العشم على قد المحبة يا ابو جود .. كنت متأكدة بأنه حبكم لبعض مميز وإلا ما كنت عتبت عليها لهالدرجة .. وما كانت هي تحسست لهالدرجة من طلعتها من بيتها .
واسمح لي اقول لك وجهة نظري كأنثى .. أغلب النساء كانت ستشعر مثل شعور زوجتك بخصوص روحتها لبيت أخوها وكانت تحسبها انها طردة .. أقولك ليش ... لأنك طلبت منهم يروحوا مع اخوها وانت بحال غضب ولأنك ما اخذتهم معك بيت أهلك .. يمكن عندك سبب ما لعدم أخذهم معك بيت أهلك لكن الشعور اللي وصل لزوجتك هو الشعور اللي كان داخلك وهو عااافك الخاطر وبما انها تحبك ما هان عليها شعورك هذا تجاهها .
واسمح لي اخي (او بالأصح ابني ) أن أعاتبك على عدم توضيحك لزوجتك عن المالك الحقيقي لبيتكم والسيارة ومصدر ثمنه من البداية .. فتحت مجال واسع للشيطان بتكتمك هذا .. ترى زوجتك انسان مو ملاك حتى تحطها بمحك مثل هذا ..
هي انسان ربنا جبله على فطره معينة وحواليه شياطين انس وجن .. حولها من يقول قصص عن أزواج غدروا بزوجاتهم بعد ما أخذوا فلوسهم وقصص عن خيانات أشكال وألوان وانت تدخل المنتدى وتشوف ومثل ما شيطانك يوسوس لك بانها بتشوف روحها عليك بيوم من الايام ترى الشيطان يوسوس لها بعد بأمور ثانية .. ولولا ثقتها الكبيرة فيك لكان صار أكثر من اللي صار
مافي مثل الوضوح والصراحة مو لأنها ما تثق فيك ولا لأنها ما طلعت على قدر أملك فيها .. ابدا ... بس لأن الشيطان يدخل للانسان من مداخل أصغر بكثير من هذا المدخل .
__________________
