وجهها وهذه ماهي حالات فردية كثير من زملائي تحصل معهم مثل المواقف هذي
صرنا ما نقدر ندخل السوق بسبب هالوجيه وبعدين تقولين لي حلاة الثوب رقعته منه وفيه
وهذا حال أغلب البنات إلا من رحم ربي الله يصلح الحال من عنده

فعلاً والرجال ماشاءالله عندنا كلهم صالحين الله لا يضرهم !
ياخوي .. أنا مو ضد زواجك من جنسية أخرى ، بالعكس الله يوفقك ، لكن إن كان هذا سببك فـ والله ما أدري وش أقول ؟ ؟ .
يعني لو سمحت فكر شوي ، أجل تقول اعجاب وشذوذ ؟! ، طول حياتي ماشفت هالإعجاب اللي ازعجونا فيه ، وأنا بنت ، وفي محيط بنات ، طول حياتي وأنا أدرس معهم ليه مامرت علي ولو حالة وحدة!! حالة وحدة بس!! .
دليل إن الناس يحبون يهولون ، شافوا نص حركة فهموها عكس!! ، وقالوا بنات هالزمن وبنات هالجيل .. وماكلها غيرنا .
لو أقول لـ بنت ياحبيبتي .. أو قلبي .. هذا مو معناته إنها زوجي!! والا عشيقي .. بالعكس البنات بطبعهم لينات ، يحبون يستخدمون الألفاظ المحببة ، حتى استخدامنا لها يكون بصورة عفوية مو مثل ماتتخيلون .

أما بالنسبة للمظاهر ، فكل امرأة!! يهمها مظهرها ، وجمالها ، وأناقتها وحتى مظهر أقاربها واللي حولها " اللي يمثلونها بشكل عام " فطرة في كل امرأة وستجدها في خطيبتك الأجنبية .
لكن لكل امرأة اسلوبها في اظهار هذا الجانب ، فيه منهم بإسراف وبعضهم بتعقل ، لكن الاهتمام بالمظاهر موجود في الكل .

اما مكالمات البنات ، فالشخص اللي تكلمه أيضاً ولد!! ، دليل على أن الخراب شامل الإثنين ، وفعلاً ما أنكر هذا الشيء منتشر .. ومالي كلمة فيه ، لكن هذا الشيء مو يخص السعودية ، إنما جميع بنات وشباب العالم مشمولين في هذي النقطة ، لأن هذا التطور وسرعة الاتصال والتواصل بين شعوب العالم هو السبب ، فكل العالم خاربة إلا اللي يخاف ربه وعنده دين متمسك فيه .

وأخيراً البنات في الأسواق ، ما أنكر عدم وجود هذي الفئة لكنها أقلية!! ، أقلية جداً .. وثلاثة أرباعهم أجانب ، وسبحان الله ذكرتني بكلام أمي أمس الله يحفظها لما طلعنا نحضر صلاة القيام ، وكان الطريق مزدحم جداً! ، وفي الوقت نفسه كنت أتكلم معها عن البنات اللي في الأسواق اللي يتبرجون وكذا الزبدة عن سالفة معينة ، فقالت : الله يهديهم ، مثل مافيه مهبل في الأسواق ، فيه معقل يروحون المساجد ويتعبدون

.
وفعلاً كان مصلى النساء جداً مزدحم ، وأغلبيتهم كانوا بنات شابات ، فالحمدلله يعني الدنيا فعلاً لازالت بخير! هذا غير البنات اللي ماقدروا يحضرون المسجد لأسباب متعددة ، فالحمدلله .

وفي النهاية ماذكرت هو حال أقلية البنات وليس أغلبهم !
أما بالنسبة لحياتك مستقبلاً فالمسألة توفيق من الله ، الله يوفقك ويسهل أمورك .