جو ابوي وامي / ممكن ما تصدق لو قلت لك ماعرف كثير عنه ..و لا عرمي اهتميت بهالشيء
لكن اعرف بعض الأشياء /
ابوي الاوسط بين اخوانه / كل واحد منهم له شخصية مختلفة عن الثاني ما يجتمعون مع بعض الا تهاوشوا
عمي الكبير شخصية صاارمة جدا وجاد وعملي لأبعد حد ما يتحمل يجلس مع ابوي ابدا وابوي بنظره فاشل / كانت له سلطة على اخوانه لكن ابوي متمرد غير جاد هو وعمي الكبير داائما على خلاف و اي شيء يقوله عمي يروح ابوي يعانده و يسوي العكس / ما يحب احد يمشي كلمته عليه حتى لو صحيحة يعتقد ان الناس كلهم غلط وهو صح ..عماني كلهم ناجحين مقارنة فيه ..
احس حياته راحت بنزاعات مع الناس بدون تحقيق اي تقدم ..
يفرح اذا احد استعان فيه على اي موضوع وخاصة لو مشكلة تلقاه يسخر كل نفسه لشخص صاحب المشكلة ..
من عرفت ابوي وهو يتمشكل في الشغل و مسويله مجلس الناس دائما فيه حتى من خارج الدولة وغداء وعشاء باستمرار
و مجادلات و شكاوى واعتراضات و بسس / يدخل نفسه بكل شيء ..
و رغم هذا كل عيال عمي الكبير تاركين ابوهم وجايين عنده لأنه رغم عناده ارحم من عمي وسلطة عمي و بخل عمي ..
أمي / كانت هي بعد الوسطى بين اخواتها عندها اخ واحد بس متسلط و امها قاااسية جدا / تزوجت ابوي بعد وفاة شقيقتها اللي كانت
زوجة ابوي / طبعا غصب عنها و هربت من البيت اياام لكن بعدين رجعت و تزوجت ابوي ..
صبووورة جدا / و حساااسة جدا ..
مواقف اثرت علي / كثييرة واغلبها في الطفولة / لدرجة انسى امور صارت بوقت قريب ولا انسى مواقف الطفولة بتاتا
طفولتي / عااالم مستقل و ممكن اعتبرها كل حياتي و ما بعدها غير محسوب فالطفولة هي الاساس المحفور في ذاكرتي
ما كان بيني وبين امي تواصل كبير كانت موظفة / احيانا ابوي يتفاعل معي اكثر منها ..
كنت متمرده على كل شيء و لا اقبل اسمع كلام احد مين ما كان مع اني كنت هاادئة / اسمع التوجيهات واروح اخالفها بدون تردد
و بكل هدوء / اروح مع ابوي لاصحابه واجلس معه عندهم ..
اغلب وقتي العب مع اخواني و متسلطه على بعضهم رغم انهم اكبر مني / بس انا الرئيسة دائما ولو صار ورفضوا الإنصياع لي
اتركهم والعب لحالي ...
افضل لعب الأولاد على لعب البنات / ما احب اجلس مع بنات عمي لأن لعبهم بااارد كله عرائس و طبخ وخياطة وبداخل البيت زي لعب البنات عادة / و لا كانوا يطلعون معي الشارع / فأنا أكره اللعب داخل البيت احس بالتقييد ..
فأطلع الشارع و العب كورة مع الأولاد ..
احب الإكتشاف بشكل غير معقول وعرضت نفسي للخطر اكثر من مرة ..( وهذى اعتبرها إهمال من امي )
مرة طلعت فوق جبل كبير إلى ما وصلت القمة وماقدرت انزل بعدين وبقيت فترة ولاحد داري عني لكن تشجعت ونزلت
وما وصلت إلى قريب المغرب ..وهذى مادري ليش اثرت عليه جدا ومازلت اذكرها وبقيت فترة وانا احلم اني فوق الجبل ومو قادرة انزل ..!و للمعومية هذا الجبل كنت انا واخواني نطلعه احيانا لكن ولا مرة وصلنا للقمة كانوا يخافون لكن انا جاني فضول إلا اشوف القمة و طلعت و هم مو دارين ..! و اخترت طريق صعب لأني اسمعهم يقولوا انه صعب / وانا اذا سمعت تحذير عن شيء لازم اسويه عشان اكتشف بنفسي ..!
كنت اطلع من البيت قريب اذان العصر ولا ارجع الا قريب المغرب او بعد المغرب احيانا / واتجول في الشوارع واطلع من الحي كله
ولما ابوي جاب لأخوي سيكل فررررحت و صرت اخذه منه غصب عليه و امشي فيه الحديقة / والحديقة هذى بعيييده عن البيت
و اقطع كم شارع عام عشان اوصل / واخذ اخوي معي اصغر مني بشوي واخليه يمشي وراي بس كان خواف جدا ..
واحيانا امشي لحالي اذا رفضوا يروحوا معي .. ولا حد يسال انا ويني و تاركيني على راحتي ..؟! " وهذا بعد اهمال كبير "
و اتعشي من برا من كفتريا على الشارع العام ..
و موقف بعد اثر عليه وبقووة / هو اول يوم اروح فيه المدرسة كنت انا واخوي الأصغر دائما مع بعض وعلاقتنا قوية
فصار انهم دخلوني قبله وهو لا / أنا اعترضت يانروح مع بعض يا بلاش ..
