هلا بالعزيزة والغالية رو ح الطير وكل عام وأنتي بخير وصحة وسلامة وإن شاء الله تولدي وتجيبي عروس مثل القمر وتقومي لنا بالسلامه يارب
شوفي ياقلبي شركة نوكيا بالأساس كانت شركة المانية والشركه هاذي فلست وباعت علامتها وإسمها التجاري من شركة فنلنديه وصار مقرها في فنلندا طبعا فيه شركات منافسة لشركة نوكيا وبنفس إسم نوكيا بس أجهزتها رديئة ولو تلاحظي معاي إن فيه عدة أجهزة نوكيا والسوق مليان منها بالإضافة إلى رخص أسعارها وأصبحت في متناول الجميع وأكثر الناس تثق بشركة نوكيا فيروحوا يشتروا جوالات نوكيا بس ما يدققوا على بلد الصنع أهم شئ عندهم المنظر والخدمات ورخص السعر ومع الوقت تظهر عيوب هاذي الأجهزه وأحيان يخرب الجهاز ماعاد تلاقي له قطع غيار طبعا أنا قلت في ردي السابق إن فيه شركات تقلد علامات نوكيا وموجودة في ثلاث دول ومنها هنجاريا والصين والثالثة كوريا
وليست المكسيك أنا خبطت في الدوله إللي تصنع جهاز بلاك بيري حسبتها هي نفسها تصنع نوكيا واليوم شفت مشاركتي وتذكرت إن الدوله الثالثه هي كوريا وليست المكسيك وكمان إنكشفت دولة رابعه وهي الهند تصنع أجهزة إسمها نوكيا عموما أنا ما أشتري اجهزة جوالاتي إلا من شركة تلكيوم إكسيوم عندي جهاز نوكيا إن 73 مطور أخذته تقريبا 1650 ريال أول مانزل لسوق له عندي تقريبا 5 سنوات والحمدالله ماقد وديته لأي ورشة تصليح ولاعمره دخل مستشفى جوالات وأكرفه كرف حتى الأرقام والحروف في الأزارير تمسحت من كثر ما أستخدمته وباقي يكد كد وعندي جهاز نوكيا إن 95 أخذته بمبلغ 2800 ريال أول ما نزل السوق له معي تقريبا 4 سنوات مستخدمته وخرب فيه إللي يزلق الشاشه تقريبا قبل سنة وصارت شاشته مطموسه وديته الورشة وضبطه في خلال دقايق والحين شغال معي ومافيه أي عيب الحمدالله ماشي معي مثل الفل وصناعتها كلهاالجهازين فنلنديه وحتى أسعار الأجهزه النوكيا فنلندية الصنع تختلف عن الأجهزه النوكيا المصنعة في دول أخرى صح سعرها غالي لاكن جودتها عالية وإذا بغيت تعرف صناعة جهازك النوكيا ماعليك غير إنك تقفل الجهازوتطلع البطارية إللي في داخله وتلاقي داخل الجوال تحت البطارية ملصق فيه
الموديل وتاريخ الصنع والمنشا
يعني الدولة إللي مصنو ع فيها
وشوفي أجهزة النوكيا إللي أسعارها أقل من 1200 ريال هاذي معظمها صيني أو هنقاري
أو كوري أنا أخذت لأبني جوال نوكيا سي 6 لمس وله لوحة مفاتيح مثل اللاب توب وينزلق بالعرض أخذته من إكسترا 979 ريال تقريبا وصناعته كوري بصراحة الولد عجبه أما أنا ما دخل مزاجي وشفت فيه تطورات وبرامج حلوة وبالبداية شفته أعجبني كشخه وحلو بس لما شفت مدينة الصنع كوريا صديت عنه بالرغم من إن هناك ناس يمدحون الشركات الكورية بس أختك في الله ماتحب تدفع في شئ إلا قيمته فيه ويستاهل وله شهرته بين المنتجات .

عموما أختي الغالية جزاك الله خير وأنت أم الفزعات مانسيت فزعتك معي يوم إنقلبت شاشة جوالي ماقصرتي معي بس مادام إنك طلقتي نوكيا خلاص عذرك معك يالغاليه وتسلمين وخلينا ننتظر آراء وخبرات الباقين من الأعضاء الكرام الله يجزاهم خير .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله