طبعا انا جدا مقدرة لموقفك ومادري وش بسوي لو كنت مكانك لان طعم الظلم مررر ولاحد يعرفه الا اللي مر فيه..
ولكن ما اتوقع بتكون ردة فعلي زيك.. حبيبتي شكلك عصبية شوي لكن لازم تعرفين نقطه مرة مهمه ان الصراخ ينزل من مستواك مهما ظلموك وغلطو عليك بصراخك وعصبيتك تبينين لهم نقطة ضعف عندك وليس نقطة قوة .. تبينين لهم عصبيتك وانك ماتقدرين تسيطرين على اعصابك وممكن تتهورين حتى..
انا ممكن ارد عليهم واهزأهم ما اقولك اني مثالية لكن مارح اوقف واصرخ واتهور.. ممكن اقول نادو زوجي ووريني وش عندك بدون ترديد جملة انتي تهدديني بصراخ ورفعة صوت..
عموما اللي راح راح والحمدلله ان كل شي هدا الان وماصار في قطيعة بالعائله وزوجك وقف بصفك والكل اعتذر..
حبيبتي غيرك انظلم ومازال يتجرع الظلم ولاقدر يثبت برائته .. وانتي اثبتي للجميع انك صادقه وهي طاحت من عيون الجميع واعتذرت ايضا.. ليش معذبه نفسك ومخربه حياتك؟ حبيبتي بهالدنيا ما انولدنا عشان ناخذ حقنا كامل مية بالميه.. لابد تمر عليك مواقف تتنازلين فيها وتسامحين عشان تمشي الحياة..
بالنسله لزوجك .. لو انا مكانك بنصدم زيك واكثر وبنهار وبتحطم.. لكن بصراحه اهم شي عندي انه يكون مقتنع مية بالمية انه غلطان ومو اعتذر بس عشان يراضيني.. لو تأكدت منه انه مقتنع انه غلطان وانه تمنى لو تصرف بشكل مختلف وندمان على اللي صار ومايبيه يتكرر.. صدقيني بسامحه من كل قلبي لان مافيه احد كامل ومافيه احد ما يزل وهالمواقف تعطي دروس بالحياة..
اما التذكير بالمشكله كل فتره وفتره والحقد والتفكير مارح يخرب الا حياتك ونفسيتك..
فكري بكلامي زين وصدقيني اني احس بنفس احساسك ومريت بمواقف شبيهه بموقفك.. وجلست مع نفسي جلسات نفسيه طويله قررت فيها اسامح كل اللي غلطو علي وانسا وبعدها ارتحت ومشت حياتي.. طريقتك هذي بتنقص من عمرك وعمر زوجك وعيالك انتبهي لنفسك قبل فوات الاوان..
__________________
