السلام عليكم ورحمة الله وبركاته ..

عندي مشكله صار لها 8 سنوات تقريبا وعلى الرغم من انها حلت بشكل بسيط الا ان اثرها النفسي باقي معي للان ويعيق مسار حياتي الطبيعية في بعض الاحيان ..

انا متزوجه من 8 سنوات تقريبا وعمري الحالي 27 سنة وزوجي عمره 35 سنه ..
دخلت عش الزوجية كأي فتاة تحلم وتحلم وو .. لكني بالحقيقة صدمت بواقع مرير ومؤلم ابدا ماتوقعته ولا عملت له اي حساب ..

زوجي كان يهجرني فترات طويلة جدااا ..واول مرة كانت بعد زواجنا ب 4 اشهر ولمدة شهر كامل بالبداية

استغربت حيل لكني مشيت الوضع او حاولت اني امشيه بمزاجي توني عروس لازم افرح ..لكن للاسف هجرانه

لي توالى على مدى خمس سنوات متواصله مره 4 اشهر ومرة 7 اشهر واخر مره سنة كااامله مااقدر انسى

هالسنة وكيف مرة علي حسيت بانكساار عمري ماعرفته !

طبعا مااعرف السبب .. بتقولي ناقشتي زوجك بقولك ايه ناقشته بس مااطلع بنتيجه كل يقولي صبري علي ..

زوجي كان يحضر الدراسات العليا وانا كنت اكمل دراستي الجامعية لكني بالاخير اتخرجت وهو بعد اكمل

دراسته وخلص .. عشت ضغط نفسي رهيب جداااااااااا هجره من ناحية وغربتنا من ناحية ثانية وضغط الاهل

والمجتمع بسبب تأخر الانجاب .. طول السنوات الخمس اللي هجرني فيهم وانا عايشة بألم نفسي كبير

وبانكسار قوي كنت اشوف نفسي غير الحريم غير مرغوبه مااثيره ولا اغريه كيذا اقنعت نفسي بهالشي عالرغم من اني لما صارحته بهالشي قال لي المشكله فيني مو فيك ..

بصراحه مشااعري اعمق من اني اكتبها او اوصفها بالكلام مشااعري عميقة جداا انا مجروحه ماقدرت انسى

اللي رااح اقل موقف بينا اتذكر اللي راح كله اتذكر ايامي كيف قضيتها بهم وبكاء مستمر وحاله نفسيه وانعزال

تااام وصلت الى مرحله ماكنت اكل ولا اكلم احد ...

زوجي الان بالنسبة لي مصدر احبااااااااااط كبير وخيبة امل بالفعل هو يمثل لي هالشي .. احس انه حرمني

من اني اعيش مثلي مثل اي بنت .. لو صارحني من البداية ماكان عشت بالوضع اللي انا عشت فيه لكنه

خلاني افكر واهوجس وافقد الثقه بنفسي .. وعندي شعور ملازمني الى هذه اللحظه دائما احس ان احنا راح

نتطلق عندي خوووف شديد من الطلاق اخاااف افقد زوجي هالشعور يعذبني .. بصراحه انا فاقده للامان

والاستقرار النفسي بحياتي ومااحس بالراحه ابداا ومااحس اني راضية عن حياتي ..

اليوم وبعد حل المشكله بشكل بسيط صرت دائما احس ان زوجي يعاشرني اداء للواجب وعشان يرضيني فقط

وعشان مايعيش حالة تأنيب الضمير وجلد الذات بسبب هالامر >> هذا احساسي فقط يعني ممكن مايكون

صحيح بس لاني انا حساسه تجاه هالموضوع ,,

الان احيانا قبل الدورة الشهرية باسبوع تجيني حالة غريبه كل شي سىء اتذكره واحزن واكتئب واكون عصبية

جداااا اكره زوجي بهذي الفترة وكل اللي مريت فيه قبل اتذكره وارجع اعيش الهم من جديد لكني بصراحه اكون

انسانة لاتطاق بالفعل في هذي الفترة لكن بمجرد ماتجي الدورة ارجع كما كنت مرحه متفائلة ايجابيه واتذكر كل

الحظات الحلوة بحياتنا واهون على نفسي الامور السيئه اللي مريت فيها من قبل.. لكن وضعي الان في تزايد

وهذا الامر سبب لي مشكله مع زوجي هو مايدري انا بايش احس او ايش فيني هو يشوفني مكتئبه مااكلمه

مااطلع وجهه هو مايدري ليش .. لكن انا اعرف .. انا مازلت اعيش ضغط الماضي مو قادرة اتخطى هالشي

مو قادرة اعيش بشكل طبيعي وانسى عالرغم من ان زوجي مو مقصر معي ويحبني وادري بهالشي لكن هذا

كله ماعوضني ولا خلاني اعيش بشكل طبيعي .. الان سؤالي .. كيف اتخلص من الضغط النفسي اللي

اعيشه اليوم واللي سببه مشكلات الماضي ؟ وكيف اتعامل مع الحالة اللي تجيني كل شهر قبل الدورة الشهرية ؟

اتمنى يااستاذي انك توجهني وتساعدني على تخطي هذي المشكلة واي سؤال انا حاضرة ..

اسفة جداا على الاطاااله ,, وشكرا جزيلا .