لكن ابوي رفض و ودوني غصب عني مع بنات عمي / كنت ابكي كل يوم فابوي رضخ لي وقال خلاص بلاش مدرسه هذى السنة
لكن امي رفضت وضربتني و خلت ابوي يوديني غصب / اللي صار أن ابوي اخذنى ولما نزلني عند المدرسة و راح أنا هربت
و لا دخلت المدرسة و بنات عمي دخلوا .. شافني الحارس حق المدرسة ولحقني بالسيارة و مطاردات إلى ما قدر يمسكني ويرجعني المدرسة / و بعدها صرت اروح المدرسة بحراسة مشددة من بنات عمي ..
تعودت على الشرده من المدرسة و صرت أشرد أكثر من مرة وارجع البيت قبل موعد الصرفة وصلت المتوسطة وانا على هذا الحال ..
و لاامي ولا ابوي ولا اخواني دارين ..! و اسلوبي في الهرب اني اذا شفت اي حرمه جاييه المدرسة اراقبها واخذ شنطتي واجلس عند الباب فاذا فتح لها الحارس الباب اطلع معها بكل هدوء / وبكذا يحسب الحارس اني معها وانها امي ..!
بعدين صرت اخذ بنات عمي معي ونطلع كلنا من المدرسة و كنت انا اللي اخطط لهم مع انهم اكبر مني و محرسينهم عليه ..!
و هذى كانت مغامرة بعد و خطيرة لأن البيت كان بعيد و قبل اوصل البيت اقطع ارض صحراوية كبيرة ..
اللي فيها الجبل اللي طلعته .. كنت اكره المدرسة واكره مجتمع البنات و لا عندي صديقات ..
مرة اخذت قلم بنت وقالت للأبله عليه وزعلت انا وحقدت عليها / وصرت بعدها اخذ اغراض البنات اقلام او مساحات او اي شيء خاص فيهم سرقة طبعاً و بدون مايدرون / واذا جيت البيت ارميها كلها بالزباله اواعطيها بنات عمي / بقيت فتررة طويلة على هذا الحال .! مع ان امي ما تقصر معي كانت تجيب لي اقلام ودفاتر و اغراض كثيرة ومن اغلى الماركات / لكن مادري ليش اسوي كذا؟
صرت حرامية واروح المقصف و اخذ سرقة اي شي لو شوكولاه مع ان معي فلوس و اشترى و بعد البقالة اللي عند البيت أخذ منها سرقة وانا اكون شاريه لكن ازود شيء مجانا ..
يمكن كان يعجبني اني اتمرد على القوانين واخذ شيء بدون ارادة اصحابه و هذا يحسسني بالقوة والقدرة و بنفس الوقت انتقام ..!
كنت اجد صعوووبة كبيرة بالتاقلم مع البنات كل وقتي تخطيط وسلوكيات غير سوية و اذا جيت البيت اندمجت مع اخواني ..
موقف بعد هزني بقوووة بقووة / وهو اني مرة جيت البيت بعد المغرب و كان البيت هادي فدخلت ولقيت امي جالسه باحد الأسياب
تبكي .. ليش ؟! مادري ولا سألت لكن أذكر الى الآن الألم اللي حسيت فيه من المنظر ..
كنت اكره مرة عمي كره شديد / إنسانه منافقة درجة اولى / وقحة و جرئية بشكل مقزز / من اول ما تجي نسمع ضحكتها المايعة
ابوي اعجب فيها بشكل فضيع وكانت تتعمد تغريه بتبرجها وكلامها وضحكها و اهتمامها المتصنع ..
كانت تخدع امي و تتظاهر انها صديقتها وهذى عادتها مع الكل من تجلس بمجلس تتكلم معك لدرجة تشعر انك اعز شخص عندها
و بمجرد خروجك من عندها تبدا الحش و الغيبة والكلام الكذب ..
صارت عجوز وهي الى الآن بنفس اسلوبها بناتها صاروا زيها ، أناا ما قدرت اتقبلهم ابدا فكرهت مجالس الحريم كلها نفس الشاكلة ..
ما اثق باحد بعدها و بعد ابوي ..
يوم كبرت عادي شعوري ولا تغير جسمي كثير لأني اصلا نحيفة / لكن الشيء اللي كدرني امي صارت تشدد على لبسي
و تلزمني بالحجاب لكن ررررفضت رفض قااطع و ما قدرت علي / ما تغيرت كثير ولا اعتبرت هذا حدث مهم ..!
الزينة والملابس ما احبها ولا اهتم فيها لبسي سبورات في الأغلب افضل اللبس المريح اكثر ..
لكن ابوي صار ما يأخذني مع اخواني مثل اول / يعني الحلاق كنت اروح معهم و احلق شعري مثلهم ..
المسجد ماصار يأخذني معهم .. كل شيء لا انتي بنت / حسيت بالتقييد الكبير وكرهت كوني بنت لأن هذا يعني ضعف
و حصار و عدم حرية كبيرة ..
ابغي اكون ولد اطلع واروح على كيفياسوي اي شي ابغاه زي اخواني / صحيح في فترة مراهقتي شربت سجائر زي اخوى
امي ضربتني وبطلتها بعدين مو لاني خفت بس لأني ما استسغتها ..
هذى شيء من ذاكرتي ..